1 तैही छ़ाडा सोभी रंगो बूरअ बभार करनअ। होरी लै निं धोखअ दैणअ, नां छ़ल़-कपट करनअ। होरी लै निं ज़ल़ण करनी। कोहिए बारै निं बूरी गल्‍ला करनी। 2 ज़िहअ एभै पैईदा हुअ द शोहरू आपणीं माओ क्लुध च़ाहा, तेही लागा हाम्हां च़ाहा डाहणीं कि परमेशर हाम्हां का सत्त खोज़े, ताकि तम्हैं तेता शिखल़ी करै परमेशरा दी विश्वास करना लै ज़ुआन शोहरू ज़िहै होए। खिरी हणअ इहअ कि परमेशरा बच़ाऊंणै तम्हैं एऊ संसारे बूरी गल्‍ला का पठी। 3 किल्हैकि पबित्र शास्त्र बोला इहअ, "तम्हां गअ तज़ुर्बअ हई कि प्रभू आसा भलअ।"✝

4,5 तम्हैं आऐ प्रभू ईशू सेटा। सह आसा तेऊ खास पात्थरा ज़िहअ ज़ुंण घअरे आथरी दी आसा लाअ द, पर सह आसा ज़िऊंदी ज़ान। कई लोगै समझ़अ सह बृथा, पर परमेशरै छ़ांटअ सह अर सह बणाअं सोभी का खास।

ज़िहै मणछ खास्सै पात्थरा करै घअर बणाआं तिहअ च़ाहा परमेशर तम्हां बी तैहा टोली दी कठा ज़ोल़णअ ज़ेथ पबित्र आत्मां रहा, ताकि ज़ुंण ईशू मसीहा म्हारी तैणीं किअ, तेता करै हाम्हैं बी प्रोहता ज़िहै होए ज़ुंण बल़ीदान भैंट दैआ अर तिहै काम करे ज़ेता करै परमेशर खुश हआ। 6 एता लै आसा पबित्र शास्त्रा दी बी लिखअ द,✝

"हेरा, सियोन नगरीए सोभी का खास कूणींए ज़ान डाहणीं मुंह किल्‍ली।

ज़ुंण बी तेऊ दी विश्वास करे, सह निं केही शर्मिंदअ हणअ।"

7 तम्हैं ज़ुंण विश्वास करा तम्हां लै आसा सह किम्मती पर ज़ुंण विश्वास नांईं करदै,✝

"सह ई पात्थर ज़ुंण राज़ मिस्त्री बृथा समझ़अ,

सह ई बणाअं तेऊ खास कूणींए ज़ान।"

8 तेखअ,✝

"सह आसा एही टोल्हा ज़िहअ ज़ेथ मणछा ठोहल़ लागा,

एही टोल्ह ज़ेता करै तिंयां बरैबाद हआ।"

तिन्‍नां लागा ठोहल़ तै कि तिंयां निं परमेशरो बैण मंदै अर तिन्‍नां लै आसा परमेशरै अह ई सज़ा डाही दी।

9 पर तम्हैं निं तिहै आथी, तम्हैं आसा परमेशरै आप्पू लै छ़ांटै दै। तम्हैं आसा तेऊ परमेशरे च़ाकरी करनै आल़ै प्रोहत ज़ुंण राज़अ आसा। तम्हैं आसा पबित्र अर परमेशरे आपणैं खास लोग ज़ुंण परमेशरे च़ाकरी करा। तेऊ शादै तम्हैं न्हैरै मांझ़ा का महान प्रैश्शै लै ताकि तम्हैं परमेशरे महान कामें बारै सोभी लोगा का खोज़ी सके।✝

10 होशे गूरै आसा थारै बारै अह गल्‍ल शुची बोली दी,✝

"तम्हैं निं पैहलै किछ़ बी आथी तै,

पर ऐबै आसा परमेशरे परज़ा,

पैहलै निं तम्हां परमेशरे झींणें बारै थोघ आथी त,

पर ऐबै आसा थोघ किल्हैकि तेऊ हेरी पैहलै ई तम्हां लै आपणीं झींण रहैऊई।"

11 मेरै पैरै भाईओ, हुंह करा तम्हां लै अरज़ तम्हैं सोठा ऐहा गल्‍ला, "तम्हैं आसा एऊ संसारै परदेसी" ज़सरअ असली घअर स्वर्गै आसा, तम्हैं करनी तिन्‍नां पापी कामां का दूर रहणें कोशिश ज़ुंण थारै प्राण करनअ च़ाहा। नांईं ता तम्हैं निं परमेशरा नेल़ रही सकदै।✝

12 तम्हां फेर रहा तिंयां लोग ज़ुंण परमेशरा दी विश्वास निं करदै तिंयां सका इहअ तम्हां लै दोश लाई कि थारै काम आसा बूरै। तैही डाहणअ धैन कि तम्हैं किहअ बभार करा, ताकि तिंयां थारअ भलअ बभार भाल़े। खिरीए धैल़ी मनणी तिन्‍नां अह गल्‍ल कि थारअ बभार आसा भलअ अर खिरी करनअ परमेशरो अदर ज़ेभै मसीहा ईशू संसारे नसाफ करदअ पृथूई लै फिरी एछणअ।✝

13 प्रभूओ अदर करना लै लागा हाम्हां तिन्‍नों हुकम मनणअ ज़ुंण संसारै हाम्हां प्रैंदै राज़ करा, ज़िहअ कि राज़अ, ज़ुंण सोभी प्रैंदै प्रधान आसा। 14 हाकम, ज़हा लै राज़ै आसा हक दैनअ द, तिंयां आसा तिन्‍नां लै सज़ा दैंदै छ़ाडै दै ज़ुंण गलत करा अर तिन्‍नां सराहंदै ज़ुंण भलअ करा।

15 किल्हैकि परमेशर च़ाहा इहअ ई कि म्हारअ भलै बभारा करै छ़ाडणअ तिन्‍नां मणछा हाम्हां लै झ़ुठअ दोश लाणअ ज़हा का परमेशरो थोघ निं आथी। किल्हैकि अह गल्‍ल आसा पाक्‍की कि तिन्‍नें झ़ुठै दोश निं शुचै आथी। 16 पर तम्हैं ज़िहअ च़ाहा, तिहअ करनै का निं तम्हां कोहै रोक्‍की सकदअ किल्हैकि तम्हैं आसा पैहलै ई म्हारै प्रभू ईशू मसीहा करै आज़ाद हेरै दै करी। पर एता निं पाप करना लै मोक्‍कअ समझ़ी। पर थारै कामां करै लोल़ी शुझुअ कि तम्हैं आसा असली दी परमेशरे च़ाकरी करनै आल़ै दास। 17 सोभिओ करा अदर, होरी विश्वासी भाई संघै डाहा झ़ूरी, परमेशरा का डरनअ अर राज़ैओ करा अदर।✝

18 तम्हैं कसरै घअरै काम करनै आल़ै दास ज़ुंण विश्वासी आसा, तम्हां लागा आपणैं मालके हर गल्‍ला मनणी अर तिन्‍नों अदर करनअ। एता करै तम्हैं सोभी मालका लै, च़ाऐ तिंयां झणैल़ू होए, च़ाऐ तिन्‍नों बभार तम्हां लै काठअ होए। 19 किल्हैकि, ज़ै कुंण हाम्हां दी दोश नांईं हंदी बी हाम्हां लै दुख दैआ, हाम्हैं ज़िरा तैहा बेनसाफी बी मज़ै करै। किल्हैकि हाम्हां का आसा थोघ कि परमेशरा का आसा सोभी गल्‍लो थोघ अर सह आसा हाम्हां करै खुश। 20 किल्हैकि, ज़ै तम्हैं ज़ुल्म करी धमुक्‍कै खाऐ अर सबर डाहअ, तै तेते किज़ै सराहणे गल्‍ल हुई? पर ज़ै तम्हां भलै काम करी दुख भेटा अर सबर करा, तेता करै हआ परमेशर खुश।

21 तम्हां शादणेंओ आसा परमेशरो एक मकसद इहअ बी कि तम्हैं भलै काम करनै पिछ़ू बी तेऊ लै दुख ज़िरे। मसीहा ज़ुंणी थारी तैणीं दुख ज़िरै, सह आसा तम्हां लै आदर्श। तैही लागा तम्हां तिहअ करनअ ज़िहअ तेऊ किअ।

22 "पबित्र शास्त्र बोला इहअ,

"तेऊ निं कधि पाप किअ, नां तेऊ किज़ै झ़ुठअ बोलअ।✝

23 "ज़ेभै लोग ईशूए बेइज़ती करा तै, सह निं तिन्‍नां बापस बेइज़ती करदअ त। ज़ेभै लोग तेऊ लै दुख दैआ तै सह निं तिन्‍नां लै बापस धमकी दैंदअ त। पर सह करा त आपणीं मज़ती लै परमेशरा दी भरोस्सअ। तेऊ का थिअ थोघ कि परमेशर आसा सदा शुचअ नसाफ करनै आल़अ।✝

24 "ज़ेभै ईशू क्रूसा दी मूंअ, तेऊए देही दी दैनी म्हारै पापा पिछ़ू सज़ा। तेऊ किअ अह एते तैणीं कि पाप हाम्हां दी आजू राज़ नां करे, पर ऐबै हाम्हैं तिन्‍नां धर्मीं गल्‍ला करे ज़ुंण परमेशर च़ाहा। ज़ुंण कोल़े मार तेऊ ज़िरी, हाम्हैं हुऐ तेता करै नरोगै।"✝

25 तम्हैं थिऐ पैहलै कबाता पेठी दी भेडा ज़िहै। पर ऐबै आऐ आपणैं हेर-सभाल़ करनै आल़ै फुआल मसीहा सेटा लै भिई फिरी।✝