1 Ke emi ama ekebe ami mma ñkut mme enjel inañ nte edade ke ituñ ererimbot mbinañ, eberi mme ofum ke mme ituñ mbinañ ererimbot, man ofum edifume ke iso isọñ, ke inyañ, mme ke eto ndomokiet. 2 Ndien ami mma ñkut enjel efen nte otode ke usiahautin edi ye idiọñọ odu uwem Abasi. Enye ama okot mme enjel inañ emi Abasi ọkọnọde odudu ndibiat isọñ ye akpainyañ ke ọkpọsọñ uyo. 3 Enjel oro ama ọdọhọ ete, "kubiat isọñ, ye akpainyañ mme mme eto, tutu ñnyin inim mme isuñutom Abasi idiọñọ ke ọkpọiso mmọ."

4 Ndien ema etiñ enọ mi ibat mme mmọ emi ekenimde mmọ idiọñọ Abasi ke ọkpọiso mmọ ekedi tọsin ikie ye aba ye inañ (144,000), emi etode ke esien Isrel kiet kiet. 5 Tọsin duopeba okoto ekpuk Juda emi ekenimde idiọñọ; tọsin duopeba eto ke ekpuk Ruben, tọsin duopeba eto ke ekpuk Gad, 6 tọsin duopeba ke ekpuk Asa, tọsin duopeba ke ekpuk Naftali, tọsin duopeba ke ekpuk Manase, 7 tọsin duopeba eto ke ekpuk Simiọn, tọsin duopeba eto ke ekpuk Lefai, tọsin duopeba eto ke ekpuk Isaka, 8 tọsin duopeba ke ekpuk Sebulọn, tọsin duopeba ke ekpuk Josef, ye tọsin duopeba ke ekpuk Benjamin.

9 Ke emi ama ekebe, ami mma nse, ñnyuñ ñkut ata akamba otu owo, owo baba kiet ikekemeke ndibat kpukpru mme owo oro! Mmọ eketo ke kpukpru oruk, ekpuk, idut ye usem, ndien mmọ ekeda ke iso ebekpo ye ke iso Eyen Erọñ esine mfia ewura, enyuñ ekama ndak eyop ke ubọk mmọ. 10 Mmọ ema efiori ke ọkpọsọñ uyo ete, "Ubọhọ ñnyin oto Abasi ñnyin, emi etiede ke ebekpo, ye Eyen Erọñ."

11 Kpukpru mme enjel ema eda ekanade ebekpo, ye mme adaidaha, ye mme odu uwem ñkpọ inañ oro. Ndien mmọ eduọñọ ekibi iso mmọ ke isọñ ke iso ebekpo enyuñ etuak ibuot enọ Abasi, 12 enyuñ edọhọ ete, "Amen! Itoro, ubọñ, ifiọk, ekọm, ukpono, odudu ye edikan enyene Abasi ñnyin ke nsinsi nsinsi! Amen!"

13 Kiet ke otu mme adaidaha ama obup mi, ete, "mme anie edi mme mmọ emi esinede mfia ewura, mmọ ekenyuñ eto mmọñ edi?"

14 "Ami mma mbọrọ nte, ete, ami ndiọñọke, edi afo ọmọdiọñọ." Do ndien ke enye ọkọdọhọ mi, ete,

"Mme mmọ emi edi mme mmọ oro eketode ke akwa ukut ewọñọ. Mmọ ema eyet mme ewura mmọ enyuñ enam mmọ efia ke iyip Eyen Erọñ. 15 Ntak edi oro,

mmọ edade ke iso ebekpo Abasi,

enyuñ enam ñkpọ enọ Enye uwemeyo ye okoneyo ke Edisana ebiet Esie.

Enyemi etiede

ke ebekpo eyekpeme mmọ ke iso Esie.

16 Mmọ idikopke aba biọñ ye nsatitọñ.

Eyo mme ufiop kiet ekededi idifọpke mmọ.

17 Koro Eyen Erọñ emi odude ke ufọt ebekpo

eyedi ekpeme erọñ mmọ;

ndien Enye eyeda mmọ usuñ ekesim idim mmọñ uwem.

Ndien Abasi eyekwọhọde kpukpru mmọñ eyet ke enyin mmọ efep."