1 Emek akwa oku kiet ekededi ke otu mme owo, enyuñ enọ enye ubiọñ ndinam ñkpọ nnọ Abasi ke ibuot mmọ ke edinọ mme enọ ye ke ediwa uwa idiọkñkpọ 2 Sia enye ke idem esie enyenede mmemidem ke ediwak usuñ, enye ekeme ndiyọ ye mme mmọ emi enanade ifiọk enyuñ enamde mme ndudue. 3 Ndien sia enye ke idem esie enyenede mmemidem, enye inamke uwa inọ mme idiọkñkpọ mme mmọ eken ikpọñ, edi etiene anam abaña mme idiọkñkpọ esie ñko.

4 Owo ndomokiet imekke ukpono edidi akwa oku inọ idem esie. Oto ke ikọ Abasi ikpọñ ikpọñ ndien enam owo oku, kpa nte ekekotde Erọn.

5 Kpa ke ukem usuñ emi, Kraist ikọnọhọ idem esie ukpono edidi Akwa Oku ke odudu idem Esie, akakam edi Abasi ọkọdọhọ Enye ete, "Afo edi Eyen mi, mfin emi Ami makabade ndi Ete fo." 6 Enye ama onyuñ ọdọhọ ñko ke itie ñwed efen ete, "Afo eyedi Oku ke nsinsi, ke ebuana mme oku emi Melkisedek okodude."

7 Ke ini Jisọs okodude uwem Esie mi ke isọñ, Enye ama ọbọñ mme akam onyuñ anam mme ebeñe ye ñkpo ye mmọñeyet ọnọ Abasi, emi ekekemede ndinyaña Enye nsio ke ñkpa. Koro Enye ọkọsuhọrede idem onyuñ enyene iwuk, Abasi ama okop Enye.

8 Edi, okposuk edi emi Enye ekedide Eyen Abasi, Enye ama ekpep ndisuk ibuot, oto ke mme ukut Esie. 9 Ke ini ekenamde Enye ọfọn ama, Enye ama akabade edi ntọñọ nsinsi edinyaña ọnọ kpukpru mme mmọ emi esukde ibuot enọ Enye, 10 ndien Abasi ama ayararede Enye owut nte edikoñ Oku, ke udim mme oku Melkisedek.

11 Mme ñkpọ ewak emi ñnyin ikpetiñde ibaña ñkpọ emi, edi ọsọsọñ ndinam añwaña mbufo, koro mbufo misọpke ndifiọk ñkpọ.

12 Ini ekem emi mbufo ekpedide mme andikpep, edi mbufo esuk eyom Owo osuk ekpep mbufo akpa ukpepñkpọ emi abañade etop Abasi. Utu ke mbufo edia udia emi ọsọñde, mbufo esuk eka iso ndiñwọñ mmọñeba. 13 Owo kiet ekededi emi akade iso ndiñwọñ mmọñeba edi eyen nsek, emi minyeneke ifiọk ibaña se inende mme se ikwañade. 14 Ọkpọsọñ udia ke ñkañ eken, odu ọnọ mme ikpọ owo emi ema ekesọñidem mmọ ke ukpep tutu mmọ ekeme ndidiọñọ se idide eti ye idiọkñkpọ.