1 Emi edi ofuri akpanikọ ke kpukpru se ñnyin ikade iso nditiñ. Ñnyin imenyene Akwa Oku emi etiede ntem, emi etiede ke ubọk nnasia ebekpo Andikara ke enyọñ. 2 Enye anam utom nte Akwa Oku ke ata edisana ebiet; oro edi, ke idem ata atayat emi Ọbọñ ọkọbọpde ke idem esie, idighe enyemi owo ọbọpde.

3 Emek Akwa Oku kiet kiet ndiwa enọ ye ufene nnọ Abasi, ke ntre Akwa Oku ñnyin ana enyene ñkpọ ñko ndiwa. 4 Edieke enye okpodude mi ke isọñ, Enye ikpedighe oku ke baba usuñ ndomokiet, koro mme oku edude emi ewade uwa nte ibet mme Ju etemede. 5 Utom emi mmọ enamde nte mme oku edi mbiet ñkpọ ye mbukpọñ emi odude ke enyọñ. Edi ukem ukem kpa nte ekedude ye Moses. Ke ini enye okoyomde ndibọp atayat, Abasi ama ọdọhọ enye ete, "Tim kpeme ndinam ñkpọ kiet kiet asaña ekekem ye idomo emi ekewutde fi ke akwa obot oro." 6 Edi, nte edide, enọ Jisọs utom oku emi okponde akan eke mmọ kpa nte ediomi emi enye akanamde ke ufọt owo ye Abasi ọnyuñ ọfọnde akan koro edoride Enye ke mme eñwọñọ nti ñkpọ.

7 Edieke ñkpọ mikpibiarake ke akpa ediomi, ntak ikpeduhọ ndiyom obufa efen. 8 Edi Abasi ama okut ndudue ọnọ ikọt Esie, ke ini Enye ọkọdọhọde ete, "Mme usen ke ededi, Ọbọñ ọdọhọ, emi Ami ndinamde obufa ediomi ye ufọk Isrel, ye ufọk Juda. 9 Idibietke akpa idiomi emi ñkanamde ye mme ete ete mmọ, ke usen oro ñkomumde mmọ ke ubọk ndida mmọ ñwọrọ ñkpọñ isọñ Ijipt. Mmọ ikanamke akpanikọ ye ediomi emi ñkanamde ye mmọ, oro anam Ami ñkakpañke utọñ nnọ mmọ, Ọbọñ ọdọhọ. 10 Idahaemi, emi edi ediomi ndinamde ye nditọ Isrel ke mme usen iso emi edidide, Ọbọñ ọdọhọ: Ami ñyesin mme ibet mi ke ikike mmọ ñnyuñ ñwet mmọ ke esit mmọ. Ami ñyedi Abasi mmọ, ndien mmọ eyedi ikọt mi. 11 Mmọ ndomokiet idikpepke kiet eken ñkpọ aba, mme ndidọhọ eyen obio kiet ye enye ete, ‘Diọñọ Abasi.’ Koro kpukpru mmọ eyediọñọ Mi, ọtọñọde ke ekpri tutu esim andikpon ñkan. 12 Ami ñyenyene mbọm mbaña mme ndudue mmọ ndien Ami nditighi mme idiọkñkpọ mmọ aba."

13 Ke edikot ediomi enye emi "Obufa", enye amanam akani ediomi ọwọrọ ikpuikpu, ndien se ededi emi ọsọñde abiara, enyene ndisọp ndibe mfep.