1 Ke ntem, mme ndisana nditọ ete mi, emi ebuanade ke ikot emi otode enyọñ, ewuk mme ekikere mbufo ke Jisọs, emi Abasi ọkọdọñde edidi Akwa Oku mbuọtidem emi ñnyin inyenede.

2 Enye ama anam akpanikọ ye Abasi emi ekemekde Enye ndinam utom emi, kpa nte Moses akanamde akpanikọ ke utom esie ke ofuri ufọk Abasi. 3 Enye emi ọbọpde ufọk, ọbọ ukpono akan idem ufọk. Ke ntem Jisọs odot ndibọ ubọñ ñkan Moses. 4 Kpukpru ufọk enyene andibọp, ndien Abasi edi Enyemi ọbọpde kpukpru ñkpọ.

5 Moses ama anam akpanikọ ke ofuri ofuri okure Abasi nte isuñutom, ama onyuñ etiñ abaña se Abasi editiñde ke ini iso. 6 Edi Kraist anam akpanikọ nte Enyemi akarade ufọk Abasi. Ñnyin idi ufọk Esie, edieke ñnyin imumde isọñesit ñnyin ye idorenyin ñnyin ikama ke se ñnyin idoride enyin ke esit.

7 Kpa nte Edisana Spirit etiñde, "Edieke mbufo ekopde uyo Abasi mfin, 8 ekusọñ esit mbufo, kpa nte mbufo ekenamde ke ini ekesọñde ibuot ye Abasi, ke usen oro ke Akpa Utatan, ke ini ekedomode Abasi ese. 9 Abasi ọdọhọ ete, do ke mme ete ete mbufo ekedomo mi ese, okposuk edi nte mmọ ekekutde se Ami ñkanamde ke isua aba. 10 Ke ntak oro, Ami mma ñyat esit ye emana oro ñnyuñ ndọhọ nte: Mmọ edi mme anana nsuk ibuot kpukpru ini, enyuñ esin ndinim mme ewuhọ Mi.

11 Ami mma ñyat esit, ñnyuñ nnam ndodobi eñwọñọ nte, mmọ ididukke idi, idinyuñ inyeneke nduọk odudu ye Ami!"

12 Nditọ Ete mi, ekpeme man baba owo mbufo ndomokiet edinyene esit emi abiarade onyuñ anana ndinim ke akpanikọ emi ekemede ndinam enye ọwọñọde ọkpọñ odu uwem Abasi. 13 Man idiọkñkpọ edibiọñọ owo mbufo ndomokiet, onyuñ anam ekabade edi itun, mbufo enyene ndiñwam kiet eken kpukpru usen, adaña ini nte se Ñwed Abasi okotde "Mfin" abuanade ye ñnyin. 14 Koro ñnyin kpukpru idi mme abuana utom ye Kraist, edieke ñnyin isọñọde imum idorenyin emi ñnyin ikenyenede ke editọñọ tutu esim utit.

15 Emi edi se ñwed Abasi ọdọhọde ete: "Edieke mbufo ekopde uyo Abasi mfin, ekusọñ esit mbufo nte mbufo ekenamde, ke ini mbufo ekesọñde ibuot ye Abasi".

16 Mme anie ekekop uyo Abasi, enyuñ esọñ ibuot ye Enye? Kpukpru mme mmọ emi Moses akadade ọwọrọ ke isọñ Ijipt. 17 Abasi akayat esit ye mme anie ke isua aba? Ekedi ye mme mmọ emi ekenamde idiọkñkpọ, emi ekeduọñọde ekpaña ke akpa utatan. 18 Mme anie ke Abasi akanam ọkpọsọñ eñwọñọ Esie abaña, ete, mmọ ididukke idi idibọ nduọk odudu ye Ami? Ekedi mme mmọ oro ekesọñde ibuot. 19 Ñnyin imokut ndien ite ke mmọ ikikemeke ndiduk ñka, koro mmọ mikenimke ke akpanikọ.