1 हे राजकुमारी, कतेक सुघर लगत हें,
पनही पहिरे तोर पांवमन!
तोर सुघर गोड़मन अइसे जेवर के सहीं अंय,
जऊन ला कोनो कारीगर ह अपन हांथ ले बनाय हवय।
2 तोर पेट के बोर्री ह गोल कटोरा के सहीं अय,
जेमा मसाला मिले मंद के कमी कभू नइं होवय;
तोर पेट ह गहूं के कुढ़ा के सहीं अय,
जऊन ह चारों कोति कुमुदिनी फूल ले सजे हवय।
3 तोर दूनों स्तन हिरन के दू ठन पीलामन के सहीं अंय,
हिरन के दू ठन जुड़वां पीला सहीं।
4 तोर घेंच ह हाथी-दांत के मीनार के सहीं अय।
तोर आंखी ह हेसबोन7:4 हेसबोन ह यरदन घाटी के पूरब कोति मोआब देस म एक सहर अय के ओ कुंड के सहीं अय
जऊन ह बेथ-रब्बीम के कपाट के लकठा म हवय।
तोर नाक ह लबानोन के ओ मीनार के सहीं अय
जेकर मुंहटा ह दमिस्क कोति हवय।
5 तोर मुड़ ह करमेल पहाड़ के सहीं तोला सोभा देवत हे।
तोर मुड़ के घुंघराली चुंदी ह राजसी कपड़ा के सूंत सहीं हवय;
राजा तो तोर बेनीमन म मोहा गे हवय।
6 हे मोर मयारू, तेंह कतेक सुघर
अऊ अपन खुसी के संग कतेक मनमोहनी अस!
7 तोर डीलडौल ह खजूर के रूख के सही अय,
अऊ तोर स्तन ह खजूर के झोंथामन सहीं अय।
8 मेंह कहेंव, "में खजूर के रूख म चघहूं;
मेंह ओकर फर ला धर लूहूं।"
तोर स्तन ह अंगूर के झोंथामन सहीं होवय,
तोर सांस के महक ह सेव फर के सहीं होवय,
9 अऊ तोर मुहूं ह खांटी अंगूर के मंद सहीं होवय।
दुलहिन
अंगूर के मंद ह सीधा जाके
मोर मयारू के ओंठ अऊ दांत ऊपर धीरे-धीरे बोहावय।
10 मेंह अपन मयारू के अंव,
अऊ ओह मोर लालसा करत रहिथे।
11 हे मोर मयारू, आ, हमन गांव के खेत कोति जावन,
आ, गांव म हमन अपन रात बितावन।
12 आ, हमन बिहनियां उठके अंगूर के बारी म जावन
अऊ ये देखन कि अंगूर के नार म फूल धरत हे कि नइं,
ओमन के कलीमन खिलत हें कि नइं,
अऊ अनार फूल खिलत हें कि नइं—
उहां मेंह तोला अपन मया दूहूं।
13 दूदा फर7:13 अइसे बिसवास करे जाथे कि ये फर ला खाय ले सारीरिक संबंध अऊ जननसक्ति बढ़थे; उत 30:14-16 ह अपन खुसबू बगरावत हे,
अऊ हमर मुंहटामन म जम्मो किसम के उत्तम फर हवंय,
नवां अऊ जुन्ना दूनों,
हे मोर मयारू, मेंह येला तोर बर कुढ़ोके रखे हंव।