1 Eyak ñnyin ikaka iso, ndien, ibine mme ukpepñkpọ emi esọñde idem, inyuñ ikpọñ ke edem mme akpa isọñ ukpepñkpọ emi abañade etop Kraist. Yak ñnyin ikutọñọ ntak isin itiat idak isọñ edikabade esit ñkpọñ mme mbiara utom emi adade owo okosuño ke ñkpa, ye eke mbuọtidem ke Abasi, 2 ye ukpepñkpọ emi abañade mme babtisim, ye edidori owo ubọk, ye ediset ke ñkpa ye nsinsi ufen.

3 Eyak ñnyin ikaka iso! Ndien emi edi se ñnyin idinamde edieke Abasi enyimede.

4 Ama edi mme mmọ emi ema ekeda mmọ esin ke uñwana Eti Mbuk ini kiet, ema ekenyuñ etabi mme enọ emi otode enyọñ, enyuñ ebọ udeme Edisana Spirit mmọ, 5 enyuñ etabi ufọn mbuk emi otode Abasi, enyuñ enyene ntuk odudu eyo emi edidide ke ini iso 6 ndien mmọ eduọ ekpọñ usuñ, ọsọsọñ ndinam mmọ efiak etua ñkpọfiọk aba, koro mmọ ekọñde Eyen Abasi ke Krọs ini kiet efen enyuñ esio enyan enọ but añwa añwa.

7 Abasi ọdiọñ isọñ emi ọñwọñde edim emi ọduọhọde ke esit kpukpru ini, onyuñ etibede mme eto emi anamde ufọn ọnọ mme mmọ emi etọde enọ. 8 Edi edieke enye akade iso ndisioño mbaraekpe ye mbiet, enye iwọrọke baba ñkpọ kiet, enye ada ke idiọk idaha emi anade Abasi osuñi enye, ikañ ñko eyenyuñ osobo enye.

9 Ndima ufan, kpa nte emi ñnyin itiñde ntem, ñnyin imenyene idorenyin ibaña mbufo. Ñnyin imọfiọk ite ke mbufo emenyene mme nti edidiọñ emi enyenede mbufo oto edinyaña emi enyañade mbufo. 10 Abasi itukke owo. Enye idifreke utom emi mbufo enamde, mme ima emi mbufo ewutde ke ntak Esie ke uñwam emi mbufo enọde enyuñ esuk ekade iso ndinọ mme nditọ ete mbufo ke Kraist. 11 Akwa udọñ esit ñnyin edi, nte mbufo kiet kiet ekpekam emum nsatitọñ mbufo ekama tutu esim utit, man se mbufo edoride enyin ebaña ekpewọrọ esu.

12 Ñnyin iyomke mbufo ekabade edi ifu, edi ebiet mme mmọ oro enimde ke akpanikọ ndien enyene ime, enyuñ ebọ se Abasi ọkọ ñwọñọde.

13 Koro ke ini emi Abasi akanamde eñwọñọ ọnọ Ebraham, Enye ama ata uñwọñọ ndinam se Enye ama ọkọñwọñọ: Sia owo efen emi okokponde akan Enye mikiduhọ, Enye ama ada uñwọñọ emi ke enyiñ Esie. 14 Enye ọkọdọhọ ete, "Ami mọñwọñọ nnọ fi nte ke ami ñyediọñ fi, ñnyuñ nnọ fi ediwak ubon." 15 Ebraham ama enyene ime, ke ntak oro enye ama ọbọ se Abasi ọkọñwọñọde.

16 Kadaña ini emi owo adade uñwoñọ enye anam ke enyiñ owo emi okponde akan enye, ndien uñwọñọ ebiere kpukpru eneni ke otu ubon owo. 17 Koro Abasi okoyomde ndinam ntak Esie emi midikpuhọkede, añwaña mme mmọ emi edibọde se Enye ọkọñwọñọde, Enye ama ọsọñọ eñwọñọ Esie ye uñwọñọ.

18 Mme ñkpọ iba emi ndien edu emi mikemeke ndikpuhọde, emi Abasi mikemeke ndisu nsu kabaña mmọ. Ke ntre ñnyin emi ima ikokut ifure ye Enye imokop nsọñidem ndisọñọ mmum idorenyin emi enimde ñnyin ke iso.

19 Ñnyin imenyene idorenyin emi nte ukwak umum ubom inọ ukpọñ ñnyin. Ifure ye iwuk edu, ndien Enye obom ebe ikpehe ke enyọñ onyuñ oduk ata esit edisana ebiet ubọhọ. 20 Jisọs ama ebem ñnyin iso oduk do ke ntak ñnyin. Enye ama akabade edi Akwa Oku ke nsinsi, ke udim mme oku Melkisedek.