1 सुलैमान राज़ै लिखै दै भौंरु।

2 तूह रहअ मुल्है आपणैं होठा करै माख्खू दैंदअ लागी

तेरी झ़ूरी आसा दाखे रसा का बी बधिया,

3 तेरअ खुशबूदार तेल दैआ मेरअ दिल खुश करी।

तेरअ नाअं आसा खुशबू ज़िहअ सारै दी छिंघूअ द,

तैही झ़ूरा सारी खारकी शोहरी ताल्है!

4,5 मेरै राज़ैआ, छ़ेक्‍कअ कर, छ़ेक्‍कअ कर

मुंह निंऊं आपणैं मैहला लै।

हाम्हैं आसा ताह संघै राज्ज़ी!

हाम्हैं झ़ूरा तेरी झ़ूरी लै

दाखे रसा का बी खास्सी।

एरुशलेम नगरीए बेटल़ीओ,

थारअ एऊ लै झ़ूरनअ

आसा एकी साबै ठीक

हुंह आसा शाऊंणी पर हेरनी आसा एही बित्ती

ज़िहअ रेगीस्तानै कदारो खिम्भ,

अर ज़िहै सुलैमान राज़े मैहलै लागै दै पल्दै।

6 मुल्है निं तम्हैं फ्रिशदी लागा कि हुंह आसा शाऊंणी

धुप्पै करै हुई मेरी घेर एही काल़ी,

मेरै होरी भाई लागा ती मेरी रोश्श

तिन्‍नैं डाही हुंह ज़ोरा-ज़ोरी आपणैं दाखे बागा पहरी लाई

इहअ करै निं मुंह आपणीं घेरीए कारी-फाज़त करनैओ बगत ई भेटअ।

7 मेरै लोभिआ, मुखा खोज़,

ताह आपणीं भेडा-बाकरी किधा लै निंणीं च़रदी?

तूह दपहरै तिन्‍नां लै किधी दैआ बशैघ?

मुंह कै ज़रुरत आसा कि हुंह रहूं

फुआले हेल़्ही जैंदरी ताह लोल़ी लागी?

8 सोभी का सुंदर नार, ज़ै ताखा थोघ निं आथी,

तै भाल़ै भेडा-बाकरीए छ़ल़ूए नछ़ैण

संघा लागै तेथ बाखा हांढदी

आपणैं गाभू-छ़ेल्हूए हेल़्ही च़राऊऐ तूह

होरी फुआले खिम्भा नेल़-नेल़।

9 मेरी झ़ूरीऐ, मंऐं समझ़ी तूह

मिसर देशे माहा राज़ेए होछ़ै रथा दी ज़ुंडी दी घोल़ी ज़ेही।

10 लाम्मी कनूरी शोभा तेरै गलेटै प्रैंदै होर बी खास्सी,

हार-शंगारा करै ढबा तेरअ गअल़ बेघै बधिया।

11 हुंह बणाऊं ताल्है

सुन्‍नैं-च़ंदीए किम्मती हार।

12 मेरअ राज़अ त आपणैं पलगा प्रैंदै बेठअ द,

मेरै खुशबूदार जटामांसीए तेला का थिई शोभली बास्स लागी दी।

13 मेरै लोभिआ, तूह आसा सैंटे शिश्शी ज़िहअ

ज़ुंण मंऐं दुही हिक्‍का मांझ़ै हआ डाही दी।

14 तूह आसा मैहंदीए फूले लुम्बरू ज़िहअ

ज़ुंण एनगादी* ज़ैगा दाखे बागा दी हआ।

15 मेरी झ़ूरीऐ, तूह भाल़ हेरनी केही बित्ती आसा

तेरी आछी आसा कबूतरी ज़ेही।

16 मेरै लोभिआ, तूह बी भाल़ हेरनअ किहअ बित्तअ आसा,

तूह आसा दिला लोभणैं आल़अ

म्हारै बैहे पैहली राची हणअ म्हारै च़ैना प्रैंदै हरअ घाह

17 म्हारै घअरे मेल़ आसा केल़ुईए

अर छ़ाप्परे छ़ैट्ठी हणीं कैलीए बूटे।