1 Ndien kiet ke otu mme enjel itiaba emi akakamade mme bọwut itiaba ama edi etiene mi onyuñ ọdọhọ ete, "Di, ndien ami ñyewut fi nte edimiade akwa añwan akpara oro ufen, akamba obio oro ebọpde ekpere mme ediwak akpa. 2 Mme mbọñ ererimbot ema enam use ye akwa añwan akpara oro, ndien mme mbon ererimbot ekpaña mmin ke ediñwọñ mmin use esie."

3 Enjel oro ama emen mi ke Spirit aka isọñ utatan. Do ke ami ñkokut eyen añwan emi etiede ke enyọñ ndat ndat idiọk unam emi ekewetde mme enyiñ emi asabarede Abasi eyọhọ enye ke idem; idiọk unam emi ekenyene ibuot itiaba ye mme nnuk duop. 4 Ñwan emi ekesine ọfọñ mmọñ ibọñ ye iduot; ñkpọ mbanaidem esie ekedi gold ye nsọñurua itiat, ye itiat emi ekotde pearl. Enye akakama kọp gold ke ubọk emi ọkọyọhọde ye kpukpru mme mbubiam ñkpọ, emi edide mme mbuñwum use esie.

5 Ema ewet ke ọkpọ iso esie enyiñ emi mmọ miyarakede se ọwọrọde:

Akwa Babilọn

Eka Ofuri mme Akpara

ye mme Anditimede Ererimbot.

6 Ndien ami mma ñkut nte ñwan emi akakpade mmin oto ke ediñwọñ iyip ikọt Abasi, ye iyip mme mmọ oro ekewotde ọkọrọ mmọ ekenamde akpanikọ ye Jisọs. Ke ini Ami ñkokutde enye, idem ama akpa mi eti eti.

7 Ndien enjel ama obup mi ete, "Ntak emi idem akpade fi-e? Ami ñyetiñ nnọ fi mme ndedibe ñkpọ emi abañade ñwan emi ye idiọk unam emi emi enye awatde, oro edi, idiọk unam oro enyenede ibuot itiaba ye nnuk duop. 8 Idiọk unam oro afo okokutde ama odu uwem, edi iduhọ uwem aba; idibighike enye eyewọrọ ke ukpe idak isọñ ndien eyesobo enye. Mme mmọ emi eduñọde ke ererimbot, emi owo mikewetke enyiñ mmọ toto ke editọñọ ererimbot isin ke ñwed uwem eyedu ke ñkpaidem nte mmọ esuk ekutde idiọk unam emi, koro enye ama odu uwem, ndien idahaemi enye iduhọ aba uwem, edi enye eyetọñọ ntak edi."

9 "Emi oyom esit ọniọñ ye eti ibuot. Mme ibuot itiaba oro edi mme obot itiaba, obot emi ñwan oro etiede ke esit. Mmọ ñko edi mme mbọñ itiaba: 10 ition ke otu mmọ ema eduọ, kiet ke odudu ke ukara, ndien akpatre eken idighe kaña; ke ini emi enye edidide, enye edidu ke ata esisit ini. 11 Ndien idiọk unam emi okodude uwem, edi ekem iduhọ aba, ke idem esie edi ọyọhọ ọbọñ itiaita emi edide kiet ye mme mbọñ itiaba eken ndien eyesobo enye." 12 "Mme nnuk duop oro afo okokutde edi mme mbọñ duop emi minyeneke obio ubọñ kaña ndikara ukara, edi eyenọ mmọ odudu ukara ndikara nte mbọñ ye idiọk unam oro ke awa ñkanika kiet. 13 Kpukpru mme mbọñ duop emi enyene uduak kiet, ndien mmọ eyeyak odudu ye ukara mmọ enọ idiọk unam oro. 14 Mmọ eyeñwana ye Eyen Erọñ, edi Eyen Erọñ ye mme mbon mbuọtidem Esie emi Enye okokotde onyuñ emekde eyekan mmọ, koro Enye edide Ọbọñ mme mbọñ ye Edidem mme ndidem."

15 Enjel oro ama ọdọhọ mi ñkọ, ete, "Mme mmọñ oro afo okokutde nte ñwan use oro etiede ke esit, edi mme owo, mme otutu owo, mme idut ye mme usem.

16 Idiọk unam oro ye mme nnuk duop oro afo okokutde, ye idiọk unam, eyesua ñwan use emi; mmọ eyebọ enye kpukpru se enye enyenede enyuñ ekpọñ enye iferi; mmọ eyeta obukidem esie enyuñ efọp enye ke ikañ. 17 Koro Abasi ama esin ke esit mmọ udọñ ndinam uduak Esie, ke edinam ñkpọ ye esit kiet, ye ke edinọ idiọk unam oro odudu ukara mmọ, tutu ikọ Abasi osu. 18 Ñwan oro afo okokutde edi ata akwa obio emi akarade mme mbọñ isọñ."