1 Ami mma mfiak nse, ndien ami ñkut nte Eyen Erọñ adade ke obot Sayọn, mmọ emi ekedude ye Enye ekedi owo tọsin ikie ye aba ye inañ emi ekewetde enyiñ Esie ye eke Ete Esie ke ọkpọ iso mmọ. 2 Ndien ami mma ñkop uyo otode enyọñ emi ekebietde mbufut akpainyañ ye nte obuma asiaha. Uyo emi ami ñkokopde ekebiet ikọ emi mme ebre mbutu ebrede mbutu mmọ.

3 Mme owo tọsin ikie ye aba ye inañ oro ekeda esak iso ese ebekpo, ye mme odu uwem ñkpọ inañ oro, ye mme adaidaha. Mmọ ema ekwọ obufa ikwọ, emi edide mmọ emi ema ekefak esioño ke isọñ ikpọñ ikpọñ ekeme ndikpep, kpa tọsin ikie ye aba ye inañ oro. 4 Mme mmọ emi edi mme mmọ oro ekenimde idem mmọ asana ke nditre ndinyene ebuana ye iban, mmọ ikọdiọñọke iban iferi, mmọ eketiene Eyen Erọñ eka ebiet ekededi emi Enye akade. Ema efak mmọ esio ke otu mme ubon owo eken, ndien mmọ ekedi mme akpa mme mmọ emi ekedade esọk Abasi ye Eyen Erọñ. 5 Nsu ndomokiet iduhe ke inua mmọ; mmọ enana ndo. 6 Ndien mma ñkut enjel efen nte efede ke enyọñ, enye ekenyene eti mbuk uwọrọ ufin ọnọ mme mmọ emi eduñọde ke isọñ, ọnọ kpukpru oruk ye ekpuk, ye usem, ye idut.

7 Enye ama ọdọhọ ke ọkpọsọñ uyo, ete "Ebak Abasi, enyuñ enọ Enye ubọñ, koro ini oro edikem Enye ndikpe ubon owo ikpe. Etuak ibuot enọ Enye emi akanamde enyọñ ye inyañ ibom, ye mme idim mmọñ."

8 Ọyọhọ enjel iba ama etiene akpa oro, onyuñ ọdọhọ ete, "Enye ọduọ! Akwa Babilọn ọduọ! Enye emi ọkọnọde kpukpru owo mmọñ mfri grep esie onyuñ anam mmọ eñwọñ ọkpọsọñ mmin use esie!"

9 Ọyọhọ enjel ita ama etiene mme enjel iba ekeñ, onyuñ ọdọhọ ke ọkpọsọñ uyo ete, "Owo ekededi emi atuakde ibuot ọnọ idiọk unam oro ye mbiet esie emi ebotdebot, onyuñ ọbọde idiọñọ esie ke ọkpọiso mme ke ubọk esie, 10 enye ke idem esie, iditreke ndiñwọñ mmọñ mfri grep Abasi, kpa mmin iyaresit Esie, emi Enye ama akañwaña ọyọhọ ọyọhọ ọdọñ ke kọp iyaresit Esie. Kpukpru mme mmọ emi enamde ntem, eyetuhọde mmọ ke ikañ emi asakde ye itai ke iso mme ndisana enjel ye ke iso Eyen Erọñ. 11 Nsuñikañ ndutuhọ mmọ ọyọdọk ke enyọñ ke nsinsi nsinsi. Nduọkodudu iduhọ ke uwemeyo ye ke okoneyo inọ mme mmọ emi etuakde ibuot enọ idiọk unam oro ye mbiet esie, ye owo kiet ekededi emi enyenede idiọñọ enyiñ esie." 12 Emi oyom ime oto ikọt Abasi, ke ñkañ mme mmọ emi esukde ibuot enọ mme ewuhọ Abasi enyuñ ebuọtde idem ye Jisọs.

13 Do ke ñkokop uyo emi otode enyọñ, ọdọhọ ete, "Wet ete: ọfọfọn ọnọ mme akpaña ñkpa emi ekpañade ke idak edinam ñkpọ nnọ Ọbọñ ọtọñọde ke emi." Spirit ama ọbọrọ ete, "ke akpanikọ edi ntre." "Mmọ eyebọ nduọk odudu eto ke mme ñkpọsọñ utom mmọ, koro mfri utom mmọ etienede mmọ." 14 Ami mma ntọñọ ntak nse, ndien mma ñkut afia enyọñ, ndien anditie ke afia enyọñ emi ekedi odu uwem ñkpọ emi ekebietde Eyen owo, ndien Enye ayara anyanya gold ke ibuot esie onyuñ akama edisọp ikwa ukpok ibokpot ke ubọk esie.

15 Enjel efen ama ọwọrọ ke Edisana Ebiet onyuñ ofiori ke ọkpọsọñ uyo ọnọ enye emi etiede ke afia enyọñ, ete, "Da ikwa ukpok ibokpot nyuñ kpok mbuñwum iñwañ, koro nnen nnen ini edikem, ini idọk ekem ke isọñ." 16 Ndien enye emi eketiede ke afia enyọñ ama ofuñ ikwa idọk esie esin ke isọñ, ndien ema edọk ke isọñ. 17 Ami mma ntọñọ ntak ñkut enjel efen ọwọrọde oto Edisana Ebiet ke enyọñ, enye ñko ama akama edisọp ikwa ukpok ibokpot.

18 Ndien enjel efen, emi edide enye emi esede ñkpọ abaña ikañ, ama oto ke itie uwa ọwọrọ. Enye ama ofiori ke ọkpọsọñ uyo, ọnọ enjel emi akakamade edisọp ikwa ukpok ibokpot, ọdọhọ, ete, "Da ikwa ukpok ibokpot fo kpok mme mfri sokoro ke iñwañ osokoro ke isọñ, koro mme sokoro edat!" 19 Do ke enjel oro akanyan ikwa ukpok ibokpot esie esin ke iso isọñ onyuñ okpok mme sokoro ke eto osokoro, onyuñ atañ mmọ ọdọñ ke itie unyimi osokoro iyaresit Abasi. 20 Ema enyimi sokoro esio ke ñkpọ unyimi sokoro ke edem esa akwa obio, ndien iyip ama ọwọrọ ke ñkpọ unyimi sokoro emi ọfiọrọ nte ukwọ ke itiat ikie iba ke uniọñ onyuñ ọtuñọ ke ñkpọ nte ikpat ition.