1 Ndien, sia ñnyin inyenede otu ntiense emi ekande ñnyin ekuk, eyak ñnyin ndien isioño idem ñnyin ifep ikpọñ kpukpru mme ñkpọ emi ekpedade ke usuñ ñnyin, ye idiọkñkpọ emi osuk ọsọñde omum ñnyin akama. Eyak ñnyin ndien isin ifik ifehe mbuba itọk, emi anade ñnyin ke iso.

2 Eyak ñnyin iwuk enyin ise Jisọs, nte Enye emi edide ntọñọ ye utit mbuọtidem ñnyin. Enye ikafiakke edem ke ntak krọs, edi ke ntak idaraesit emi akanade ebet Enye, Enye ikekereke ñkpọ ndomokiet ibaña edikpa ke krọs, ndien idahaemi, Enye emetie ke ubọk nnasia ebekpo Abasi. 3 Kere baña se enye ekebede ke esit, nte Enye ekebede ke idak idiọkesit mme oburobut owo. Ke ntre, ekukpa mba ke idem mbufo enyuñ efiak edem. 4 Koro ke eñwan mbufo ye idiọkñkpọ mbufo iñwanake kaña isim idaha emi ewotde mbufo.

5 Nte mbufo emefre mme ikọ ndọñesit emi Abasi etiñde ye mbufo nte nditọ Esie? "Eyen mi kpañ utọñ ke ini Ọbọñ ọtunọde fi, ndien kuyak esit etimerede fi ke ini emi Enye asuade ikọ ọnọ fi. 6 Koro Abasi ọtunọde owo kiet ekededi emi Enye amade, onyuñ ọnọ owo kiet ekededi emi Enye adade nte eyen ufen."

7 Eyọ ufen emi mbufo ebọde ke esit nte ke edi ntunọ Ete, koro ukut mbufo owut ete ke Abasi anam ñkpọ ye mbufo nte nditọ Esie. Nte eyen baba kiet odu emi ete esie mitunọke enye? 8 Edieke Enye mitunọke mbufo, nte Enye anamde ye kpukpru mme nditọ Esie, oro owut ete ke mbufo idighe mme ata nditọ Esie, edi, edi nditọ akpara. 9 Ke ñkañ mme ete obukidem ñnyin, mmọ enọ ñnyin ufen ñnyin ikpono mmọ; adaña didie ndien ke ñnyin ikposuk idem inọ Ete ñnyin ke Spirit inyuñ idu uwem!

10 Mme ete obukidem ñnyin etunọ ñnyin ke esisit ini, nte mmọ ekutde ete ke enen. Edi Abasi anam ntre ye ñnyin ke ntak ufọn idem ñnyin, man otodo ñnyin inyene ebuana ke edisana uwem Esie. 11 Kini emi etunọde ñnyin, osuk ebiet ñnyin ke ini oro nte ñnyin ikpọfọfuhọ; ñnyin iduhọ ke inemesit. Edi ke esisit ini ama ekebe, mme mmọ oro ekebọde utọ ufen oro, edọk udori emem ye edinen uwem.

12 Mmọdo, emenede mme ubọk mbufo emi ekpañade mba ke enyọñ, enyuñ enam mme ñnyek ñnyek erọñ mbufo ekop nsọñidem. 13 Eka iso ndisaña ke nnen nnen afañ, mbak ukot mbuñọ edibiara ama, edi akabade okop nsọñidem.

14 Domo ndien ndidu ke emem ye kpukpru owo, nyuñ ñwana ndidu edisana uwem, koro owo ndomokiet idikwe Abasi ke uwem esie misanake. 15 Ekpeme, mbak owo baba kiet ke otu mbufo edifiak edem ọkpọñ mfọn Abasi. Ekpeme mbak owo mbufo ndomokiet edikabade edi eto emi enyenede idot, emi ọkọride okoñ onyuñ afina ata ediwak owo ye mmọñ ñkpa esie. 16 Ekpeme etieti, mbak owo mbufo ndomokiet edikabade edi owo use, onyuñ anana Spirit Abasi nte Isọ, emi okotode ke ntak ubọk udia inikiet anyam unen emana esie nte akpan. 17 Ke akpatre, nte mbufo efiọkde, enye ama oyom ndibọ edidiọñ ete esie, edi ema ebiọñọ enye, koro usuñ mikọduhọ nte enye ekekemede ndikpuhọde se enye ama akananam, okposuk edi emi enye okoyomde enye ye mmọñeyet.

18 Mbufo itiehe nte nditọ Isrel eketiede, etiene se mbufo ekemede ndituk ubọk, obot Sainai, ye edeme ikañ esie, ye ekim, ye ntuhube, ye oyobio, 19 ye uyom obukpoñ, ye uyom owo. Ke ini mmọ ekekopde uyo oro mmọ ema ekpe ubọk ete yak mmimọ ikukop ikọ efen, 20 koro mmọ mikekemeke ndiyọ ewuhọ emi ọkọdọhọde, ete, "Ekpededi ufene otuk obot emi ana etọñọ enye ke itiat ewot." 21 Se mmọ eketiñde ama enyene ndik eti eti, tutu Moses ama ọdọhọ, ete, "Ami menyek ñnyuñ ñkop ndik eti eti."

22 Ke itie emi, mbufo emedi etiene obot Sayọn ye ke akwa obio odu uwem Abasi Jerusalem eke enyọñ, ye mme tọsin enjel Esie. 23 Mbufo emedi ke mbono idaraesit mme akpa nditọ Abasi, emi edide ufọk Abasi Akpanikọ, emi ewetde mme enyiñ mmọ ke enyọñ. Mbufo emedi etiene Abasi, emi edide andikpe ikpe kpukpru owo, enyuñ edi etiene mme spirit mme ndinen owo emi enamde efọn ema. 24 Mbufo edi etiene Jisọs, emi okobonde ubon ñkpọ obufa ediomi emi, edi etiene iyip oro ekesimede emi etiñde abaña mme nti ñkpọ, emi akande iyip Ebel.

25 Ekpeme ndien, ekusin ndikop enye emi etiñde ikọ. Mme mmọ emi ekesinde ndikop etop emi enyenede Abasi mi ke isọñ ikọbọhọke, edinyene ndik didie ye ñnyin, edieke ñnyin isinde ndikpañ utọñ nnọ Abasi, emi etiñde ikọ ye ñnyin oto enyọñ! 26 Uyo Esie emi ama enyeñe ererimbot ke ini oro, edi idahaemi Enye ọmọñwọñọ ete, "Ami ñyetọñọ ntak ñnyeñe, ididighe isọñ ikpọñ, edi ye enyọñ ñko." 27 Ikọ emi "Inikiet efen" owut añwa añwa ete ke enyenyeñe kpukpru se ekebotdebot enyuñ emen mmọ efep, man mme ñkpọ emi owo mikemeke ndinyeñe ekpesuhọ.

28 Eyak ñnyin inyene esit ekọm, ndien, koro ñnyin ibọpde obio ubọñ emi ñkpọ mikemeke ndinyeñe. Eyak ñnyin inyene esit ekọm, inyuñ ituak ibuot inọ Abasi ke usuñ emi edinemde Enye esit, ye ukpono ye ndik. 29 Koro Abasi ñnyin edi ikañ emi atadeta ñkpọ abiat.