होसे 3

होसे के अपन घरवाली के संग समझौता

1 यहोवा ह मोर ले कहिस, "जा अऊ अपन मया अपन घरवाली ला फेर देखा, हालाकि ओला कोनो अऊ मनखे ह मया करथे अऊ ओह एक छिनार अय। ओकर ले अइसन मया कर, जइसन यहोवा ह इसरायलीमन ले करथे, हालाकि इसरायलीमन आने देवतामन कोति जाके पबितर किसमिस के टिकियामन ले मया करथें।"

2 एकरसेति मेंह ओला चांदी के पंदरह सेकेल*3:2 लगभग 170 ग्राम अऊ लगभग एक होमेर अऊ एक लेथेक*3:2 एक होमेर अऊ एक लेथेक लगभग 195 किलोग्राम होथे जौ देके बिसा लेंव। 3 तब मेंह ओला कहेंव, "तोला मोर संग बहुंत दिन तक रहना हे; तोला बेस्या नइं बनना हे या कोनो मनखे के संग सारीरिक संबंध नइं बनाना हे, अऊ मेंह घलो तोर संग अइसनेच बरताव करहूं।"

4 काबरकि इसरायलीमन बहुंत दिन तक बिगर राजा या हाकिम, बिगर बलि या पबितर पथरा, बिगर एपोद या घर-देवता के रहिहीं। 5 ओकर बाद इसरायलीमन लहुंटहीं अऊ यहोवा, अपन परमेसर अऊ अपन राजा, दाऊद ला खोजहीं। ओमन आखिरी के दिनमन म कांपत यहोवा करा अऊ ओकर आसीस पाय बर आहीं।