Daniel 3

नबूकदनेसरे बडी मुहुर्ती

1 एकी धैल़ै ती नबूकदनेसर राज़ै एक सुन्‍नें बडी मुहुर्ती डाही दी बणाईं। सह मुहुर्ती ती कोई शाठ हाथ लाम्मी अर छ़ह हाथ बिरली। तेऊ ती सह मुहुर्ती बाबेल देशै दूरा नाओंए सरलै मुल्खै डाही दी खल़ी करी स्तापी। 2 नबूकदनेसर राज़ै दैनअ आपणीं सोभी मुल्खे सैणैं, कार-करिंदै, राज़पाल, बज़ीर, भढारी, जज, शास्त्री अर सोभी सरकारी अफसरा लै समाद कि तिंयां सोभ लोल़ी तैहा मुहुर्तीए प्रतिष्ठा लै आऐ। 3 ज़ांऊं तिंयां सोभ सैणैं, कार-करिंदै, राज़पाल, बज़ीर, भढारी, जज, शास्त्री अर सोभी सरकारी अफसर प्रतिष्ठा लै आऐ, तिंयां सोभ खल़्हुऐ नबूकदनेसर राज़ै खल़ी किई दी तैहा मुहुर्ती आजू तेतो अदर करना लै।

4 तेखअ बोलअ ज़ेल़तै ज़ोरै-ज़ोरै इहअ, "देशा-देश, ज़ाती-ज़ाती अर ज़ुदी-ज़ुदी भाषा-बोली बोल़णैं आल़ै लोगो, तम्हां लै किअ माहा राज़ै हुकम ज़ारी कि 5 ज़ेभै तम्हां का नर्शिंगै, बींन, कतारै, सरनाई अर होर गाज़ै-बाज़ै शुण्हिंए, तम्हैं टेक्‍कै तेभै सोभ ऐहा मुहुर्ती सेटा उटै पल़ी माथअ ज़ुंण नबूकदनेसर माहा राज़ै आसा खल़ी किई दी। 6 ज़ुंण बी उटै पल़ी ऐहा मुहुर्ती सेटा माथअ नांईं टेक्‍के, सह पाणअ राज़ै तेभी बडै आगीए ज़ल़दै भैठै दी।"

7 इहअ करै ज़िहअ ई तिन्‍नां देशा-देशे अर ज़ुदी-ज़ुदी भाषा-बोलीए लोगा का नर्शिंगै, बींन, कतारै, सरनाई अर होर गाज़ै-बाज़ै बाज़दै शुण्हिंआं तै, तिंयां करा तै धरनीं उटी बाखा माथअ टेक्‍की तैहा सुन्‍नें मुहुर्तीए स्तोती ज़ुंण नबूकदनेसर राज़ै ती स्तापी दी।

दानिएले साथी निं राज़ैओ हुकम मनअ

8 तेखअ डेऊऐ कोऐ कसदी शास्त्री राज़ै सेटा लै संघा लागै तेऊ सेटा यहूदीए निंदा करदै, किल्हैकि तिंयां डाहा तै तिन्‍नां संघै ज़ीद। 9 तिन्‍नैं बोलअ नबूकदनेसर राज़ै लै, "माहा राज़अ, तेरी अमर लोल़ी खास्सी हुई! 10 पर माहा राज़अ, तंऐं किअ त इहअ हुकम ज़ारी कि ज़ेभै नर्शिंगै, बींन, कतारै, सरनाई अर होर गाज़ै-बाज़ै बाज़दै शुण्हिंए, तेभै लोल़ी सोभी ऐहा सुन्‍नें मुहुर्ती सेटा उटै पल़ी माथअ टेक्‍की एते स्तोती किई! 11 अर ज़ै कुंण उटै पल़ी ऐहा मुहुर्ती सेटा माथअ नांईं टेक्‍के, सह पाणअ राज़ै तेभी बडै आगीए ज़ल़दै भैठै दी। 12 माहा राज़, यहूदी मणछा मांझ़ै आसा इधी इहै बी ज़ुंण तेरअ हुकम मंदै ई निं आथी! तंऐं आसा तिन्‍नां यहूदी का बाबेल देशे कई मुल्खो सरकारी काम तोही सभाल़अ द! ईंयां आसा शदराक, मेशक अर अबेदनागू ज़ुंणीं तेरअ हुकम नांईं मनअ। ईंयां निं तेरै देअआ मंदै अर नां इनै तैहा सुन्‍नें मुहुर्ती सेटा माथअ टेक्‍कअ ज़ुंण तंऐं आसा स्तापी दी।"

13 इना गल्‍ला शूणीं आई नबूकदनेसर राज़ै खास्सी रोश्शै अर तेऊ किअ हुकम कि शदराक, मेशक अर अबेदनागू आणा मुंह सेटा लै। ज़ांऊं तिंयां राज़ै सेटा हाज़र किऐ, 14 नबूकदनेसर राज़ै पुछ़अ शदराक, मेशक अर अबेदनागू का, "ईंयां गल्‍ला सच्च़ी आसा कि तम्हैं निं मेरै देअआ मंदै अर नां तम्हैं तैहा सुन्‍नें मुहुर्ती सेटा माथअ टेक्‍कदै ज़ुंण मंऐं आसा स्तापी दी? 15 ऐबै ज़ै तम्हैं नर्शिंगै, बींन, कतारै, सरनाई अर होर गाज़ै-बाज़ै बाज़दै शूणीं मंऐं स्तापी दी सुन्‍नें मुहुर्ती सेटा माथअ टेक्‍की स्तोती करे, तै आसा ठीक। पर ज़ै तम्हैं माथअ नांईं टेक्‍के, तै पाणै तम्हैं तैहा ई घल़ी बडै आगीए ज़ल़दै भैठै दी। तेखअ भाल़ूं हुंह कि तम्हां बच़ाऊंदअ कुंण भगबान एछणअ?"✝3:15 2 राज़. 18:35

16 शदराक, मेशक, अबेदनागू बोलअ नबूकदनेसर राज़ै लै, "माहा राज़, ऐहा गल्‍ला लै निं हाम्हैं ताल्है किछ़ै बोल़णअ च़ाहंदै। 17 माहा राज़अ, ज़हा परमेशरे च़ाकरी अर स्तोती हाम्हैं करा, सह सका हाम्हां बडै ज़ल़दै आगीए भैठै का बच़ाऊई अर ताखा बी छ़ड़ैऊई। 18 पर ए माहा राज़अ, ज़ै सह इहअ नांईं बी करे, तैबी लअ तूह ऐहा गल्‍ला समझ़ी कि हाम्हैं निं तेरै देअआ-देबीए पूज़ा करदै, नां हाम्हां ऐहा सुन्‍नें मुहुर्ती सेटा माथअ टेक्‍कणअ ज़ुंण तंऐं आसा स्तापी दी।"

दानिएले साथी पाऐ आगीए भैठै दी

19 इना गल्‍ला शूणीं आई नबूकदनेसर राज़ै खास्सी रोश्शै, तेऊ काढै शदराक, मेशक अर अबेदनागू लै बडै-बडै टैंडै। संघा किअ तेऊ हुकम कि एऊ बडै आगीए भैठै ज़ाल़ा इहै कि एथ लोल़ी एता का सात गुणा खास्सी आग भकी। 20 तेखअ किअ तेऊ आपणीं सैना मांझ़ै सोभी का जोधै लै हुकम कि शदराक, मेशक अर अबेदनागू पाआ इने हाथ-खूर बान्हीं करै बडै आगीए ज़ल़दै भैठै दी। 21 तिन्‍नैं बान्हैं तिंयां च़ोल़ै, सदरी टोप सुथणीं अर तिन्‍नैं बान्हैं दै सोभी झिकल़ै संघी, संघा शोटै तेऊ बडै ज़ल़दै भैठै दी। 22 नबूकदनेसर राज़ै त काठअ हुकम ज़ारी किअ द अर भैठै दी थिई खास्सी आग भकी दी अर तेता का थिऐ उझै तैणीं आगीए लुपल़ै लागै दै। ज़ुंण सपाही शदराक, मेशक, अबेदनागू च़की करै आगीए तेऊ भैठै दी शोटै; तिंयां मूंऐं भैठै का निखल़ै दै आगीए लुपल़ै करै बागै ई। 23 शदराक, मेशक, अबेदनागू तै भैठै दी घणीं आगी जैंदरी शोटी हेरै दै अर तिंयां तै सारी घेरी का पिड्डै बान्हैं दै।

24 राज़अ नबूकदनेसर त तिन्‍नां भाल़अ लागअ द कि तिंयां आगी जैंदरी किहै दझ़णैं, पर सह हुअ तेता भाल़ी रहैन अर तेऊ बुल़्हअ गाद्दी प्रैंदा का उझै त्रुपल़अ संघा हुअ खल़अ। तेऊ पुछ़अ आपणैं बज़ीरा का, "हाम्हैं पाऐ तै तिंयां ई चअन ज़ण्हैं बान्हीं करै आगी जैंदरी भाल़ी?"

तिन्‍नैं दैनअ ज़बाब, "हाँ माहा राज़अ, तिंयां ई चअन पाऐ एथ।"

25 राज़ै बोलअ, "तै मुखा किल्है शुझिआ इहअ कि आगीए बडै कूंडा जैंदरी आसा च़ार मणछ हांढदै लागै दै? नां ईंयां बान्हैं दै शुझदै अर नां इना आगी करै किछ़ हान्‍नी हुई! अह च़ौथअ मणछ शुझिआ मुखा स्वर्ग दूता ज़िहअ*3:25 स्वर्ग दूता ज़िहअ ज़िहअ कि सह आसा परमेशरो शोहरू!"

नबूकदनेसर राज़ै किऐ चिहै ज़ण्हैं आज़ाद

26 तेखअ डेऊअ नबूकदनेसर राज़अ तेऊ ज़ल़दै भैठै नेल़ मोहरै दी संघा लाई ज़ोरै हाक्‍का, "शदराक! मेशक! अबेदनागू! बागा लै एछा! परम प्रधान परमेशरे दासो! आगी जैंदरा का एछा बागै!"

तिंयां निखल़ै चिहै ज़ण्हैं राज़ेए हाक्‍का शूणीं तेभी बागै। 27 सैणैं, कार-करिंदै, राज़पाल, बज़ीर, भढारी, जज, शास्त्री अर राज़ेए सोभ सरकारी अफसर झाल़्हुऐ तिन्‍नां चिई ज़ण्हैं भाल़ै ज़हा ज़ल़दै भैठै दी आगी जैंदरी किछ़ हान्‍नी निं हुई। तिन्‍नें निं देहीओ एक शराल़ बी झल़ुशुअ! नां तिन्‍नें झिकल़ै दझ़ै अर तिन्‍नां दी निं आगी जैंदरा का निखल़ी धूँए बास्स बी आथी ती लागी दी।

28 नबूकदनेसर राज़ै बोलअ, "ज़ुंण शदराक, मेशक अर अबेदनागूओ परमेशर आसा, हुंह करा तेऊए ज़ै-ज़ैकार। तेऊ छ़ाडै आपणैं स्वर्ग दूत इना मणछा बच़ाऊंदै ज़ुंण तेऊए च़ाकरी करा अर तेऊ परमेशरे आसरै रहा। इनै निं तेऊ परमेशरा लै मेरअ हुकम मनअ अर होरी देअआ-देबीए पूज़ा करनै का समझ़अ इनै आप्पू मरनअ ई खरअ।

29 "ऐबै करा हुंह इहअ हुकम ज़ारी कि देशा-देशे अर हर भाषा-बोली बोल़णैं आल़ै लोग ज़ुंण शदराक, मेशक, अबेदनागूए परमेशरे खलाफ किज़ै बोले, तेऊए करनै मुंह काटी करै ठोर-ठोर। तिन्‍नें घअर पाणै ढोल़ी कि तेथ रहणअ सिधअ माट्टै-गट्टैओ रूल़। किल्हैकि इने परमेशरा ज़िहअ निं कुंण देअ नां देबतअ आथी ज़ुंण इहअ बच़ाऊई सका।"

30 नबूकदनेसर राज़ै किई शदराक, मेशक अर अबेदनागूए खास्सी इज़त अर तेऊ बशैल़ै तिंयां बाबेल देशे मुल्खै बडी-बडी पदबी दी।