Mbuọtidem Ye Utom
14 Nditọ ete mi, nso ufọn idu ke owo ndidọhọ ete, "Ami menyene mbuọtidem," edieke edinam esie misọñọke ikọ esie? Nte utọ mbuọtidem emi ekeme ndinyaña enye? 15 Edieke nditọ ete iren ye iban edude emi enanade ọfọñ idem, ye se ediade, 16 nso ufọn idu ke afo ndidọhọ mmọ ete, "Abasi ọdiọñ mbufo, ekop ufiop enyuñ edia ñkpọ eyuhọ," edieke afo munọhọ mmọ se inanade mmọ ke uwem?
17 Kpa ntre ke edi ye mbuọtidem, edieke mbuọtidem adade ikpọñ ndien inyeneke utom idian do, akpa.
18 Edi owo eyedọhọ ete "Owo kiet enyene mbuọtidem, enye eken enyene utom!" Ibọrọ edi, "Wut mi nte owo ndomokiet ekemede ndinyene mbuọtidem emi misañake ye utom ami ñyewut fi mbuọtidem mi nto ke utom mi."
19 Nte afo emenim ke akpanikọ nte ke Abasi kiet odu? Ọfọn eti eti. Mme idiọk spirit enim ke akpanikọ enyuñ enyek ye ndik. 20 Afo owo ndisime, nte afo oyom ewut fi ete ke mbuọtidem emi misañake ye utom iwọrọke ñkpọ?
21 Ekenam ete ñnyin Ebraham enen iso ye Abasi didie? Okoto ke ntak utom esie, ke ini enye akawade Aisik eyen esie ke itie uwa. 22 Nte afo ekemede ndikut mbuọtidem ye utom esie ekenam utom ọtọ kiet; mme utom esie ekenam mbuọtidem esie ọfọn ama. 23 Ndien ikọ Abasi akabade edi akpanikọ emi ọdọhọde ete, "Ebraham ama enim Abasi ke akpanikọ, ndien ke ntak mbuọtidem esie Abasi ama ada enye nte Edinen owo." Ndien ke ntre, ema ekot Ebraham ufan Abasi. 24 Afo emekeme ndikut ndien ete, ke owo edinen ke iso Abasi oto ke se enye anamde, idighe ke ntak mbuọtidem esie ikpọñ ikpọñ.
25 Ekedi kpa ntre ye ñwan akpara oro, Rehab. Enye ekenen iso ye Abasi oto ke utom esie, ke emi enye akadarade onyuñ edipde mme mbio uyep mme Ju, onyuñ añwam mmọ ke ndinam mmọ esaña ke usuñ efen eñyọñọ. 26 Kpa nte ikpọkidem emi minyeneke spirit akpade, ntre ñko, ke mbuọtidem emi minyeneke utom akpa.