1 Ndien ami mma ñkut enjel kiet nte ọsuhọrede oto enyọñ edi, onyuñ akama ke ubọk esie ukpọhọde akwa ukpe idak isọñ ye ata ndodobi ñkpọkọbi; 2 Enye ama omum urukikọt enyene mba, akani urukikọt oro, oro edi Setan, onyuñ ọbọp enye ke tọsin isua kiet. 3 Enjel oro ama emen enye otop esin ke akwa ukpe idak isọñ, onyuñ ọkọbi, ndien ada ufik ñkpọ efik; man enye edikeme nditọñọ ntak mbiaña mme idut aba tutu isua tọsin kiet ebe. Ini emi amaebe eyetọñọ ntak etat enye ke esisit ini. 4 Ndien ami mma ñkut mme ebekpo ye mme mmọ emi eketiede ke esit, ema enọ mmọ unen ndikpe ikpe. Ami mma ñnyuñ ñkut mme ukpọñ mmọ emi ekesiode mmọ ibuot koro mmọ eketiede ntiense ebaña Jisọs ye ke ntak mmọ ekekwọrọde ikọ Abasi. Mmọ ikatuakke ibuot inọ idiọk unam oro mme mbiet esie, mmọ ñko ikonyuñ ibọhọ idiọñọ idiọk unam emi ke ọkpọiso mmọ mme ke ubọk. Mmọ ema etọñọ ntak edu uwem enyuñ ekara nte mme ndidem ye Kraist ke isua tọsin kiet.

5 Mme akpaña ñkpa eken ikafiakke idu uwem tutu tọsin isua emi okure. Emi edi akpa ediset ke ñkpa. 6 Edisana ye akwa edidiọñ enyene mme mmọ emi esinede ke akpa ediset mme akpaña ñkpa emi. Udiana ñkpa inyeneke odudu ke idem mmọ. Mmọ eyedi mme oku Abasi ye eke Kraist, ndien mmọ eyekara ukara ye Enye ke isua tọsin kiet.

7 Ke mme isua tọsin emi ama ebe, eyesio Setan ke ufọk ñkpọkọbi esie, 8 ndien enye eyewọrọ aka ndibiaña mme idut emi esuanade eyọhọ iso isọñ, oro edi Gọg ye Magọg. Setan eyetañ mmọ obok ndida ññwana ekọñ, mmọ eyewak nte utatan inyañ. 9 Mmọ eyetara eyọhọ iso isọñ, enyuñ ekanade itie iduñ ikọt Abasi ekuk ye akwa obio emi Enye amade. Edi ikañ eyeto ke enyọñ onyuñ osobo mmọ.

10 Ndien Setan, emi akabiañade mmọ, eyemum enye etop esin ke ñkpọdiọhọ ikañ emi asakde ye itai inikiet efen, ebiet emi ema eketotop idiọk unam oro ye asiak nsunsu uduak esie esin, ndien eyetuhọde mmọ ke uwemeyo ye ke okoneyo ke nsinsi nsinsi.

11 Do ndien ke ñkokut akamba afia ebekpo kiet ye Enyemi etiede ke esit. Isọñ ye enyọñ ema efehe ekpọñ iso Esie, ndien itie ikiduho inọ mmọ aba. 12 Ndien ami mma ñkut mme akpaña ñkpa, ñkpri ye ikpọ ukem ukem, nte edade ke iso ebekpo. Ema ekubọde mme ñwed, ndien ema ekubọde ñwed efen, ñwed mme odu uwem. Ema ekpe ikpe mme akpaña ñkpa etiene se mmọ ekanamde, kpa nte ekewetde esin ke mme ñwed oro. 13 Ndien inyañ ibom ama asana mme okpo emi enye akakamade ayak. Ñkpa ye ebiet iduñ mme akpaña kpa ema enyuñ esana mme akpaña ñkpa emi mmọ ekekamade eyak. Ndien ema ekpe ikpe kpukpru mmọ etiene se mmọ ekenamde. 14 Ndien ema emum ñkpa ye obio ekpo etop esin ke ñkpọdiọhọ ikañ, ñkpọdiọhọ ikañ emi edi udiana ñkpa. 15 Owo ekededi emi mikewetke enyiñ esie isin ke ñwed mme odu uwem ema etop enye esin ke ñkpọdiọhọ ikañ.