नर
1 ए मेरी झ़ूरीऐ, तूह आसा राज़े देई ज़ेही!
तेरै खूर ढबा पूल़ा दी बेघै बित्तै,
तेरी ज़ांघा पिछ़लअ घेरअ आसा गैहणैं ज़िहअ बित्तअ
सह ज़ाण्हिंआं कुंणी सज़ाण सनारै बणाअं द।
2 तेरी नाही आसा इहै कुंधल़ू ज़ेही,
ज़ुंण कबल्लअ मसालै राल़ै दै दाखे रसा करै भरी रहा।
तेरअ पेट आसा पूणैं दै कणके रूल़ा ज़िहअ
ज़ेथ फेर सुरघे फूल आसा डाहै दै।
3 तेरी दुहै हिक्का आसा
हरनीए दोगल़ बच़ै ज़ेही।
4 तेरअ गअल़ आसा हाथी दांदे उछ़टै कोटा ज़िहअ आज़रअ,
तेरी आछी आसा तिन्नां पाणींए सअरा ज़ेही,
ज़ुंण हेशबोन नगरीए प्रऊल़ी नेल़ आसा।
तेरअ नाक आसा लाबानोने कोठी ज़िहअ,
ज़ुंण दमिश्क नगरी बाखा पहरअ करा।
5 तेरअ मूंड शोभा ताह दी कर्मेल धारा ज़िहअ
अर तेरअ खुल्हअ मूंड आसा
बैंज़णीं रांगे मुखमले झिकल़ै ज़िहै लोभणैं आल़ै,
तेते गुछ़टी सका कहा राज़ै बी गलाम बणाईं।
6 मेरी झ़ूरीऐ, तूह आसा सच्च़ी बेघै हेरनी शुणनी अर
दिला लोभणैं आल़ी।
7 लाम्मी-पल़ामीं शोभा तूह खज़ूरे बूटा ज़ेही,
तेरी हिक्का आसा दाखे लुम्बरू ज़ेही।
8 हुंह बोला आप्पू लै इहअ,
"एऊ खज़ूरे बूटा दी उखल़ी काढणैं मुंह एते फल़।"
तेरी दुहै हिक्का आसा मुल्है दाखे लुम्बरू ज़ेही
अर तेरी हिक्का का एछा मुंह सेओआ ज़ेही खुशबू।
9 तेरै होठै माख्खू दैणैंओ एछा
बधिया दाखे रसा झुटणैं ज़िहअ मज़अ,
ज़ुंण सुलै-सुलै होठा अर दांदा प्रैंदै बगा।
नार
10 हुंह आसा मेरै लोभिए अर सह बी च़ाह मुंह।
11 मेरै लोभिआ, एछ, हाम्हां डेऊणअ गराऊंआं का दूर
संघा काटणी हाम्हां सारी राच बणें फूला जैंदरी।
12 दोत्ती-दोत्थी उझ़ुई डेऊणअ हाम्हां दाखे बागा लै हेरा-भाल़ा,
कि दाखे बेला बी टिप्पी अर
फूले डोडी बी खिल्ली होए,
अर नारदाणैं बी भाल़णैं हाम्हैं फुल्लै कि नांईं।
तिधी करूं हुंह ताल्है खास्सी झ़ूरी।
13 गुआंकल़ी का आसा लागी दी शोभली बास्स,
म्हारै दुआरै आसा नऊंऐं-पराणैं
सोभी रंगे बधिया का बधिया फल़,
मेरै लोभिआ, तिंयां सोभै आसा मंऐं
तेरी तैणीं डाहै दै झाल़ी।