1 Nditọ ete mi, ikpanaha ediwak mbufo edi mme andikpep, koro mbufo emefiọk ete ke edikpe ikpe ñnyin mme andikpep ye ọkpọsọñ ntiñ enyin akan eke mme mmọ eken. 2 Ñnyin kpukpru inanam mme ndudue. Edi owo ekededi emi minamke ndudue ke ikọ inua esie ọfọn ama, onyuñ ekeme ndikara ofuri idem esie. 3 Ñnyin isin ñkpaha ke inua enañ mbakara, man enye osuk idem ọnọ ñnyin, man ikeme ndinam enye aka usuñ emi ñnyin iyomde. 4 Kere baña ubom nsuñikañ, nte enye okponde, ndien ọkpọsọñ ofum onyuñ awatde enye, ekeme ndibọi enye nto ata ekpri ubọi; ndien enye aka ebiet emi andiwat oyomde enye aka.

5 Ntre ñko ke edi ye edeme: ekpri ñkpọ nte enye, edi enye ekeme ndinam inua mbaña ikpọ ñkpọ. Ndien kere nte ekpri esisit edeme ikañ ekemede ndita ata akamba ikọt. 6 Ndien, edeme ebiet ikañ. Enye ke otu mme ndido idem ñnyin, ọyọhọ ye mme oburobut ñkpọ. Enye abiat ofuri idem owo, esin ikañ ke ofuri afañ uwem ñnyin, oto ke ikañ emi otode akwa ukpe ikañ oduk enye idem.

7 Owo ekeme ndikara, onyuñ akakara kpukpru mme ñkpọ eken emi Abasi obotde, mme unam ikọt ye mme inuen, mme urukikọt ye iyak. 8 Edi owo baba kiet akananam ikemeke ndikara edeme. Enye edi oburobut ñkpọ emi owo mikemeke ndikara, onyuñ ọyọhọ ye se ikemede ndibiat uwem owo. 9 Ñnyin ida enye inọ Ọbọñ ye Ete ñnyin ekọm, inyuñ ida enye isuñi eke ñnyin owo emi ekebotde ke mbiet Abasi. 10 Mme ikọ ekọm ye eke isuñi ewọñọ kpa ke inua kiet oro. Nditọ ete mi, ikpinaha edi ntre. 11 Idim mmọñ ndomokiet isioho inem ye ndot ndot mmọñ ke iso idim kiet. 12 Nditọ ete mi, eto udari ikemeke ndiñwum sokoro, eto sokoro ikemeke ndiñwum udari, mme akpa mmọñ inuñ ndikeme ndisio inem mmọñ.

13 Nte owo ndomokiet odu ke otu mbufo emi edide enyene ibuot owo onyuñ ọfiọkde ñkpọ? Enye enyene ndiyarade emi ñwut nto ke eti ido uwem esie, ye ke nti utom emi enye anamde ke nsuhọde idem ye eti ibuot. 14 Edi edieke mbufo enyenede ufup, idiọkesit, ye ekikere ufọn idem mbufo, ke esit mbufo, mbufo inyeneke nditaña ase, ñnyuñ nsu nsu ndian akpanikọ. 15 Uduot ifiọk emi itoho enyọñ, oto ererimbot; idighe se sibirit ọnọde, edi ubọk utom mme ndiọi ekpo. 16 Ebiet ekededi emi ufup ye efam odude, do ke ndutime ye kpukpru etime etime ido odu.

17 Edi ifiọk emi otode enyọñ edi edisana, ke akpa itie; enye asaña ye emem, edi ifure ifure, onyuñ edi ufan ufan; enye ọyọhọ ye mbọm onyuñ osioño mbuñwum nti utom; ñkari ye ufik iduhọ ke esit. 18 Ndien eti ido edi mbuñwum emi mme anam emem edọkde eto ñkpasip emi etọde ke emem.