1 Mma ntọñọ ntak ñkut ñkpọ ñkpaidem efen ke ikpa enyọñ, emi okokponde onyuñ ayaña owo ifiọk. Mmọ ekedi mme enjel itiaba ye mme idiọk udọñọ itiaba, emi edide mme akpatre idiọk udọñọ, koro emi edide akpatre nnamñwut iyaresit Abasi.

2 Ke emi ema ekebe ami mma ntọñọ ntak ñkut se ikpetiede nte akpa akrasi emi abuahade ye ikañ. Ami mma ñnyuñ ñkut mme mmọ emi ekekande ke eñwan emi ekeñwanade ye idiọk unam oro ye mbiet esie, ye mme ibat oro edade enọ enyiñ esie. Mmọ ekeda ke mben akpa akrasi oro, enyuñ ekama mme mbutu emi Abasi ọkọnọde mmọ. 3 Mmọ ekekwọ ikwọ Moses isuñutom Abasi, ye ikwọ Eyen Erọñ:

"Ọbọñ Abasi andikpon ñkan, mme edinam Fo ekpon enyuñ eyaña owo ifiọk.

Ọbọñ kpukpru mme idut.

Mme usuñ Fo edi akpanikọ enyuñ enen.

4 Anie edi emi midibakke Fi, Ọbọñ?

Anie edisin ndimenede ubọñ Fo ke enyọñ?

Afo ikpọñ ikpọñ edi edisana.

Kpukpru mme idut eyedi edituak ibuot ke iso Fo,

koro kpukpru owo ekut mme ndinen edinam Fo."

5 Ke emi ama ekebe efep, ami mma ñkut nte Edisana Ebiet Abasi ebererede ana, ye atayat Abasi ke esit.

6 Do ke mme enjel itiaba emi ekekamade mme ndiọi udọñọ itiaba eketo ke Edisana Ebiet ewọñọ, mmọ ekesine nsem nsem mfia mmemmem ọfọñ idem, ndien ebọbọ mbọbọ gold ke ikpanesit mmọ. 7 Ndien kiet ke otu mme odu uwem ñkpọ inañ oro ama ọnọ mme enjel itiaba oro mme bọwut gold itiaba emi ọkọyọhọde ye iyaresit Abasi, emi odude uwem ke nsinsi nsinsi. 8 Nsuñikañ emi otode ubọñ ye odudu Abasi ama akara Edisana Ebiet, ndien owo baba kiet ikekemeke ndiduk ke esit Edisana Ebiet emi tutu utit ndiọi udọñọ itiaba emi mme enjel itiaba oro ekedade edi.