1 तैही ज़ै मसीहा देही दी रहंदी दुख भुगतअ, तम्हां बी लागा तेऊ ई ज़िहै दुख भुगतणा लै तैर रहणअ। ज़ै तम्हैं मसीहे हणैं पिछ़ू देही दी दुख भुगतणअ च़ाहा, तम्हैं हेरअ तै पाप करनअ छ़ाडी। 2 एतो नतिज़अ हणअ इहअ कि आजू निं तेऊ मणछा आपणीं ज़िन्दगी कदुष्ट काम करनै ज़ुंण एऊ संसारे मणछ हर बगत करनअ च़ाहा। पर तेऊ करनअ तिहअ ज़िहअ परमेशर तेऊ लै करना लै बोले।

3 पैहलै च़ाहा तै तम्हैं इहै काम करनै ज़ेथ विश्वास नांईं करनै आल़ै मज़अ लागा त, तम्हैं करा तै आपणीं ज़िन्दगी कदुष्ट काम करना लै बरैबाद ज़िहअ कि शराब अर खाणैं पिणैं दी, कंज़रैई दी अर नशर्म नाच़-खेल्हा दी अर मुहुर्ती पूज़ा दी ज़ेता का परमेशर नफरत करा।

4 तैही हआ तिन्‍नां थारै पराणैं साथी रहैनी कि तम्हैं निं इहै भारी इना कदुष्ट कामां दी तिन्‍नें साझ़ू हंदै अर तैही करा तिंयां थारी निंदा। 5 पर एक धैल़ी एछणी एही बी ज़रूर ज़ेभै तिन्‍नां परमेशरा सम्हनै इना सोभी बूरी गल्‍लो साब-कताब लागणअ दैणअ। परमेशर आसा सोभी लोगे नसाफ करना लै तैर, च़ाऐ तिंयां अज़ी ज़िऊंदै आसा, च़ाऐ तिंयां पैहलै होए मरी गऐ दै।✝

6 तैही खोज़अ तिन्‍नां मणछा का बी मसीहा खुशीओ समाद ज़ुंण पैहलै ई थिऐ मरी गऐ दै। एही ता भुगती तिन्‍नैं सोभी मणछा ज़ेही सज़ा अर तिंयां मूंऐं, पर ऐबै आसा तिंयां आत्मां दी परमेशरा संघै सदा ज़िऊंदै।

7 एऊ संसारो अंत आसा छ़ेक्‍कै हणैं आल़अ, तैही करा तम्हैं आप्पू सबर, संघा रहा सादै-सिधै रही प्राथणां करदै लागी।✝

8 सोभी लै आसा सोभी का ज़रूरी गल्‍ल एही कि एकी-दुजै लै करा दिला का झ़ूरी। किल्हैकि, ज़ै तम्हैं मणछा लै झ़ूरी करे तै हणैं तम्हैं तिन्‍नें हर गलती माफ करना लै हर बगत तैर।✝

9 ज़ै कुंण विश्वासी हांढदी-फिरदी थारै घअरै प्राहुंणअ एछे, तेऊ लै निं नराज़ हणअ, पर तम्हैं तेऊए च़ाकरी खुशी दिलै।

10 सोभी मणछा आसा परमेशरा का किज़ै नां किज़ै बरदान भेटअ द अर तेऊ लागा तेऊ बरदाना करै दुजे च़ाकरी करनी। तिन्‍नां लागा तिंयां बरदान राम्बल़ै करै कामैं लाणैं ज़ुंण तिन्‍नां लै परमेशरै आपणैं जशा करै आसा दैनै दै। 11 ज़ै तम्हां का प्रच़ार करनैओ बरदान आसा, तम्हां लागा परमेशरो बैण प्रच़ार करनअ। ज़ै तम्हां का होरीए मज़त करनैओ बरदान आसा, तेऊ करै पूरअ ज़ोर लाई ज़ुंण तम्हां लै परमेशरै आसा दैनअ द। तेखअ तम्हैं ज़िहअ बी करे तेता करै हणअ मसीहा ईशू बाती परमेशरो प्रतप्प। सारअ प्रतप्प अर राज़ आसा सदा-सदा लै तेऊओ ई! एवमस्तू।

12 मेरै पैरै भाईओ, तिन्‍नां गल्‍ला लै निं रहैन हई ज़ुंण दुख दाह तम्हैं मसीहा ईशूए हणैं पिछ़ू तम्हैं भुगतदै आसा लागै दै। पर ईंयां गल्‍ला आसा एते तैणीं लागी दी हंदी कि थारै विश्वासे परख होए कि असली दी थारअ विश्वास परमेशरा दी आसा कि नांईं। इहअ निं सोठा कि ईंयां एही गल्‍ला किल्है आसा लागी दी हंदी ज़ुंण हाम्हां लै पाखली आसा। 13 एते बारै रहा इहअ सोठी करै खुश कि तम्हैं हुऐ मसीहे तिन्‍नां दुखा दी साझ़ू ज़ुंण तेऊ ज़िरै। किल्हैकि तम्हैं बी आसा तिहै ई दुख ज़िरदै लागै दै। ज़ेभै मसीहा ईशू सोभी लोगा लै आपणैं प्रतप्पा प्रगट करदअ फिरी एछणअ, तेभै हणीं तम्हां होर बी खास्सी खुशी।

14 तेखअ ज़ै मसीहे नाओंआं लै थारी निंदा बी हआ, परमेशरा दैणीं तम्हां लै बर्गत। किल्हैकि एता करै लागा थोघ कि परमेशरे प्रतप्पा आल़ी आत्मां खोज़ा तम्हां संघै रही कि परमेशर किहअ महान आसा।✝

15 तम्हां मांझ़ै निं कोई बी मणछ हत्या करनै आल़अ, या च़ोर, या कदुष्ट कामां करनै आल़ै हणैं या पराऐ कामां दी खरोल़ पाई निं दुख भुगती। 16 पर ज़ै तम्हैं मसीही हणें पिछ़ू तम्हैं दुख भेटे, तै निं तम्हैं शर्मिंदै हई, पर ऐहा गल्‍ला लै करै परमेशरे ज़ै-ज़ैकार।

17 हुंह बोला इहअ एते तैणीं कि परमेशरो नसाफ हणैंओ बगत गअ नेल़ एछी। पैहलै करनअ तेऊ तिन्‍नां लोगो नसाफ ज़ुंण तेऊए आपणैं आसा। ज़ै परमेशरा हाम्हां विश्वासीओ नसाफ पैहलै करनअ, तैहा डरैऊंणी गल्‍ले बारै सोठा ज़ुंण तिन्‍नां मणछा लै हणीं ज़ुंणी परमेशरा का आअ द सह खुशीओ समाद नांईं मनअ।✝

18 ज़िहअ पबित्र शास्त्र बोला,✝

"ज़ै धर्मीं मणछा फल ऐहा ई धरती दी फल भेटा,

तै भेटणअ कदुष्ट अर पापी मणछा बी तिन्‍नों फल ज़रूर।"

19 तैही ज़हा तिहअ दुख भेटअ ज़िहअ परमेशर च़ाहा तिन्‍नां लागा सदा तेऊ परमेशरा दी भरोस्सअ डाहणअ ज़ुंणी तिंयां बणाऐं दै आसा। परमेशर करा सदा तिहअ ई ज़िहअ सह बोला। इहअ करै रहा हर बगत भलै करदै लागी