1 Ndien enjel ọyọhọ ition ama ofuri obukpoñ esie. Ami mma ñkut ntantaọfiọñ emi ekekibede ke enyọñ ọduọ ke isọñ; ema enọ enye ukpọhọde akwa obube idak isọñ. 2 Ntantaọfiọñ oro ama ọkpọhọde akwa ukpe idak isọñ oro, ndien nsuñikañ ama ọbuñọ ọwọrọ ke esit, emi ekebietde nsuñikañ emi okpotode ata akwa ebuk ikañ; nsuñikañ emi otode ke akwa ukpe idak isọñ emi ama anam uñwana eyo ye ikpa enyọñ okim.

3 Mme ñkukuñkpọyọriyọ ema ewọñọ ke nsuñikañ oro eyọhọ ofuri iso isọñ, ndien ema enọ mmọ ukem odudu emi mme ikpeyen enyenede. 4 Ema ewuk mmọ ete ekubiat mbiet, mme mme eto, mme mme eto efen eke ededi; edi mmọ ekeme ndituhọde mme mmọ oro minyeneke idiọñọ Abasi ke ọkpọ iso mmọ. 5 Ikeyakke mme ñkukuñkpọyọriyọ oro ewot mme mmọ oro, edi etuhọde mmọ mbiet ubiak emi owo okopde ke ini emi ikpeyen otopde enye. 6 Ke ọfiọñ ition oro mme mmọ oro eyeyom ñkpa edi idikwe ñkpa; mmọ eyema ndikpa edi ñkpa eyefehe ọkpọñ mmọ.

7 Mme ñkukuñkpọyọriyọ ekebiet mme enañ mbakara emi ebeñede idem enọ ekọñ, se ikedorede mmọ ke ibuot ekebiet anyanya gold, ndien iso mmọ ekebiet mme iso owo. 8 Idet ibuot mmọ ekebiet idet ibuot iban, edet mmọ ekebiet edet ekpe. 9 Ekefuk ikpanesit mmọ ke ñkpọ emi etiede nte mbọbọ ukwak ekọñ, ndien uyom emi mme mba mmọ ekenamde ekebiet uyom emi mme enañ mbakara emi eduride mme ediwak ukpatñkpọ ekpenamde ke ini mmọ esọpde ebine ekọñ. 10 Mmọ enyene isim ye ifọt isim nte eke ikpeyen, ndien odudu ndituhọde owo ke ọfiọñ ition odu mmọ ke isim. 11 Mmọ enyene ọbọñ emi akarade mmọ, ndien enye edi enjel emi akarade akwa ukpe idak isọñ. Enyiñ esie ke usem mme Hibru edi Abadọn; ke usem mme mbon Grik edi Apoliọn, emi ọwọrọde, "Andisobo".

12 Akpa ñkpọ ndik ebe, ke emi ama ekebe, mme ñkpọ ndik iba efen esuhọ ndidi.

13 Ọyọhọ enjel itiokiet ama ofuri obukpoñ esie. Ami mma ñkop uyo otode ke mme ituñ itie uwa gold emi adade ke iso Abasi. 14 Uyo emi ama ọdọhọ ọyọhọ enjel itiokiet emi akakamade obukpoñ, ete, "Tat mme enjel inañ emi ebọpde mmọ ke akwa akpa emi ekotde Yufretis." 15 Ema etat mme enjel inañ emi, ekebeñe mmọ idem ebaña utọ awa ñkanika ke usen emi ye ọfiọñ emi ye isua emi, ndiwot ubak kiet ke mbahade ita ubon owo. 16 Ema esiak ibat mme mbon ekọñ emi edude ke mbeñeidem ekọñ enọ mi, ekedi midiọn ikie iba (200,000,000).

17 Ndien ke ñkukut mi, ami mma ñkut mme enañ mbakara ye mme mmọ emi ekewatde ke esit. Mmọ ekebọbọ mbọbọ esit ukwak emi akadatde nte ikañ, onyuñ etie awawa nte itiat emi ekotde safaya, onyuñ etie uto uto nte ibọk mfat. Ibuot mme enañ mbakara oro ekebiet mme ibuot ekpe, ndien ikañ, ye nsuñikañ ye ibọk mfat eto ke mme inua mmọ ewọrọ.

18 Udọñọ nsobo mbita emi ema ewot ubak kiet ke mbahade ita ubon owo. Mme udọñọ nsobo emi, ekedi ikañ, nsuñikañ ye ibọk mfat emi ekewọñọde mmọ ke inua. 19 Odudu mme enañ mbakara emi okodu ke inua mmọ, ye ke isim mmọ ñko. Mme isim mmọ ekebiet urukikọt, emi enyenede mme ibuot, ndien mmọ eda mmọ ebiomo owo ndo.

20 Mme ubon owo eken emi udọñọ nsobo emi mikowotke ikekabakede esit ikpọñ se mmọ ekedade ubọk mmọ ebot. Mmọ iketreke ndituak ibuot nnọ mme dimọn, ye mme edibot ñkpọ gold, ye eke silfa (sidibe), ye eke okpoho, ye eke itiat, ye eke eto, emi mikemeke ndikut usuñ, mme ndikop ikọ, mme ndisaña isañ. 21 Mmọ ñko ikatuaha ñkpọfiọk ke uwot owo mmọ, ye ke ubre idiọñ mmọ, ye ke use mmọ, ye ke uyip inọ mmọ.