1 Idahaemi Abasi ọmọkpọñ eñwọñọ ọnọ ñnyin nte ke ñnyin imekeme ndiduk ñnyuñ ñkọbọ nduọk odudu ye Enye. Eyak ñnyin ikpeme ndien man edikut owo mbufo ndomokiet etrede ndibọ eñwọñọ nduọkodudu emi. 2 Koro ñnyin imokop eti mbuk emi kpa nte mmọ ekekopde. Mmọ ema ekop eti etop emi, edi ikanamke ufọn inọ mmọ, koro kadaña emi mmọ ekekopde, mmọ ikọbọhọ enye ye mbuọtidem. 3 Ñnyin mme mmọ emi inimde ke akpanikọ ndien imoduk ika ikọbọ nduọk odudu ye Abasi. Ukem ukem nte Enye ọkọdọhọde. "Ami mma ñyat esit, ñnyuñ nnam ndodobi uñwọñọ: Mmọ ididukke isọñ emi ñkpọnọde mmọ nduọk odudu." Enye eketiñ emi okposuk edi nte utom Esie ama okokure ọtọñọde ke ini emi Enye okobotde ererimbot.

4 Koro enyene itie ke ñwed Abasi emi etiñde ke usuñ emi ebaña ọyọhọ usen itiaba, "Abasi ama ọduọk odudu ke ọyọhọ usen itiaba, onyuñ etre kpukpru mme utom Esie."

5 Ema enyuñ etọñọntak etiñ ebaña ñkpọ emi ete: "Mmọ ididukke isọñ emi ñkpọnọde mmọ nduọk odudu." 6 Mme mmọ emi ekebemde iso ekop Eti Mbuk emi ikodukke ikọduọk odudu ye Abasi koro mmọ mikenimke ke akpanikọ. Edi mme mmọ efen edu emi ekeyakde mmọ eduk ekeduọk odudu ye Abasi.

7 Akpanikọ emi ayararede owut nte ke Abasi ama osio usuñ efen enim emi ekekotde "Mfin". Enye eketiñ abaña enye emi ke inua Defid ke ata ediwak isua ama ekebe, nte ema eketetiñ, ete, "Edieke mbufo, ekopde uyo Abasi mfin, ekusọñ esit mbufo."

8 Edieke Josua akpakadade nditọ Isrel oduk ke nduọk odudu Abasi, Abasi ikpetọñọke ntak itiñ ke anyan ini ama ekebe ibaña usen efen. 9 Nte ededi, nduọk odudu ọsuhọ ọnọ ikọt Abasi nte Abasi ọkọduọkde ke ọyọhọ usen itiaba. 10 Koro owo ekededi emi odukde aka ọkọduọk odudu ye Abasi eyeduọk odudu ọkpọñ mme utom esie, kpa nte Abasi ọkọduọkde odudu ọkpọñ utom Esie. 11 Eyak ñnyin ndien iñwana ofuri ukeme ñnyin ndiduk ñka ñkọbọ nduọk odudu ye Abasi. Ikpanaha ñnyin ndomokiet itut utọñ nte mmọ ekenamde ndien ekpu ndiduk.

12 Ikọ Abasi ododu uwem, onyuñ okop odudu. Enye ọsọp akan ofut iso iba ekededi. Enye ekpi kpukpru oduk aka ekesim ebiet emi ukpọñ ye spirit esobode, ye ebiet emi ikek ye ndiaọkpọ esobode. Enye ekpe mme udọñ esit ye mme ekikere esit owo ikpe. 13 Inyeneke baba ñkpọ ndomokiet emi ekemede ndidibe Abasi. Kpukpru ñkpọ ke ererimbot emi ena iñwañ ye iferi ke enyin Esie, ndien edi Enye ke ñnyin kpukpru idinyene ndinam ibat idem ñnyin nnọ.

14 Eyak ñnyin ndien imum ke ọkpọsọñ ikama mbuọtidem emi ñnyin inyenede koro ñnyin imenyene Akwa Oku emi ama okoduk akada ke idem iso Abasi kpa Jisọs, Eyen Abasi. 15 Koro Akwa Oku ñnyin idighe enyemi mikemeke ndikop ñnyin mbọm ke mmemidem ñnyin. Ke editim ntiñ, ñnyin inyene Akwa Oku emi ekedomode Enye idomo ke kpukpru usuñ kpa nte edomode ñnyin, edi Enye ikanamke idiọkñkpọ. 16 Eyak ñnyin inyene uko ndien, inyuñ iwọrọ ke iso ebekpo Abasi, ebiet emi mfọn odude. Do ke ñnyin idibọ mbọm inyuñ ikut mfọn ndiñwam ñnyin ke ini ekededi emi ñnyin iyomde Enye.