1 Ntak edi oro anade ñnyin isọñọ imum mme akpanikọ emi ñnyin ikokopde ikama man ñnyin idiyo ikpọñ usuñ. 2 Koro edieke minimke ke akpanikọ mme etop emi mme enjel eketiñde, ndien owo kiet ekededi emi mikanamke inyuñ isuk ibuot inọ enye ama ọbọ ufen emi okodotde ye enye. 3 Didie ndien ke ñnyin idibọhọ, edieke ñnyin mikpañke utọñ inọ akwa ubọhọ emi? Ọbọñ Jisọs ke idem Esie ekebem iso ọkwọrọ etop edinyaña emi, ndien mme mmọ emi ekekopde enye ema esọñọ enọ ñnyin nte ke edi akpanikọ.

4 Kpa ye oro ñko Abasi ama adian ñkpọ ntiense ke eke mmọ ke edinam mme idiọñọ odudu, mme ñkpọ ñkpaidem, ye mme nsio nsio mme utibe ñkpọ Enye ñko ama edeme mme enọ Edisana Spirit etiene nte uduak Esie ekedide.

5 Abasi ikenimke mme enjel nte mme akara ukara ke ererimbot emi edidide emi ñnyin itiñde tiñ ibaña. 6 Edi nte emi etiñde ke edisana ñwed Abasi ete, "Owo edi nso emi Afo ekerede ñkpọ abaña enye?" Ikpuikpu ñkpọ nte owo, ke Afo ekpekere ñkpọ abaña enye? 7 Okposuk edi nte Afo akanamde enye ke esisit ini ọsuhọde akan mme enjel, Afo ama ayari Enye anyanya ubọñ ye ukpono. 8 Ndien anam Enye andikara kpukpru ñkpọ: edọhọ ete ke Abasi anam owo "Andikara kpukpru ñkpọ", owo isioho baba ñkpọ kiet ifep.

Edi ke emi ñnyin ikwe nte owo akarade kpukpru ñkpọ kaña. 9 Edi ñnyin imokut Jisọs koro ke esisit ini ema enam Enye ọsuhọde akan mme enjel, man otodo, oto ke mfọn Abasi Enye akpakpa ke ibuot kpukpru owo. Ñnyin imokut nte eyarade Enye anyanya ubọñ ye ukpono idahaemi, oto ke ntak ufen ñkpa emi Enye ọkọbọde. 10 Ekedi nnen nnen nte Abasi emi okobotde onyuñ ekpemede kpukpru ñkpọ, anam Jisọs ọfọri ama oto ke ukut, man otodo ekeme ndida mme ediwak nditọ nsin ke ebuana ubọñ Esie. Koro edi Jisọs edi Enye emi adade mmọ usuñ ekesim edinyaña.

11 Enye anam mme owo esana ekpọñ mme idiọkñkpọ mmọ, ndien Enye ye mme mmọ emi Enye anamde esana kpukpru enyene Ete kiet. Ntak edi oro Jisọs mikopke but ndikot mmọ nditọ Ete Imọ. 12 Kpa nte enye ọdọhọde, "Abasi, Ami ñyetiñ mbaña fi nnọ nditọ ete mi, Ami ñyenọ fi ubọñ ke iso ofuri otu owo." 13 Enye onyuñ ọdọhọ ñko ete, "Ami ñyebuọt idem ye Abasi" ndien Enye onyuñ ọtọñọ ntak ọdọhọ ete, "Se Mi mi ye mme nditọ emi Abasi ọnọde Mi."

14 Sia mme nditọ, nte Enye okotde mmọ, edide mme owo emi enyenede obuk ye iyip, Jisọs ke idem Esie ama akabade etie nte mmọ onyuñ abuana ke obot mmọ nte owo. Enye akanam emi, man oto ke ñkpa 15 Esie Enye ekpekeme ndisobo Setan, emi odudu ñkpa odude enye ke ubọk. Ndien ọkpọk mme mmọ emi ndik ñkpa ekesinde ke ufin ke ofuri uwem mmọ ayak.

16 Koro añwaña, nte ke ikedighe mme enjel ke Enye akañwam, edi, nte ñwed Abasi etiñde, "Enye akañwam mme mmọ emi etode ke ubon Ebraham ewọñọ." 17 Emi ọwọrọ ete, ke akana Enye akabade ebiet mme nditọ Ete Esie ke kpukpru oruk usuñ, man otodo Enye edi Akwa Oku emi anamde akpanikọ, onyuñ okopde mbọm ọnọ mmọ ke utom emi Enye anamde ọnọ Abasi, man oto ke oro efen mme idiọkñkpọ kpukpru owo. 18 Ndien ke emi Enye ekeme ndiñwam mme mmọ emi idomo odomode, koro Enye ke idem Esie ama ebe ke idomo ye ukut.