1 Do ndien ke ami ñkokut nte Eyen Erọñ okokubọrede akpa mme ufikñkpọ itiaba ndien ami mma ñkop kiet ke otu mme odu uwem ñkpọ inañ oro etiñde ikọ ke uyo emi ebietde uyo obuma, ete "Di!"

2 Ami mma nse ñnyuñ ñkut afia enañ. Andiwat enye ama akama utigha ndien ema enọ enye anyanya. Enye ama aka nte andikan ndinyuñ ñkan.

3 Do ke Eyen Erọñ okokubọrede ọyọhọ ufikñkpọ iba, ndien ami mma ñkop ọyọhọ iba ke otu mme odu uwem ñkpọ inañ oro ọdọhọde ete, "Di!"

4 Enañ mbakara efen ama ọwọrọ ada, emi ekedide ndat ndat. Ema enọ andiwat enye odudu ndisin ekọñ ke iso isọñ, man mme owo ewot kiet eken, ema enọ enye akwa akañkañ. 5 Ndien Eyen Erọñ ama okubọrede ọyọhọ ufikñkpọ ita; ndien ami mma ñkop ọyọhọ odu uwem ñkpọ ita nte ọdọhọde ete, "Di!" Ami mma nse ndien mma ñkut obubit enañ mbakara. Ndien andiwat enye ama akama udomo ñkpọ ke ubọk esie. 6 Ami mma ñkop ñkpọ nte uyo ọwọrọde oto ke otu mme odu uwem ñkpọ inañ oro onyuñ ọdọhọ ete, "kọp ibikpot kiet ke okuk utom usen kiet, kọp mfri bale ita ke okuk utom usen kiet. Edi kubiat aran ọlif ye mmin."

7 Ke Eyen Erọñ ama okokubọrede ọyọhọ udian ñkpọ inañ, ami mma ñkop ọyọhọ odu uwem ñkpọ inañ ọdọhọde ete, "Di!" 8 Ami mma nse ndien mma ñkut enañ mbakara emi ekenyenede idem ntọñ ntọñ. Ekekot andiwat enye ÑKPA, ndien obio ekpo ama etiene ke edem. Ema enọ mmọ odudu ndikara ubahade kiet ke mbak inañ ke iso isọñ, ndiwot ke ekọñ ye akañ, ye mme udọñọ, ye ke ubak mme unam ikọt emi edude ke isọñ.

9 Ndien Eyen Erọñ ama okubọrede ọyọhọ ufikñkpọ ition. Ami mma ñkut ke idak itie uwa mme ukpọñ mme mmọ emi ekewotde koro mmọ ekekwọrọde ikọ Abasi, enyuñ enam akpanikọ ke ntiense mmọ. 10 Mmọ ema efiori ke ọkpọsọñ uyo ete, "Ọkpọsọñ Abasi, Edisana ye anam akpanikọ! Edibighi adaña didie, ndien afo ekpe mbọñ ererimbot ikpe onyuñ amia mmọ ufen ke ndiwot ñnyin!" 11 Ema enọ owo kiet kiet ke otu mbon oro ekewotde do afia ewura, ndien ema edọhọ mmọ ete yak mmọ emana eduọk odudu ke esisit ini, tutu ibat mme nsaña utom mmọ ye mme nditọ eka mmọ emi ediwotde ekem, kpa nte ekewotde mmọ.

12 Ndien ami mma ñkut nte Eyen Erọñ okokubọrede ọyọhọ udian ñkpọ itiokiet. Ata ọkpọsọñ unyekisọñ ama ada itie, ndien utin akabade edi obubit, nte obubit ọfọñ ikpo emi edade idet ebot enam, ndien ọfiọñ akabade edi ndat ndat ofuri ofuri, nte iyip. 13 Mme ntantaọfiọñ ema ediañade ke ikpa enyọñ eduọñọ ke isọñ, nte mme mfri udari eduọñọde ke etak ke ini ọkpọsọñ ofum enyeñede enye. 14 Ikpa enyọñ ama osop nte owo ekpefutde ikpa ñwed, ndien ema emen kpukpru mme obot, ye obio ufọt mmọñ efep ke mme itie mmọ. 15 Ndien mme mbọñ ererimbot, mme mbuot mbọñ ekọñ, mme mbuot ukara, mme mbio inyene, ye mme okop odudu, ye kpukpru oruk owo eken, ifin, ye eyen isọñ, ema edip idem mmọ ke aba itiat ye ke mme idak ikpọ itiat mme obot. 16 Mmọ enyuñ efiori ekot mme ikpọ obot ye mme itiat, ete, "Eduọñọ efuk ñnyin enyuñ edip ñnyin ke enyin Enyemi etiede ke ebekpo, ye ke iyaresit Eyen Erọñ; 17 koro akwa usen iyaresit mmọ edisim, ndien anie ekeme ndida mbọ!"