1 Abasi ke mme ini emi ekebede ekesitiñ ikọ ọnọ mme ete ete ñnyin ediwak ini ye ke ediwak usuñ ebe ke inua mme Asiak Uduak (prọfet) Esie.

2 Edi ke mme ukpere edem usen emi, Enye emetiñ ikọ ye ñnyin ebe ke inua Eyen Esie. Abasi akanam enyọñ ye isọñ oto ke Enye emi Abasi ekemekde ndida kpukpru ñkpọ ñnyene ke utit ini.

3 Enye ayama ye uyama ubọñ Abasi, Enye edi ata mbiet Abasi ofuri ofuri; onyuñ ada odudu ikọ Esie omum enyọñ ye isọñ akama. Ke Enye ama akanam mme owo esana ke mme idiọkñkpọ mmọ, Enye ama ọsuhọde etetie ke enyọñ ke ubọk nnasia Abasi andikoñ ñkan ke odudu. 4 Ema enam Enye okoñ akan mme enjel, kpa nte enyiñ emi Abasi ọkọnọde Enye okponde akan eke mmọ. 5 Koro Abasi akanam idọhọke enjel Esie ndomokiet ete, "Afo edi Eyen mi, mfin. Ami makabade ndi Ete fo." Mme akananam Abasi ọdọhọ enjel ndomokiet, ete, "Ami ñyedi Ete Esie, ndien enye eyedi eyen Mi". 6 Ke ini emi Abasi okoyomde ndidọñ akpa edibon Eyen Esie edi ererimbot, Enye ama ọdọhọ ñko, ete, "Kpukpru mme enjel Abasi enyene ndituak ibuot nnọ Enye".

7 Emi edi se Abasi eketiñde abaña mme enjel, "Abasi anam mme enjel Esie etie nte ofum, ndien mme asañautom Esie nte edeme ikañ." 8 Ke se ibañade Eyen Esie, Enye ama ọdọhọ ete: "Ebekpo fo, O Abasi, eyebighi ke nsinsi nsinsi! Edikara Obio Ubọñ Fo ke unen: 9 Afo amama unen, onyuñ asua se idiọkde, ntak edi oro, Abasi Fo emekde fi, okonyuñ ọnọde fi idaha ukpono emi okoñde akan enye emi Enye ọkọnọde mme nsaña Fo ke ndiyet Fi ye aran inemesit."

10 Enye ama onyuñ ọdọhọ ete, "Afo Ọbọñ, ke editọñọ okobot isọñ, ndien akada ubọk Fo anam ikpa enyọñ. 11 Kpukpru mmọ eyebe efep, edi Afo ọyọsuhọ, kpukpru mmọ eyekabade ñkani nte mme ọfọñ. 12 Afo eyefut mmọ nte owo ofut ọfọñ emi efutde fut, ndien eye kpuhọde mmọ nte ọfọñ. Edi Afo edi ukem ukem kpukpru ini, ndien Afo unyeneke utit."

13 Akananam Abasi idọhọke enjel Esie ndomokiet ete, "Tie mi ke ubọk nnasia Mi tutu Ami nsin mme asua fo nte ñkpọ udori ukot ke idak ukot fo."

14 Nso ke mme enjel emi edi ndien? Mmọ kpukpru edi mme spirit emi enamde ñkpọ enọ Abasi, ndien mmọ ke Abasi ọdọñ ekeñwam mme mmọ emi eyomde ndibọ edinyaña.