1 Wet nọ ufọk Abasi emi odude ke obio Sadis:

"Emi edi etop emi otode Enyemi enyenede mme Spirit Abasi itiaba ye mme ntantaọfiọñ itiaba.

Ami mọdiọñọ se afo akade iso ndinam, Ami mọfiọk nte ke afo ọmọwọrọ etop nte odu uwem ñkpọ, okposuk edi emi afo ama akakpa. 2 Ke ntem demede ke idap, sin odudu ke se afo osuk enyenede, man kpukpru edikpa ama. Koro ami mayarade mfiọk nte ke se afo ama akanam ifọnke kaña ima ke iso Abasi mi. 3 Ti ndien, se ekekpepde fi ye nte afo okokopde enye, suk ibuot nọ enye, nyuñ wọñọde kpọñ mme idiọkñkpọ fo. Edieke afo mudemekede, ami ñyedi ntiene fi nte inọ, ndien afo ududiọñọke idem ini emi ami ndidide.

4 Edi mbufo owo ifañ do ke Sadis emenam mme ọfọñ mbufo esana. Mbufo eyesine mfia ọfọñ esaña ye Ami, koro mbufo emedot ndinam ntre. 5 Owo emi akande eyesine enye afia ọfọñ nte mme mmọ emi, ndien ami ndisioho enyiñ esie mfep ke ñwed uwem. Ke iso Ete mi ye ke iso mme enjel Esie ami ñyeyarade añwa añwa nte ke enye edi okim.

6 Enye emi enyenede utọñ, yak enye okop se Spirit ọdọhọde mme ufọk Abasi."

7 Wet nọ enjel ufọk Abasi ke Filadelfia:

Emi edi etop emi otode Enyemi edide Edisana ye anam akpanikọ, emi akamade ukpọhọde emi ekenyenede Defid, emi ọkpọhọrede nte owo efen ndomokiet mikemeke ndikọbi, onyuñ ọkọbi nte owo ndomokiet mikemeke ndikpọhọde.

8 "Ami mọdiọñọ se afo anamde; Ami mọdiọñọ nte ke afo emenyene esisit odudu; afo emetiene ukpepñkpọ Mi, onyuñ anam akpanikọ ye Ami. Ami meberede usuñ nnim iñwañ ke iso fo, emi owo baba kiet mikemeke ndiberi.

9 Ama edi mme ñka oro emi edide inyene Setan, mme mbon nsu oro edọhọde ete ke mmimọ idi mme Ju, edi mmọ idighe, Ami ñyenam mmọ ewọñọ edi edituak ibuot ke ukot fo. Mmọ kpukpru eyediọñọ ete ke Ami mme ma fi.

10 Koro afo ama enim uyo mi ke ndinyene ime, ami ñko ñyedip fi ke ini afanikọñ emi edidide itiene ofuri ererimbot, man edomo kpukpru owo emi eduñọde ke isọñ. 11 Ami ke ndi idibighike. Tim se afo enyenede nim, man owo ndomokiet ediyip anyanya fo, emi edide enọ edikan fo.

12 Ami ñyenam enye emi akande edi obubọk kiet ke Edisana Ebiet Abasi mi, ndien enye idiwọrọke aba ikpọñ do. Ami ñyewet enyiñ Abasi mi ke idem esie ye enyiñ akwa obio Abasi mi, obufa Jerusalem, emi edisuhọrede ito enyọñ ke ubọk Abasi mi, Ami ñko ñyewet enye obufa enyiñ mi ke idem."

13 Enye emi enyenede utọñ, yak enye okop se Spirit ọdọhọde mme ufọk Abasi.

14 "Wet nọ enjel ufọk Abasi emi odude ke obio Laodisia:

Emi edi etop emi Enyemi ekotde Amen, anam akpanikọ ye etie ntiense akpanikọ, emi edide ntọñọ kpukpru mme ñkpọ emi Abasi okobotde.

15 Ami mọdiọñọ se afo ama akananam, Ami mọdiọñọ nte ke afo ubitke unyuñ ufiopke. Edi udọñ mi nte afo akpakam edi kiet mme eken. 16 Edi ke ntak emi afo edide ndebe, ufiopke unyuñ ubitke, ami ñyekpọhi fi nsio ke inua mi!

17 Afo ọdọhọ ete, ‘Ami moforo, ñnyuñ nnanake ñkpọ, ami menyene kpukpru se ami ñyoyom.’ Edi afo udiọñọke nte afo enyenede mbọm eketre! Afo edi ubuene, edi iferi ye nnan.

18 Ami nnọ fi item ndien nte yak edep ata gold oto mi, man oto do afo edi enyene inyene. Nyuñ dep afia edisine ñkpọ ñko da fuk ifere fo emi enyenede but. Dep ñko ibọk ndisin ke enyin fo, man otodo afo okut usuñ. 19 Ami nsua nnọ ñnyuñ ntunọ kpukpru mme mmọ emi ami mmade. Ke ntre nyene iwuk, nyuñ kabade esit kpọñ mme idiọkñkpọ fo.

20 Kpañ utọñ! Ami nda ke usuñ ñnyuñ ñkọñ. Edieke owo ndomokiet okopde uyo mi onyuñ ebererede usuñ, Ami ñyeduk ntiene enye ñnyuñ ndia ñkpọ ye enye, ndien enye ñko eyedia ñkpọ ye Ami. 21 Mme mmọ emi ekande ke Ami ndinọ unen nditie ke ñkañ Mi ke ebekpo Mi, kpa nte Ami ma ñkakan, ndien idahaemi ntie ke ñkañ Ete mi ke ebekpo Esie. 22 Enye emi enyenede utọñ yak enye okop se Spirit ọdọhọde mme ufọk Abasi."