1 Ndien ami mma ñkut ata ọkpọsọñ enjel efen nte ọsuhọrede oto ke enyọñ edi. Enye ekesine obubit enyọñ ke idem, onyuñ awaña akpara ke ibuot esie; iso esie eketie nte utin, ndien mme ukot esie eketie nte adaha ikañ. 2 Enye ama akama ekpri ñwed ikpa emi ekekubọrede ke ubọk esie. Enye odori ukot nnasia esie ke inyañ ibom, ndien ukot ufien esie ke nsat isọñ, 3 ndien enye ama ofiori ke ọkpọsọñ uyo emi ekebietde uyo ñkuni mme ekpe. Ke enye ama okofiori okot, mme obuma itiaba ema ebọrọ enye ye ñkuni.

4 Mmọ eketetiñ ikọ, ami ke ñkoyom ndiwet. Edi ami mma ñkop uyo etiñde ikọ oto enyọñ ete, "Dip se mme obuma itiaba emi etiñde; kuwet mmọ unim!"

5 Ndien enjel oro ami ñkokutde nte adade ke inyañ ibom ye ke isọñ ama emenede ubọk nnasia esie ke enyọñ, 6 onyuñ anam eñwọñọ ke enyiñ Abasi emi odude uwem ke nsinsi nsinsi emi akanamde enyọñ ye kpukpru se idọñọde ke esit, ye ererimbot ye kpukpru se idọñọde ke esit, ye inyañ ye kpukpru se idọñọde ke esit, ọdọhọ ete, "Ubiat ini ididuhọ aba." 7 Edi ke ini emi ọyọhọ enjel itiaba ofuride obukpoñ esie, do ke Abasi edinam ndedibe uduak Esie, kpa nte Enye eketiñde ọnọ mme isuñutom Esie, mme asiak uduak Abasi.

8 Ndien uyo emi ami ñkokopde etiñde ikọ oto enyọñ, ama ọtọñọ ntak etiñ ikọ ye ami, onyuñ ọdọhọ ete, "Ka kọbọ ikpa ñwed oro ekubọrede do ke ubọk enjel oro adade ke inyañ ibom ye ke isọñ."

9 Ami mma mbine enjel oro ñnyuñ ndọhọ enye nte yak enye ọnọ mi ekpri ikpa ñwed oro. Enye ama ọdọhọ mi ete, "Bọ mi ñnyuñ ta, ndien enye eyemak ke idibi fo, edi ke inua fo enye eyenem nte aran ọkwọk." 10 Ami mma mbọ ekpri ikpa ñwed oro ke ubọk esie ñnyuñ nta, ndien enye ama enem nte aran ọkwọk ke inua mi. Edi ke ini emi ami mma ñkemen enye, enye ama akabade amamak ke esit idibi mi.

11 Do ke ekedọhọ mi ete, "Ini kiet efen afo enyene ndisiak uduak Abasi mbaña ediwak owo, ye idut, ye mme usem, ye mme Edidem."