होसे 10

1 इसरायल ह एक ठन बढ़त अंगूर के नार रिहिस;

ओह अपन बर फर देवत रिहिस।

जइसन-जइसन ओकर फरमन बढ़त गीन,

ओह अऊ जादा बेदीमन*10:1 या मूरती-पूजा के बेदीमन ला बनाईस;

जइसन-जइसन ओकर देस उन्नति करत गीस,

ओह अपन पबितर पथरामन ला सजाईस।

2 ओमन के मन ह धोखेबाज ए,

अऊ अब ओमन अपन अपराध के सजा जरूर पाहीं।

यहोवा ह ओमन के बेदीमन ला गिरा दीही

अऊ ओमन के पबितर पथरामन ला नास कर दीही।

3 तब ओमन कहिहीं, "हमर कोनो राजा नइं एं

काबरकि हमन यहोवा के आदर नइं करेंन।

पर कहूं हमर कोनो राजा होतिस घलो,

त ओह हमर बर का करतिस?"

4 ओमन बहुंत अकन वायदा करथें,

झूठा किरिया खाथें

अऊ करार करथें;

ये खातिर नांगर जोते खेत म उगे

जहरिला कांदी सहीं मुकदमामन होय लगथें।

5 जऊन मनखेमन सामरिया सहर म रहिथें

ओमन बेत-आवेन के बछवा के मूरती के कारन डरात हवंय।

एकर मनखेमन एकर बर बिलाप करहीं,

अऊ अइसने ही एकर मूरती-पूजा करइया पुरोहितमन घलो करहीं,

जऊन मन कि पहिले एकर वैभव ऊपर आनंद मनात रिहिन,

काबरकि येला ओमन ले छीनके बंधुवई म ले लिये गे हवय।

6 येला बड़े राजा ला भेंट के रूप म देय बर

अस्सूर देस ला ले जाय जाही।

एपरैम ला लज्जित करे जाही;

इसरायल घलो बाहिरी मनखेमन संग अपन नाता के कारन लज्जित होही।

7 सामरिया के राजा ला अइसन नास करे जाही,

जइसन रूख के एक छोटे डारा ह पानी के बहाव म नास हो जाथे।

8 बुरई के ऊंच ठऊरमन नास करे जाहीं—

येह इसरायल के पाप अय।

कांटावाले पऊधा अऊ झाड़ीमन उगहीं

अऊ ओमन के बेदीमन ला ढांप लीहीं।

तब ओमन पहाड़मन ले कहिहीं, "हमन ला ढांप लेवव!"

अऊ पहाड़ीमन ले कहिहीं, "हमर ऊपर गिर जावव!"

9 "हे इसरायल, तेंह गिबा के समय ले पाप करत आय हवस,

अऊ तेंह अभी घलो ओहीच म बने हवस।

का दुस्ट काम करइयामन गिबा म

फेर लड़ई म नइं फंसहीं?

10 जब मोर ईछा होही, तब मेंह ओमन ला दंड दूहूं;

आनजातमन, ओमन के दू गुना पाप के कारन

ओमन ला बंधन म डारे बर ओमन के बिरूध म इकट्ठा होहीं।

11 एपरैम ह एक सिखोय गय बछिया अय

जऊन ला अनाज मिंजई बने लगथे;

एकरसेति मेंह ओकर सुघर घेंच म

एक ठन जुड़ा ला रखहूं।

मेंह एपरैम ला चलाहूं,

यहूदा ला नांगर जोतना जरूरी अय,

अऊ जरूरी अय कि याकूब ह ढेला फोरय।

12 अपन बर धरमीपन के बीजा ला बोवव,

निस्कपट मया के फसल काटव,

अऊ बिगर जोताय खेत के माटी ला फोरव;

काबरकि येह यहोवा के खोज म रहे के समय ए,

जब तक कि ओह आके

तुम्हर ऊपर धरमीपन के बारिस नइं करय।

13 पर तुमन दुस्टता के बीजा लगाय हवव,

अऊ बुरई के फसल काटे हवव,

तुमन धोखा के फर ला खाय हवव।

काबरकि तुमन अपन खुद के सक्ति

अऊ अपन बहुंत अकन योद्धामन ऊपर भरोसा रखे रहेव।

14 तुम्हर मनखेमन के बिरूध लड़ई के ललकार होही,

ताकि तुम्हर जम्मो गढ़मन ला नास कर दिये जावय—

जइसन कि लड़ई के दिन, सलमन ह बेथ-आरबेल ला नास करिस,

जब दाईमन ला ओमन के लइकामन के संग भुइयां म पटकके मार डारे गे रिहिस।

15 हे बेतेल, तोर संग घलो अइसनेच होही,

काबरकि तेंह बहुंत दुस्ट काम करे हवस।

जब बिहनियां होही,

इसरायल के राजा ला पूरा नास कर दिये जाही।