1 Ndinyene mbuọtidem edi edinyene iwuk mbaña mme ñkpọ emi ñnyin idoride enyin ibaña, ye edinyene iwuk ke mme ñkpọ emi ñnyin mikemeke ndikut. 2 Okoto ke mbuọtidem mmọ ke mbon eyo oko ekenyene itoro.

3 Ekedi ke mbuọtidem ke ñnyin idiọñọ ite ke Abasi akada ikọ inua Esie obot enyọñ ye isọñ, ekenam se ñnyin ikutde ke enyin eto se ñnyin mikemeke ndikut ke enyin.

4 Okoto ke mbuọtidem ke Ebel akawa uwa emi ọkọfọnde akan eke Ken. Okoto ke mbuọtidem esie Abasi ama enyime enye nte edinen owo, koro Abasi ke idem Esie ama ọbọ enọ esie. Ke mbuọtidem Ebel ama osuk etiñ ikọ, okposuk edi emi enye ama akakpa.

5 Edi mbuọtidem akanam Enọk okukpa, edi ema emen enye edọk etiene Abasi, ndien owo ndomokiet ikemeke ndiyom enye ñkut, koro Abasi ama emen enye ọdọk. Ikọ Abasi ọdọhọ ete mbemiso ekemen Enọk edọk, enye ama enem Abasi esit. 6 Baba owo ndomokiet ikemeke ndinem Abasi esit ke mibọhọke ke mbuọtidem nte ke Abasi odu onyuñ ọnọ mme mmọ emi eyomde enye utib.

7 Ekedi mbuọtidem akanam Nua okokop onyuñ anam uyo nduri utọñ Abasi kabaña mme ñkpọ ini iso, emi enye mikikemeke ndikut. Enye ama osuk ibuot ọnọ Abasi ndien enye ama ọbọp ubom emi enyenede ufọk, emi enye ye ufọk esie ekebọde edinyaña. Ke utọ usuñ emi, enye ama obiom ererimbot ikpe, onyuñ ọbọ Abasi edinen ido emi otode ke mbuọtidem.

8 Ekedi mbuọtidem akanam Ebraham osuk ibuot ọnọ Abasi ke ini emi Abasi okokotde enye, onyuñ aka idut emi Abasi ọkọñwọñọde ndinọ enye. Enye ama ọkpọñ idut mmọ idiọñọke ebiet emi enye akakade. 9 Ke mbuọtidem ke enye okodu ke idut emi Abasi ọkọñwọñọde ọnọ enye, nte enye ekedi esen owo. Enye okoduñ ke atayat ye Aisik ye Jekọb, emi ekebọde ukem eñwọñọ oro eto Abasi. 10 Koro Ebraham ekebet akwa obio oro Abasi ama ọkọdiọñ ama, onyuñ ọbọp, akwa obio oro ekenyenede itiat idak isọñ emi ọsọñọde ada.

11 Ekedi mbuọtidem akanam Ebraham ekeme ndidi ete nditọ okposuk edi oro enye ọkọsọñde eti eti; ye Sera añwan esie emi ekebede ini uman eyen. Enye ama enim Abasi ke akpanikọ ndinam eñwọñọ Esie. 12 Ke ntem, ofuri idut ema eto ke Ebraham emi ọkọsọñde ebe ini enye ekpenyenede idem eyen kiet, idut emi enyenede anana ibat owo emi ewakde nte ntantaọfiọñ ke ikpa enyọñ, ye utatan ke mben inyañ ibom emi owo mikemeke ndibat.

13 Kpukpru mme mmọ emi ema ekekpaña ke mbuọtidem. Mmọ ikọbọhọ mme ñkpọ emi Abasi ọkọñwọñọde, edi mmọ ema eda ekut mme ñkpọ emi ke anyan ebiet, enyuñ edara mmọ, enyuñ enyime ete ke mmimọ idi mme isen ye mme ododuñ ke isọñ. 14 Mme mmọ emi etiñde mme uto ikọ emi enam añwaña nte ke mmimọ iyom idut emi enyenede mmimọ.

15 Mmọ ikekaha iso ndikere mbaña idut emi mmọ ekekpọñde ke edem, ekpedi mmọ ema ekere ebaña, mmọ ekpenyene ifet ndifiak ñnyọñ. 16 Mmọ ekekabade ekop udọñ ebaña idut emi ọfọnde akan, idut emi otode enyọñ. Ke ntre Abasi ikopke but mmọ ndikot Enye Abasi mmọ, koro enye emetim akwa obio enim ọnọ mmọ.

17 Ekedi mbuọtidem akanam Ebraham ọnọ eyen esie Aisik nte uwa, ke ini emi Abasi okodomode enye ese. Ebraham ekedi enyemi Abasi akanamde eñwọñọ ọnọ, tutu ye oro enye ama ebeñe idem ndiwa kpa eyen esie kiet oro nte uwa. 18 Okposuk edi nte Abasi ama ọkọdọhọ enye ete, "Edito ke Aisik ke afo udunyene ubon." 19 Ebraham ama enim ke akpanikọ nte ke Abasi ama ekeme ndinam Aisik eset ke ñkpa, kpa nte enye ekekerede ke ọkọwọrọ nte ke enye ama afiak enyene Aisik oto ke ñkpa. 20 Ekedi ke mbuọtidem ke Aisik ekenim edidiọñ ọnọ Jekọb ye Isọ ke ini iso.

21 Ekedi mbuọtidem akanam Jekọb ọdiọñ nditọ Josef kiet kiet mbemiso enye akakpa, enye akayak ibuot odori ke esañ esie onyuñ atuak ibuot ọnọ Abasi.

22 Ekedi mbuọtidem akanam Josef ke ini enye okoyomde ndikpa, etiñ abaña ediwọñọ nditọ Isrel ke isọñ Ijipt, onyuñ ọkpọñ item nte edinamde ye okpo esie.

23 Ekedi mbuọtidem akanam eka ye ete Moses ekedip enye ke ọfiọñ ita ke enye ama akamana. Mmọ ekut nte enye ekeyede, ndien mmọ ikefeheke ndik ndimiom uyo edidem.

24 Ekedi mbuọtidem akanam Moses, ke ini enye okponde ama esin ndikere enyiñ ndian Adiaha Fero. 25 Enye ama emek ndikut ukut ye ikọt Abasi akan ndibọ inemesit idiọkñkpọ ke esisit ini. 26 Enye ama ọyuhọ ete ke ndikut but ke Kraist ama ọfọn akan kpukpru mme inyene isọñ Ijipt, koro enye okodoride enyin ke utib ini iso. 27 Edi mbuọtidem akanam Moses ọkpọñ Ijipt ikekopke ndik iyaresit edidem, enye ikenyeneke ndifiak edem koro eketiede nte enye ama okut Abasi emi owo mikemeke ndikut ke enyin. 28 Edi mbuọtidem akanam enye ọtọ usọrọ uwọrọ ube inyañ, onyuñ owuk nte yak eda iyip esime ke mme enyin usuñ, mbak enjel ñkpa ediwot mme akpan nditọ Isrel.

29 Ekedi mbuọtidem akanam nditọ Isrel ebe ke ididuot inyañ nte esaña ke nsat isọñ, ke ini mbon ekọñ Ijipt ekeyomde nditiene mmọ edem, mmọñ emen mmọ emen.

30 Ekedi mbuọtidem akanam ibibene Jeriko ọduọ ke isọñ, ke ini nditọ Isrel ema ekesaña ekanade mmọ ke usen itiaba. 31 Ekedi mbuọtidem akanam owo ekuwot ñwan akpara oro ekekerede Rehab ye mme mmọ emi ekesọñde ibuot ye Abasi, koro enye akadarade mme mbon uyep (mme Ju) oro.

32 Nte ami nsuk ñkaka iso? Ifet ikemke mi nditiñ mbaña Kidiọn, Barak, Samsin, Jefta, Defid, Samuel, ye mme prọfet. 33 Ke mbuọtidem ke mmọ ekeñwana eñwan ye mme ofuri idut, enyuñ ekan mmọ. Mmọ ema enam se ikenende, ndien ema ebọ se Abasi ọkọñwọñọde; mmọ ema ekibi anawuri ekpe inua, 34 enime mme ñkpọsọñ ikañ, ebọhọ ñkpa akañkañ. Mmọ ekedi mbon mmemidem edi ema ekop nsọñidem, mmọ ema ekop odudu ke ekọñ enyuñ ekan mme udim ekọñ isenowo. 35 Ke mbuọtidem ema etọñọ ntak emenede mmọ emi ekekpañade enọ iban mmọ, mme mmọ eken ekesinde ndiwọrọ ufin, ema ekpaña ke idak ndutuhọ man ekpemenede mmọ esin ke uwem emi ọfọnde ama.

36 Ema eda usuk owo enam ñkpọ nsahi enyuñ emia ke ikpa, ke ini ekebọpde ubak owo enyuñ etop edọñ ke ufọk ñkpọkọbi. 37 Ema etọñọ mmọ ke itiat, eyọk mmọ ke uyọkñkpọ ebahade iba, ema enyuñ eda akañkañ ewot mmọ. Mmọ ekesine ikpa ebot ye eke erọñ, esaña ubuene, esin mmọ enyin, enyuñ enam oburobut ñkpọ ye mmọ. 38 Ererimbot ikọfọnke inọ mmọ. Mmọ ekeyo nte mme anana ebiet iduñ ke mme obot ye ke mme isọñ akpa utatan, enyuñ eduñọ ke mme aba itiat ye ke mme ndudu ke isọñ. 39 Se mme utọ nti mbuk emi mme mmọ emi edade enọ idem mmọ oto ke mbuọtidem. Edi, mmọ ikọbọhọ se Abasi ọkọñwọñọde. 40 Koro Abasi ama ebiere ndinam se ifọnde ikan ọnọ ñnyin. Uduak Esie ekedi nte ke ana enam mmọ efọn ema ye ñnyin ini kiet.