1 सुलेमान के उत्तम गीत।

2 ओह अपन मुहूं ले मोर चूमा लेवय—

काबरकि तोर मया ह अंगूर के मंद ले जादा खुसी देथे।

3 तोर इतर के खुसबू ह बने लगथे;

तोर नांव ह ढारे गय इतर के सहीं अय।

एकरसेति जवान माईलोगनमन तोर ले मया करथें!

4 मोला अपन संग ले चल—आ हमन भाग जावन!

राजा ह मोला अपन कमरा म ले जावय।

हमन तोर म आनंद अऊ खुसी मनाथन;

हमन अंगूर के मंद ले जादा तोर मया के गुनगान करबो।

ओमन तोर ले मया करके सही करथें!

5 हे यरूसलेम के बेटीमन,

मेंह कारी तो हंव, फेर सुघर हंव,

केदार*; यसा 21:16-17-17; भजन 120:5); येमन खास करके करिया तम्बू म निवास करंय के तम्बूमन सहीं कारी,

सुलेमान के तम्बू के परदामन सहीं।

6 मोला एकटक झन देख, काबरकि मेंह कारी हंव।

काबरकि मेंह सूरज ले झोला गे हंव।

मोर भाईमन मोर ले गुस्सा करिन

अऊ ओमन मोला अंगूर के बारीमन के रखवारीन बना दीन;

मेंह अपन खुद के अंगूर के बारी के रखवारी नइं करेंव।

7 मोला बता, तें मोर मयारू,

अपन भेड़-बकरीमन ला कहां चराथस?

अऊ मंझनियां तेंह ओमन ला कहां सुरताय बर रखथस?

तोर संगीमन के भेड़-बकरीमन के बाजू म,

मेंह काबर घूंघट ढांके माईलोगन सहीं होवंव?

8 हे सबले सुघर माईलोगन, कहूं तेंह नइं जानत हस,

त भेड़मन के खुर के चिनहां ला देखत चल

अऊ चरवाहामन के तम्बूमन के तीर म

अपन छेरी-पीलामन ला चरा।

9 हे मोर मयारू, मेंह तोर तुलना

फिरौन के रथमन म फंदाय घोड़ामन के बीच एक घोड़ी ले करथंव।

10 तोर गाल ह कनफूली के संग,

अऊ तोर घेंच ह जेवर ले पीरोय हार के संग सुघर लगथे।

11 हमन तोर बर चांदी के जड़े

सोन के कनफूली बनवाबो।

12 राजा ह जब अपन मेज करा बईठे रिहिस,

त मोर इतर ह अपन खुसबू फईलाईस।

13 मोर मयारू ह मोर बर लोहबान के छोटे खुसबू के थैली सहीं अय,

जऊन ह मोर छाती के बीच म रहिथे।

14 मोर मयारू ह मोर बर मेंहदी के फूलमन के गुच्छा सहीं अय,

जऊन ह एन-गदी* के अंगूर के बारीमन म मिलथे।

15 हे मोर मयारू, तें कतेक सुघर हस!

सिरतों म, कतेक सुघर हस!

तोर आंखीमन पंड़की के सहीं हवंय।

16 हे मोर मयारू, तें कतेक सुघर हस!

सिरतों म, कतेक मोह लेनेवाला हस!

अऊ हमर दसना ह ताजा हवय।

17 हमर घरमन के कड़ीमन देवदार के,

अऊ हमर छानी के लकड़ीमन घलो देवदार के अंय।