1 Melkisedek emi ekedi Edidem Salem ye Oku ñkoñkoñ Abasi Ibom. Kini emi Ebraham ọkọnyọñde ekọñ emi enye okowotde mme ndidem, Melkisedek ama osobo ye enye onyuñ ọdiọñ enye. 2 Ebraham ama ọnọ enye ubak kiet ke mbak duop mme ñkpọ mbume emi enye akadade ke ikọt ekọñ ọnyọñ.

Akpa ñkpọ emi enyiñ Melkisedek ọwọrọde edi "Edidem edinen ido", ndien sia enye ekedide "Edidem Salem" enyiñ esie ñko onyuñ ọwọrọ "Edidem Emem."

3 Ñkpọ ndomokiet iduhọ ndiyarade ñkpọ mbaña ete ye eka Melkisedek, mme se itukde mme ete ete esie, ñkpọ ndomokiet inyuñ iduhọ nditiñ mbaña emana esie mme ñkpa esie. Enye ebiet Eyen Abasi, enye ekedi oku ke nsinsi.

4 Yak ekam ekere nte enye okokponde. Ebraham akamba ete ñnyin ama ọnọ enye ubak kiet ke mbak duop mbume ñkpọ ekọñ esie. 5 Ndien emewuk kpukpru mme mmọ emi etode ke ubon Lefai emi edide mme Oku ete yak ebọ ubak kiet ke mbak duop eto nditọ Isrel, oro edi mmọ ndibọ nto oruk mmọ, okposuk edi emi mmọ ñko etode ke ubon Ebraham. 6 Melkisedek ikotoho ke ubon Lefai, edi enye ama ọbọ ubak kiet ke mbak duop oto Ebraham, onyuñ ọdiọñ enye, kpa enyemi akadade mme eñwọñọ Abasi enyene. 7 Eyighe iduhọ nte ke enyemi ọdiọñde ọdiọñ okpon akan enye emi ediọñde dioñ.

8 Ke se itukde mme oku, mme mmọ emi ekekpade ebọ ubak kiet ke mbak kiet ke mbak duop, edi se ibañade Melkisedek, ubak kiet ke mbak duop emi ekedi enye odude uwem ọkọbọ nte ñwed Abasi etiñde.

9 Ndien, ke editiñ, ke ini Ebraham ekekpede ubak kiet ke mbak duop edi Lefai emi emana esie ekebọde ubak kiet ke mbak duop ekekpe. 10 Koro owo ikamanke Lefai kaña, edi ke editim ntiñ enye ekesine ke idem Ebraham, akamba ete esie ke ini emi Melkisedek okosobode enye.

11 Ekedi ke idak ubon ñkpọ mme Lefai ke ekenọ nditọ Isrel ibet. Ndien edieke utom mme oku ke idak ubon ñkpọ Lefai ọkpọfọnde ama, ntak ikpoduho asaña asaña uduot Oku efen ndikpọwọrọ ndi, enye emi odude ke idak ubon ñkpọ Oku eke Melkisedek, emi midighe eke idak ubon ñkpọ eke mme Erọn.

12 Koro, edieke ekpuhọrede idak ubon ñkpọ mme oku, ibet ñko ekpenyene ndikpuhọde. 13 Ndien Ọbọñ ñnyin emi etiñde mme ikọ emi ebaña, oto oruk efen, ndien baba owo kiet ke oruk esie akananam inamke utom nte oku ke itie uwa. 14 Edi se etimde efiọk edi nte ke enye akamana oto ke oruk Juda, ndien Moses iketiñke ñkpọ ituk oruk emi ke ini emi enye eketiñde ikọ abaña ubon ñkpọ mme oku. 15 Ikọ emi etetim añwaña ñnyin nte ke asaña asaña oku ọwọrọ edi emi ebietde Melkisedek. 16 Ikadaha mme ibet ye ido unam ñkpọ ubọk owo inam enye oku, edi enye ekedi oku oto ke odudu uwem emi minyeneke utit. 17 Koro ñwed Abasi ọdọhọ ete: "Afo eyedi oku ke nsinsi, ke ukem idaha oku Melkisedek".

18 Ema ekpọnọrede akani ibet enim ñkañ kiet, koro enye ikọsọñke idem ikonyuñ inyeneke ufọn. 19 Koro ibet Moses ikekemeke ndinam ñkpọ ndomokiet ọfọn ama. Ndien ke emi, emeda eti idorenyin eduk edi, emi otode ke Enye ñnyin isaña ikpere Abasi.

20 Ke ndidian do, uñwọñọ Abasi onyuñ odu. Utọ uñwọñọ oro ikọduhọ ke ini ekenamde mme mmọ eken oku. 21 Edi Jisọs ekedi Oku oto ke uñwọñọ, ke ini Abasi ọkọdọhọde Enye ete, "Ọbọñ ama anam uñwọñọ, ndien Enye idikpuhọkerede esit Esie: Afo eyedi Oku ke nsinsi." 22 Ke ntak uñwọñọ emi, Jisọs ama akabade edi anditie ubiọñ ediomi emi ọfọnde ama.

23 Ukpuhọde efen odu: mme oku eken ema ewak, koro mmọ ekekpañade ndien ikekemeke ndika iso ke utom mmọ.

24 Edi Jisọs ododu ke nsinsi, ndien utom esie nte Oku ibehe isim owo efen. 25 Ntem Enye ekeme idahaemi ye kpukpru ini ndinyaña mme mmọ emi ebede ke Enye etiene Abasi, koro Enye odude uwem ke nsinsi ndinam ñkpeubọk ke iso Abasi kabaña mmọ.

26 Jisọs ndien edi Akwa Oku emi ọnọde mme unana ñnyin. Enye edi edisana, Enye inyeneke ndudue mme idiọkñkpọ ndomokiet ke idem esie, ema esio Enye ke otu ndiọi owo enim ñkañ kiet, enyuñ emenede Enye okoñ akan mme eñyọñ. 27 Enye ibietke mme ikpọ oku eken, inaha Enye anam uwa kpukpru usen kabaña mme idiọkñkpọ mmọ eken. Enye ama awawa uwa kiet, ini kiet akpa ye akpatre, ke ini emi Enye akawade idem esie. 28 Ibet Moses emek mme owo emi minenke ido ndidi mme ikpọ oku, edi uñwọñọ Abasi emi asañade ye uñwọñọ emi akadianade ibet Moses, emek Eyen Abasi emi ema ekenam Enye ọfọn ama ke nsinsi.