1 Ami mma ñkop ọkpọsọñ uyo etiñde ikọ ke Edisana Ebiet ọnọ mme enjel itiaba oro ete, "Eka ekeñwaña mme bọwut iyaresit Abasi itiaba oro ke isọñ."

2 Akpa enjel ama aka akañwaña bọwut esie ke isọñ. Mme enyene ndik ndọk emi asañade ye ọkpọsọñ ubiak ema eta kpukpru mme mmọ emi ekenyenede idiọñọ idiọk unam emi ke idem, kpa ye mme mmọ emi ekekponode mbiet esie ñko.

3 Ndien ọyọhọ enjel iba onyuñ añwaña bọwut esie ke inyañ, mmọñ inyañ akabade etie nte iyip okpo owo, ndien kpukpru mme odu uwem ñkpọ ke inyañ emi ema ekpaña.

4 Ndien enjel ọyọhọ ita ama añwaña bọwut esie ke mme ñkpri akpa ye ke mme idim mmọñ, ndien mmọ ema ekabade edi iyip. 5 Ami mma ñkop enjel emi ekesede ñkpọ abaña mme mmọñ ọdọhọde, ete, "Afo emenen ke mme ikpe emi afo ebierede, O Edisana, emi odude, ye emi okodude. 6 Koro mmọ eduọk iyip ikọt Abasi ye eke mme asiak uduak Abasi, ke ntre Afo ọmọnọ mmọ iyip eñwọñ. Mmọ ebọ se idotde ye mmọ."

7 Ndien ami mma ñkop uyo otode ke Itie Uwa, onyuñ ọdọhọ, ete, "Ih, Ọbọñ Abasi andikpon ñkan. Ubiere ikpe Fo edi akpanikọ ye unen."

8 Do ke enjel ọyọhọ inañ akañwaña bọwut esie esin ke utin, ndien ema enọ utin odudu ndifọp mme owo ye ọkpọsọñ ufiop esie. 9 Ọkpọsọñ ufiop ikañ emi ama ọfọp mme owo, ndien mmọ ema esuñi enyiñ Abasi, emi akarade mme ndiọi udọñọ emi. Edi mmọ ikenyimeke ndiwọñọde ñkpọñ mme idiọkñkpọ mmọ ñnyuñ nnọ Abasi ubọñ.

10 Ndien enjel ọyọhọ ition ama añwaña bọwut esie esin ke ebekpo idiọk unam oro. Ekim ama ọduọ ofuk obio ukara idiọk unam oro, ndien mme ikọt esie ema eta edet mmọ ke ntak ọkpọsọñ ubiak, 11 ndien mmọ esuñi Abasi emi odude ke enyọñ ke ntak mme ubiak ye mme ndọk mmọ. Edi mmọ ikọkpọñke mme ndiọi usuñ mmọ.

12 Ndien enjel ọyọhọ itiokiet ama añwaña bọwut esie esin ke akwa akpa emi ekerede Yufretis. Akpa emi ama asat, man asiak usuñ ọnọ mme mbọñ emi etode edem usiahautin.

13 Do ke ami ñkokut mme ndedehe Spirit ita emi ekebietde mfuọt nte ewọñọde ke inua urukikọt enyene mba oro, ye inua idiọk unam oro, ye ke inua mme asiak nsu nsu uduak oro. 14 Mmọ edi spirit mme dimọn emi enamde mme utibe ñkpọ. Mme spirit ita emi eka ebine mme mbọñ emi ekarade ofuri iso isọñ, nditañ mmọ ndian ọtọ kiet ndiñwana ekọñ ke akwa usen Abasi Ete Andikoñ Ñkan.

15 "Kpañ utọñ: Ami ke ndi nte inọ! Ọfọfọn ọnọ owo emi editabade idap, onyuñ esine ọfọñidem esie, man enye edisaña iferi, onyuñ okut but ke iso mme owo."

16 Ndien mme spirit ema etañ mme mbọñ ebok ọtọ kiet ke ebiet emi ekotde ke usem Hibru, Amagedọn;

17 Ndien ọyọhọ enjel itiaba ama añwaña bọwut esie esin ke ofum, ọkpọsọñ uyo ama oto ke ebekpo ke Edisana Ebiet, ọdọhọ, ete, "Enam ema". 18 Emireñ mireñ ye mme uyom, ye edisiaha obuma, ye enyene ndik unyekisọñ ama ada itie. Ọkọtọtọñọ utọ unyekisọñ oro ikọduhọ tọñọ nte ekebot owo, enye emi ekedi ndiọk ñkan unyekisọñ. 19 Ema ebahade akwa obio oro ke mbak ita, ndien ema ebiat mme ikpọ obio ke kpukpru idut. Abasi ama eti akwa Babilọn, onyuñ anam enye ọñwọñ mmin ke kọp Esie, mmin ọkpọsọñ iyaresit Esie. 20 Kpukpru mme obio ufọt mmọñ ema esomo, kpukpru mme ikpọ obot ema esomo. 21 Ikpọ edim itiat emi kiet esie okodobide ke udomo ñkpọ udobi ikie kiet, ama edep ke enyọñ odoro mme owo ke idem. Ndien mme owo ema esuñi Abasi ke ntak edim itiat, koro emi ekedide ata enyene ndik idiọk udọñọ.