1 Ke ini Eyen Erọñ ama okokubọrede ọyọhọ ufikñkpọ itiaba, ndobo ama odu ke enyọñ ke ñkpọ nte ubak awa ñkanika. 2 Do ke ami ñkokut mme enjel itiaba oro nte edade ke iso Abasi, ema enọ mmọ mme obukpoñ itiaba.

3 Enjel efen emi akamade usin ufuọñ ñkpọ eke gold, ama edida ke itie uwa. Ema enọ enye ediwak ufuọñ ñkpọ ndida ndian ke akam kpukpru ikọt Abasi man emen ewa ke itie uwa eke gold emi adade ke iso ebekpo. 4 Nsuñikañ edifọp ufuọñ ñkpọ ama ọdọk ye mme akam ikọt Abasi oto ke ubọk enjel emi adade ke iso Abasi.

5 Do ke enjel oro ekemen ñkpọ udọñ ufuọñ ñkpọ esin ikañ emi otode ke itie uwa, ndien añwaña enye ọduọk ke ererimbot. Ndien mbumede obuma, emireñ mireñ ye unyek isọñ ema eda itie.

6 Ndien mme enjel itiaba emi ekekamade mme obukpoñ itiaba ema edu ke mbeñeidem ndifri mmọ.

7 Akpa enjel ama ofuri obukpoñ esie. Edim itiat ye ikañ emi abuahade ye iyip ama oto enyọñ ọsuhọde ke isọñ. Ubak kiet ke itie ita ke isọñ ama ata ikañ, ye ubak kiet ke mbak ita mme eto ye kpukpru awawa mbiet.

8 Ndien enjel ọyọhọ iba ama ofuri obukpoñ esie ndien ema emen ñkpọ emi ekebietde ata akamba obot emi asakde ye ikañ etop esin ke inyañ. Ubak kiet ke mbahade ita inyañ ama akabade edi iyip, 9 ubak kiet ke mbahade ita kpukpru mme odu uwem ñkpọ ema ekpaña, ndien ubak kiet ke mbahade ita mme nsuñikañ ema esip.

10 Ndien enjel ọyọhọ ita ama ofuri obukpoñ esie. Ndien akwa ntantaọfiọñ emi asakde nte utueneikañ, ama oto ke ikpaenyọñ ọduọ oduk ke ubak kiet ke mbahade ita mme ñkpri akpa, ye ke mme idim mmọñ. 11 Enyiñ ntantaọfiọñ oro edi idot. Ubak kiet ke ubahade ita mmọñ ama akabade idot mmọñ, ndien mme ediwak owo ema ekpaña oto ke ediñwọñ mmọñ emi, koro enye ama akakabade edi idot mmọñ.

12 Ndien enjel ọyọhọ inañ ama ofuri obukpoñ esie, ndien ama otuk ubak kiet ke mbahade ita utin, ye ubak kiet ke mbahade ita ọfiọñ, ye ubak kiet ke mbahade ita mme ntantaọfiọñ, emi akanamde ubak kiet ke mbahade ita uyama mmọ okpu, uñwana ikọduhọ ke ubak kiet ke mbahade ita uwemeyo, ye ubak kiet ke mbahade ita okoneyo. 13 Do mma nse ndien ami mma ñkop ntrukpom kiet emi ekefede ko ke ata ikpa enyọñ, nte ọdọhọde ke ọkpọsọñ uyo ete, "Nsobo! Nsobo! Nsobo etiene mme mmọ emi eduñọde ke isọñ ke ini emi uyo ediwọrọde ito ke mme obukpoñ emi mme enjel ita eken edifride!"