1 Ñwed emi oto Jems isuñutom Abasi ye eke Ọbọñ Jisọs Kraist: Nnọ ekọm esọk kpukpru ikọt Abasi emi esuanade eyọhọ ke ofuri ererimbot.

2 Mme nditọ ete mi, ekut idem mbufo nte mbon mfọniso ke ini emi mme nsio nsio idomo esimde mbufo, 3 koro mbufo emedioño ete edieke mbuọtidem mbufo akande ke mme ini idomo emi, eyenọ mbufo ukeme ndiyọ kpukpru ñkpọ. 4 Enyene ndikut ete ke ediyọ mbufo ada mbufo ekesim utit, ikpuhu, man otodo mbufo ekeme ndifọn mma enyuñ ekem mben, inanake baba ñkpọ ndomokiet.

5 Edi edieke owo mbufo ndomokiet ananade ifiọk, yak enye ọbọñ akam ebeñe Abasi emi edinọde enye. Koro Abasi ọnọde kpukpru owo ke ntat ubọk inyuñ ifarake ubọk. 6 Edi mbufo enyene ndinim ke akpanikọ ke ini mbufo ebọñde akam inyuñ iyikke ke baba usuñ kiet. Owo ekededi emi eyikde etie nte mbufit akpainyañ emi ofum eberide ọnọ iso ye edem. 7 Utọ owo oro edi owo mbubik emi minyeneke iwuk ke kpukpru se enye anamde ndien enye inyeneke ndikere ete ke imọ iyebọ ñkpọ ndomokiet ke ubọk ọbọñ; 8 enye edi owo emi enyenede esit iba emi minyeneke iwuk ke kpukpru se enye anamde.

9 Eyen ete emi edide ubuene ekpenyene ndidara ke ini Abasi emenerede enye ke enyọñ. 10 Kpa ye eyen ete emi edide imọ, enyene ndidara ke ini Abasi ọsuhọrede enye. Koro owo inyene eyebe efep nte ndiye ikọñ eto emi midighe owo ọtọ. 11 Ndien eyo asiaha ye ọkpọsọñ ufiop onyuñ ọfọp eto emi, ndien mme ikọñ esie ekeñe, ndien uyai esie abiara. Ke ukem usuñ emi ke edibiat owo inyene kpa ke idem ini emi enye osuk akade iso ndinam mme mbubehe esie.

12 Ọfọfọn ọnọ owo emi akade iso ndinam akpanikọ ke idak idomo, koro ke enye ama akakan ke ndibe ke idomo emi, enye eyebọ uwem emi Abasi ọkọñwọñọde ọnọ mme mmọ emi emade Enye, nte ñkpọ eyen utom. 13 Edieke idomo esimde owo ke utọ usuñ emi, enye okudọhọ ete, "Idomo enyemi oto Abasi". Koro idiọk ikemeke ndidomo Abasi, mme Abasi ndidomo owo ndomokiet idomo. 14 Edi owo ọduọ oduk idomo kadaña emi mme idiọk udọñ esie eduride enye esin ke afia. 15 Ndien mme idiọk udọñ esie eyomo, ndien eman idiọkñkpọ; ndien ke ini idiọkñkpọ ama ọkọkọri okpon enye aman ñkpa. 16 Ekuyak owo abiaña mbufo, nditọ ete mi!

17 Kpukpru nti enọ ye kpukpru se ifọnde ima eto ke Obio Ubọñ Abasi; oto Abasi, emi okobotde mme uñwana emi odude ke enyọñ. Enye ke idem Esie ikpuhọkede, mme ndikabade ntie nte mbukpọñ ñkpọ. 18 Ke uduak esit Esie ke Enye akanam ñnyin idu uwem oto ke ikọ akpanikọ, man otodo ñnyin ikpada akpa itie ke otu kpukpru se Enye okobotde.

19 Eti emi nditọ ete mi, ete ke kpukpru owo ekpenyene ndisọp ndikpañ utọñ, edi isọpke nditiñ ikọ, inyuñ isọpke ndiyat esit. 20 Iyaresit owo inamke uduak Abasi osu.

21 Ediañade idem mbufo ndien ekpọñ kpukpru mbubiam ido, ye kpukpru oburobut ido uwem. Esuk idem enọ Abasi, enyuñ enyime ikọ emi enye ọtọde ke esit mbufo, emi ekemede ndinyaña mbufo.

22 Ekubiaña idem mbufo ke ndikpañ utọñ ke ikọ Esie ikpọñ. Utu koro ekam eda ikọ esin ke edinam. 23 Owo ekededi emi akpañde utọñ ọnọ ikọ ndien idaha isin ke edinam, ebiet owo emi esede iso esie ke ukutiso ndien okutidem esie nte enye etiede. 24 Enye etim ese idem esie onyuñ adaha, kpa ndo ndo oro enye efre nte enye eketiede. 25 Edi owo ekededi emi osukde enyin esie ese mfọnmma ibet emi ọkpọkde mme owo ayak, onyuñ akade iso ndikpeme enye; idighe enye emi okopde ndien efre, edi enye ada esin ke edinam, utọ owo oro ke Abasi edidiọñ ke kpukpru se enye ananam.

26 Edieke owo ekededi ekerede ete ke imọ idi owo Abasi, edi enye ikarake edeme esie, enye ababiaña idem esie, ndien ido ukpono esie ọwọrọ ikpuikpu. 27 Ido ukpono emi Abasi Ete ñnyin enyimede nte edisana ye emi minyeneke ndo edi emi: ndise ñkpọ mbaña nditọ akpa, mme ebekpa ke itie ukut mmọ, ye owo nditre ndida idem esie nsin asuaha ke ererimbot.