1 Ke emi ama ekebe ami mma ntọñọ ntak ñkut enjel efen nte ọsuhọrede oto enyọñ. Enye ama enyene akwa odudu, ndien uyai esie ama esin uñwana ke ofuri isọñ.

2 Enye ama ofiori ke ọkpọsọñ uyo ete:

"Enye ọduọ! Akwa Babilọn ọduọ!

Enye eyedi ebiet iduñ mme dimọn

ye kpukpru mme ndedehe spirit,

ebiet iduñ mme ndedehe inuen

ebiet iduñ mme ndedehe mbubiam unam.

3 Koro enye ama ọnọ kpukpru mme idut mmin esie

onyuñ anam mmọ eñwọñ ọkpọsọñ mmin idiọk udọñ use esie.

Mme mbọñ ererimbot ema enam use ye enye,

ndien mme mbio mbubehe ererimbot ema eforo eto ke idiọk

udọñ esie emi owo mikemeke ndibiọñọ."

4 Do ke ñkokop uyo efen otode enyọñ, ọdọhọ ete,

"Ewọñọ ikọt mi! Ewọñọ ekpọñ enye!

Mbufo ekubuana ke mme idiọkñkpọ esie,

mbufo ekubuana ke mme ufen esie!

5 Koro mme idiọkñkpọ esie

eboho ekoñ ebine ikpaenyọñ,

ndien Abasi eti mme oburobut usuñ esie.

6 Enam ñkpọ ye enye ukem ukem

nte enye akanamde ñkpọ ye mbufo;

enọ enye utib utim ikaba nte enye akanamde.

Esin kọp esie ọyọhọ ye ediñwọñ ñkpọ

emi ọsọñde utim ikaba akan enye emi enye akabuakde ọnọ mbufo.

7 Enọ enye ndutuhọ ye ukut nte ekekeme nte okponde akada ukem ukem

ye ubọñ ye eduek emi enye ọkọnọde idem esie.

Koro enye okosuk ọdọhọde idem esie, ete:

Ami ntie mi nte ñwan ọbọñ.

Ami ndighe ebeakpa, ami ndikwe ukut.

8 Ke ntak emi mme idiọk udọñọ esie eyesim enye ke usen kiet,

mme ndiọi udọñọ, ukut, ye akañ.

Ndien eyefọp enye ke ikañ, koro Abasi emi ekpede ikpe esie edi andikoñ ñkan."

9 Mme mbọñ ererimbot emi ekebuanade ke use esie eyetua eyet enyuñ efuhọ ebaña akwa obio oro, kadaña emi mmọ ekutde nsuñikañ esie. 10 Mmọ eda anyan ebiet ko, koro mmọ ekopde ndik ebaña ufen esie, ndien edọhọ, ete, "Nso enyene ndik ñkpọ idi emi! Nso ñkpọ ñkpeñenyeñ edi emi! Akwa okop odudu obio Babilọn! Ke ñkpasip awa ñkanika kiet nsobo fo edisim!"

11 Mme anam rnbubehe ererimbot enyuñ etua ñko enyuñ efuhọ ebaña enye, koro owo baba kiet idepke ñkpọ urua mmọ aba; 12 owo baba kiet idepke gold, sidibe, nsọñurua itiat ye mme pearl; mme mmemmem ọfọñ mmọ, ọfọñ mmọñ ibọñ mmọ, ñkisi ye eyibe mmọ, kpukpru mme esen eto, ye kpukpru se edade nnuk enen enam, ye mme nsọñurua eto, mme ñkpọ okpoho, ye eke ukwak, ye eke itiat mbat emi esemdesem, 13 ye mme eto sinamọn, mme ikọ, mme enem ufuọñ ñkpọ, mir ye frankinsen, mmin ye aran, ndom unam uyo ye ibokpot, enañ ye erọñ, mme enañ mbakara ye mme ukpatñkpọ, ye idem mme ukpọñ owo enyamde nte mme ifin.

14 Mme anam mbubehe edọhọ enye ete, "Kpukpru mme mfri nti ñkpọ uwem emi afo ọkọdọrọde itọñ ndinyene esomo, ndien kpukpru mme inyene fo ye ñkohodeidem ebe efep, ndien afo udukwe mmọ aba.

15 Mme anam mbubehe emi ekeforode eto ke edinam mbubehe ke akwa obio oro, eyeda ke ata anyan ebiet ko, koro ndik anamde mmọ kabaña ndutuhọ esie. Mmọ eyetua enyuñ efuhọ." 16 Ndien edọhọ ete,

"Nso enyene ndik ñkpọ edi emi!

Nso ñkpọ ndik idi emi ye akwa obio emi!

enye esidiọñ idem esie ye mmemmem ọfọñ,

ye ọfọñ awa mmọñ ibọñ, ye iduot,

ndien enye ọdiọñ idem esie ke ñkpọ mma idem mireñ mireñ gold,

nsọñurua itiat ye mme pearl.

17 Ndien ke awa ñkanika kiet enye ọduọk kpukpru mme inyene emi!"

Kpukpru mme etie etak ubom nsuñikañ ye mme mmọ emi esinede ke esit, mme anam utom nsuñikañ, ye mme mmọ eken ediade ñkpọ eto akwa akpainyañ, eda ko nsan nsan. 18 Ndien etua efiori nte mmọ ekekutde nsuñikañ ntaikañ esie, ete, Akananam akwa obio ndomokiet itiehe nte akwa obio enye emi! 19 Mmọ eyeduọk ntọñ ke ibuot mmọ, mmọ eyetua enyuñ efuhọ, enyuñ edọhọ ete

"Mbọm! Mbọm! Nso enyene ndik ñkpọ isim akwa obio emi ntem,

mmọ kpukpru mme enyene nsuñikañ emi ewatde ke akwa akpainyañ

ekeforode eto inyene esie.

Ndien ke awa ñkanika kiet enye akabade edi obio nsobo."

20 Edat esit, O enyọñ, ke ntak nsobo esie.

Edat esit, mbufo ikọt Abasi,

Edat esit mme Ọbọsuru ye mme Asiak Uduak Abasi.

Koro Abasi ebiere ikpe esie

kabaña se enye akanamde mbufo.

21 Do ke ata okop odudu enjel kiet ekemen itiat kiet emi okokponde nte itiat ukọk ibokpot otop esin ke akwa akpainyañ, onyuñ ọdọhọ ete,

"Ntem ke editop

akwa obio Babilọn iduọk ye afai,

ndien owo idikwe enye aba.

22 Mme uyo mbutu ye eke mme ebre unek,

ye eke mme ofuri ifiom, ye obukpoñ,

owo idikopke ito fi aba.

Owo idikwe anam ubọk utom

ndomokiet ke esit fo aba;

owo idikopke aba

uyo ukọk ibokpot.

23 Owo idikwe uñwana

utueneikañ ke esit fo aba.

Owo idikopke aba

uyo ebe ndọ ye ñwan ndọ.

Mme anyam urua fo ekewọrọ etop ekan ke ofuri iso isọñ,

ndien afo ama ada nsu nsu idiọñọ fo

abiaña kpukpru owo ke ererimbot.

24 Ekemia Babilọn ufen

koro ekekutde iyip mme Asiak uduak Abasi

ye eke mme ikọ Abasi ke esit akwa obio emi;

Ih, iyip kpukpru mme mmọ emi

ekewotde ke iso isọñ."