1 Akpa ediomi ama enyene mme mbet ukpono ye ebiet owo anamde enim ọnọ ukpono Abasi. 2 Ema ebọp atayat añwa añwa emi ekekotde Edisana Ebiet. Do ke esit, utueneikañ, okpokoro, ye uyo emi ewade enọ Abasi ema edu. 3 Ke edem udiana ikpehe, atayat emi ekekotde Ata Edisana Ebiet ama odu. 4 Do ke itie ufọp uwa gold emi edade efọp mme enem ufuọñ ñkpọ ama odu, ye ekebe ediomi emi efukde ke gold. Ekebe emi ama esine Omuk eke gold emi manna esinede ke esit, esañ Erọn emi akasiahade ikọñ, ye mme itiat iba emi ekewetde mme ibet ke esit. 5 Ke ibuot ekebe emi ke mme utibe odu uwem ñkpọ ekedu emi edade enọ iso Abasi, ye mme mba mmọ nte etatde efuk ebiet emi ekefende mme idiọkñkpọ. Edi idighe idahaemi ke enyene ndinam kpukpru ñkpọ añwaña.

6 Ntem ke ekebon mme ñkpọ oro. Mme oku eduk ke atayat añwa kpukpru usen ndinam mme utom mmọ. 7 Edi Akwa Oku ikpọñ oduk aka ke atayat emi esinede ke esit esit, ndien enye anam emi inikiet kpọt ke isua. Enye akama iyip emi enye awade ọnọ Abasi kabaña idem esie ye kabaña mme idiọkñkpọ emi mme owo ekenamde ke unana edifiọk nte ke idiọkñkpọ ke mmimọ ikanam.

8 Edisana Spirit ada mme ubon ñkpọ emi ekpep ñnyin añwaña nte ke usuñ emi esañade eduk Nsanañkan Ebiet iberekede kaña, nte ededi emi atayat añwa osuk adade.

9 Emi edi ndomo ñkpọ emi abañade eyo emi. Emi owut ete ke mme uwa ufene, ye mme enọ eken, emi ekewade enọ Abasi ikemeke ndinam esit mme okpono Abasi ọfọn ama. 10 Mmọ enyene ñkpọ ndinam ye udia, ediñwọñ ñkpọ, ye mme nsio nsio ido unam idem asana. Kpukpru emi edi enyọñ enyọñ ibet emi enyenede ndida tutu Abasi ọkpuhọde kpukpru ñkpọ.

11 Edi Kraist ededi ama nte Ñkoññkan Oku nti ñkpọ emi ama okododu mi ye ñnyin, Atayat emi Enye anamde ñkpọ ke esit okpon akan onyuñ ọfọn akan, idighe enye emi ubọk owo anamde, oro edi ntem, Enye idighe kiet ye ererimbot emi ebotde bot mi. 12 Ke ini Kraist ekebede ke atayat ndien oduk ini kiet ye ofuri ofuri ekesim ata Nsanañkan Ebiet, Enye ikadaha iyip ebot mme eke eyen enañ ndida nnam uwa, edi Enye akakam ada iyip Esie ọkọbọ nsinsi uwem ọnọ ñnyin.

13 Esida iyip ebot ye eke enañ ye ntọñ emi otode ke ayara enañ emi ema ekefọp esime eduọk mme mmọ emi ibet ukpono owutde nte ke mmọ edehe, enyuñ enam mmọ esana ke mme mbiara mmọ emi ido ukpono ayararede. 14 Sia enye emi edide akpanikọ, adaña didie ke Iyip Kraist anam ikpọ ñkpọ ọnọ ñnyin! Okoto ke Spirit Abasi emi odude uwem ke nsinsi ke Enye akawa idem Esie nte uwa emi ọfọnde ama ọnọ Abasi. Iyip Esie eyenam ekikere esit ñnyin asana ọkpọñ mme mbiara utom, man otodo ñnyin inam ñkpọ inọ odu uwem Abasi. 15 Ke ntak emi, Kraist edi Enyemi eketimde obufa ediomi, man otodo mme mmọ emi Abasi okokotde ekpebọ nsinsi edidiọñ emi Abasi ọkọñwọñọde. Ekeme ndinam emi koro ama enyene ñkpa emi akatatde mme owo ayak ke mme idiọkñkpọ emi mmọ ekenamde ke ini emi mmọ ekedude ke idak akpa ediomi.

16 Ebiet ekededi emi ñwed ediomi odude, enyene ndiyarade ñwut nte ke andikanam ñwed ediomi oro ama akpa, 17 Ñwed udia akpa iwọrọke ñkpọ ndomokiet adaña nte andiwet enye osuk odude ke uwem, enyene odudu ke ini emi enye ama akpa.

18 Ntak edi oro ekenamde akpa ediomi enyene odudu oto ke iyip. 19 Ke akpa itie, Moses ama etiñ kpukpru mme ibet ọnọ kpukpru owo. Ndien enye akada iyip eyen enañ abuak ye mmọñ, ndien esime ke ñwed ediomi ye ke idem kpukpru mme mmọ emi ekedude do. Enye akada ñkọk eto emi ekotde Hisọp ye ndat ndat ọfọñ edebi akama esime mmọ. 20 Enye ama ọdọhọ, ete, "Emi edi iyip emi ọsọñọde ediomi emi Abasi owukde mbufo ete esuk ibuot enọ." 21 Ke ukem ukem usuñ oro ke Moses ekesime iyip oro ke atayat ye ke kpukpru mme ñkpọ emi esidade enam utuak ibuot. 22 Ke ofuri akpanikọ, nte mbet etemede, ekpere ndidi kpukpru ñkpọ ke eda iyip enam asana, enyuñ edahado enọ mme idiọkñkpọ kadaña emi eduọkde iyip.

23 Mme ñkpọ emi edide mme mbiet mme ñkpọ emi edude ke enyọñ akana enam mmọ esaña ke usuñ emi. Edi mme ñkpọ enyọñ ke idem mmọ eyom uwa emi ọfọnde akan emi.

24 Koro Kraist ikodukke ke edisana ebiet emi owo anamde, emi edi mbiet idem ata ñkpọ Enye ama oduk enyọñ ke idem Esie, ebiet emi Enye ọwọrọde ada ke iso Abasi ke ntak ñnyin. 25 Akwa oku mme Ju esiduk ke Edisana Ebiet kpukpru isua ye iyip ufene. Edi Kraist ikakaha do ndiwa idem Esie ke ediwak ini. 26 Edieke ekpedide ntre, Enye ekpenyene ndibọ ndutuhọ ediwak ini tọñọ ekebot ererimbot. Edi ke emi, Enye ọwọrọ ada idahaemi ini kiet kpọt ke ini ofuri emana ekperede utit ndimen idiọkñkpọ mfep, oto ke uwa emi Enye awade idem Esie.

27 Kpukpru owo enyene ndikpa ini kiet, ndien ke enye ama akakpa Abasi eyekpe ikpe esie. 28 Ke ukem usuñ emi, ekewa Kraist nte uwa ini kiet ndimen idiọkñkpọ ediwak owo mfep.

Enye eyetọñọ ntak edi ọyọhọ ikaba, ididighe ndinyene mbubehe ndomokiet ye idiọkñkpọ, edi ndinyaña mme mmọ emi etiede ebet Enye.