1 Eka iso ndima kiet eken nte nditọ ete ke Kraist. 2 Enyuñ eti ndidara mme isenowo ke ufọk mbufo. Ama enyene mme mmọ emi ekenamde ntem, ndien mmọ ema edara mme enjel ke ini mmọ mikọdiọñọke ite ke mmọ ekedi mme enjel. 3 Eti mme mmọ oro edude ke ufọk ñkpọkọbi, nte mbufo nde edu do ke ufọk ñkpọkọbi ye mmọ. Eti mme mmọ oro ekutde ukut, nte mbufo ekut ukut nde ye mmọ.

4 Ana kpukpru owo ekpono ndọ, ndien mme ebe ye mme iban enyene ndinam akpanikọ ye idem mmọ. Abasi eyekpe mme anam use ikpe ye mme mmọ emi esinde efibe.

5 Edianarede uwem mbufo ekpọñ ima okuk, enyuñ eyuhọ ke se mbufo enyenede. Koro Abasi ama ọdọhọ, ete, "Ami ndikpọñke mbufo, Ami ndisanake mbufo ñyak". 6 Eyak ñnyin isọñ esit ndien, inyuñ idọhọ, ite, "Ọbọñ edi andinyaña mi, ami ndifeheke ndik, owo ekeme ndinam mi nso?"

7 Eti mme adausuñ mbufo, emi eketiñde ikọ Abasi enọ mbufo. Kere baña nte mmọ ekedude uwem enyuñ ekpa, ndien ekpebe mbuọtidem mmọ.

8 Jisọs Kraist edi ukem ukem ñkpọñ, mfin, ye ke nsinsi. 9 Ekuyak mme nsio nsio esen ukpep ada mbufo awaha ọkpọñ nnen nnen usuñ. Ọfọn ndibọ nsọñidem ko ke esit ñnyin oto ke mfọn Abasi, idighe ke ndisuk ibuot nnọ ibet udia udia; mme mmọ emi ekesukde ibuot enọ mme ibet emi ikenyeneke ufọn ndomokiet.

10 Mme oku emi ekesinamde ñkpọ ke atayat mme Ju, inyeneke unen ndidia mme ñkpọ uwa ke itie uwa uwa ñnyin. 11 Akwa oku mme Ju ada iyip ufene oduk ke Ata Edisana Ebiet ndiwa nnọ idiọkñkpọ, edi efọp okpo mme ufene oro ke añwa ke ebiet emi ọkpọñde itie mme owo eduñọde. 12 Ke ntak emi, Jisọs akakpa ñko ke añwa emi ọkpọñde inua otop akwa obio, man otodo Enye anam mme owo esana, ekpọñ mme idiọkñkpọ oto ke iyip Esie.

13 Eyak ñnyin ndien ika itiene Enye ke edem esa obio ikabuana ke but Esie. 14 Koro akwa obio emi ididuñde ke nsinsi iduhọ mi ke isọñ; ñnyin idori enyin ibaña akwa obio emi edidide.

15 Eyak ñnyin ndien inọ Abasi itoro kpukpru ini, nte uwa ñnyin emi ibede ke Jisọs inọ Enye, emi edi uwa ñkpọkinua ñnyin emi ayararede enyiñ Esie. 16 Ekufre ndinam nti ñkpọ ye ndiñwam kiet eken, koro emi edi mme uwa emi enemde Abasi esit. 17 Esuk ibuot enọ mme adausuñ mbufo, etiene mme ewuhọ mmọ. Mmọ ekpeme ukpọñ mbufo, inyeneke nduọk odudu, sia edi mmọ edinam ibat ke iso Abasi ibaña mme utom mmọ. Edieke mbufo esukde ibuot enọ mmọ, mmọ eyenam utom mmọ ke inemesit, ke midighe ntre, mmọ edinam utom mmọ ke mfuhọ, ndien emi ididaha uñwam ndomokiet isọk mbufo. 18 Ekaka iso ndibọñ akam mbaña ñnyin. Ñnyin imetim ifiọk ite ke ñnyin inyene iñwañ iñwañ esit, koro ñnyin iyomde ndinam se inende kpukpru ini. 19 Ndien ami ñkọkọrọ ñkpe mbufo ubọk ndibọñ akam nte yak Abasi ọtọñọ ntak ada mi afiak ọsọk mbufo ke ini midibighike.

20 Ke emi yak Abasi emem, emi okotode ke iyip nsinsi ediomi Enye afiak ada Ọbọñ Jisọs ke ñkpa edi ke uwem, Akwa andikpeme erọñ oro, 21 ọbọp mbufo mbọbọ ye kpukpru se ifọnde man enam uduak Esie, ndien yak enem Enye ndinam utom Esie ke otu ñnyin nte enemde Enye esit, ke ntak Jisọs Kraist, emi ubọñ enyenede Enye ke nsinsi nsinsi. Amen.

22 Mekpe mbufo ubọk mme nditọ ete mi, nte yak ekpañ utọñ enọ etop nsọñidem emi ke ime, koro ñwed emi ñwetde mbufo emi iniọñke ikaha. 23 Ñyom mbufo ediọñọ ete, ke ema esio eyen eka ñnyin Timoti ke ufọk ñkpọkọbi. Edieke enye editode idisim ke eti ini, ami ñyesaña ye enye ke ini ami ndidide ndikut mbufo. 24 Enọ kpukpru mme ada usuñ mbufo ye kpukpru ikọt Abasi ekọm mi. Mme nditọ ete ke Itali enọ ekọm esọk mbufo. 25 Yak mfọn Abasi odu ye mbufo kpukpru.