1 Do ndien ke ami ñkokut "obufa enyọñ ye obufa isọñ." Akpa enyọñ ye akpa isọñ ema ebe efep, ndien akpainyañ ama osop. 2 Ndien ami mma ñkut Edisana akwa obio, obufa Jerusalem, nte ọsuhọrede edi oto Abasi ke enyọñ, ema ediọñ enye idem nte ñwan ndọ emi ebeñede idem ndisobo ye ebe esie.

3 Ami mma ñkop ọkpọsọñ uyo emi otode ke ebekpo, ọdọhọde, ete, "Idahaemi ebiet iduñ Abasi edidu ye mme owo! Enye eyeduñ ye mmọ. Ndien mmọ eyedi ikọt Esie, ndien Abasi ke idem Esie eyedu ye mmọ, ndien Enye eyedi Abasi mmọ. 4 Enye eyekwọhọde kpukpru mmọñeyet ke enyin mmọ efep. Ñkpa ididuhọ aba, ukut ididuhọ aba, eyet ididuhọ aba, mme ubiak, koro akani ubonoñkpọ ebe efep."

5 Do ke Enyemi etiede ke ebekpo ọkọdọhọ, ete, "Ndien ke emi, Ami mmanam kpukpru ñkpọ edi obufa!" Enye ama onyuñ ọdọhọ mi ete, "Wet emi, koro mme ikọ emi edide akpanikọ, onyuñ edi se owo ekemede ndibuọtidem ke esit." 6 Ndien Enye ama adian, ete, "Enam ema! Ami ndi Alfa ye Omega, Ntọñọ ye Utit. Owo ekededi emi okopde nsatitọñ ñyenọ enye ke ikpuikpu mmọñ emi otode ke idim mmọñ uwem ọñwọñ. 7 Owo ekededi emi akande eyebọ kpukpru emi oto Mi. Ami ñyedi Abasi mmọ, ndien mmọ eyedi nditọ Mi. 8 Edi mme mbon ufep, mme mbio edidọk, mme anam mbubiam, mme mmọ emi ebrede idiọñ, ye mme okpono ndem, ye kpukpru mme osu nsu, ebiet emi enimde enọ mmọ edi ñkpọdiọhọ ikañ emi asakde ye itai, emi edide udiana ñkpa."

9 Kiet ke otu mme enjel itiaba oro akakamade mme bọwut itiaba emi ọkọyọhọde ye mme akpatre idiọk udọñọ itiaba oro, ama edi etiene mi onyuñ ọdọhọ ete, "Di, ndien ami ñyewut fi ñwan ndọ, ñwan Eyen Erọñ."

10 Spirit ama ọyọhọ mi ke idem, ndien enjel oro ama emen mi ọdọk ke enyọñ ata edikoñ akwa obot. Enye ama owut mi Jerusalem, edisana akwa obio, nte ọsuhọrede oto Abasi ke enyọñ edi, 11 ke ayayama ye ubọñ Abasi. Akwa obio oro ayama nte nsọñurua itiat, nte itiat emi ekotde jaspa, onyuñ emereñ nte akrasi. 12 Enye ama enyene ata akamba edikoñ ibibene, ye enyin usuñ duopeba ndien mme enjel duopeba ekekpeme mme enyinusuñ emi. Ema ewet mme enyiñ ekpuk Isrel duopeba ke mme enyinusuñ duopeba emi. 13 Enyinusuñ ita okodu ke ñkañ kiet: ita ke usiahautin; ita ke usuk, ita ke edere, ndien ita ke usoputin. 14 Ekebọp ibibene akwa obio emi edori ke itiat duopeba, emi ekewetde mme enyiñ mme ọbọsuru Eyen Erọñ duopeba ke enyọñ mmọ.

15 Enjel emi eketiñde ikọ ye ami ama akama eto udomo ñkpọ emi edade gold enam ndida ndomo akwa obio oro, ye mme enyinusuñ esie ye ibibene esie. 16 Akwa obio emi ekenyene ituñ inañ nnen nnen ke uniọñ ye ke ubom esie. Enjel oro ama odomo akwa obio oro ye eto udomoñkpọ esie, enye ekedi itiat tọsin kiet ye ikie ition ke uniọñ, ndien enye akatara onyuñ okoñ ukem nte enye ọniọñde. 17 Enjel oro ama onyuñ odomo ibibene, ndien ekedi ikpat ikie iba ke edikoñ esie nte idomo udomoñkpọ emi enye akakamade edide.

18 Ekedi itiat emi ekotde jaspa ke ekeda enam ibibene, ndien idem akwa obio oro ekeda ata ndisi gold enam enye, emi ekesemde nte akrasi. 19 Ekeda mme nsio nsio nsọñurua itiat ebana mme itiat idakisọñ emi ekedade ebọp ibibene akwa obio emi. Akpa itiat idak isọñ ekedi itiat emi ekotde jaspa, udiana ekedi safaya, ọyọhọ ita ekedi agat, ọyọhọ inañ ekedi emeral, 20 ọyọhọ ition ekedi ọniks, ọyọhọ itiokiet ekedi karnelian, ọyọhọ itiaba ekedi utọ itiat emi ekerede krisolait, ọyọhọ itiaita ekedi beril, ọyọhọ usukkiet ekedi itiat emi ekotde tọpaz, ọyọhọ duop ekedi Kalsedoni, ọyọhọ duopekiet ekedi tọkuọisi, ọyọhọ duopeba ekedi ametisi. 21 Mme enyinusuñ duopeba oro ekedi itiat emi ekotde pearl duopeba; ekenam enyinusuñ kiet kiet ye itiat pearl kiet kiet. Ekeda ata ndisi gold, emi esemde nte akrasi enam ọkpọusuñ akwa obio emi.

22 Ami ñkekwe edisana ebiet ke akwa obio oro, koro edisana ebiet esie edide Ọbọñ Abasi, Andikoñ Ñkan, ye Eyen Erọñ. 23 Akwa obio emi ikenyeneke ntak ndiyom utin mme ọfiọñ ndiyama ke esit, koro ubọñ Abasi ayamade ke esit, ndien Eyen Erọñ edi utueneikañ esie. 24 Ofuri idut ererimbot edisaña ke uñwana esie, ndien mme ndidem ererimbot eyeda mme inyene mmọ eduk edi ke esit. 25 Mme enyinusuñ akwa obio emi edina iñwañ kpukpru usen, owo idiberike mmọ, koro okoneyo mididuhọ do. 26 Eyeda ubọñ ye inyene mme idut edi ke akwa obio emi. 27 Edi baba ñkpọ kiet emi misanake ididukke akwa obio emi; mme mmọ emi enamde mme ñkpọ obut mme esude nsu ididukke. Ñkpasip mme mmọ emi ewetde enyiñ mmọ esin ke ñwed uwem Eyenerọñ ediduk akwa obio emi.