दानिएल 5

बेलशेसर राज़ै दैनी धाम

1 ज़ांऊं बेलशेसर बाबेल देशो राज़अ बणअ, तेऊ दैनी आपणैं एक हज़ार कार-करिंदै लै बडी धाम आप्पू बी झुटी तेऊ तिन्‍नां संघै शराब। 2 ज़ांऊं तेऊ खास्सी शराब झुटी, तेऊ किअ आपणैं दासा लै हुकम कि तिन्‍नां सुन्‍नें किम्मती कऊली अर गलासा आणा ज़ुंण तेऊए बाब नबूकदनेसर राज़ै एरुशलेम नगरी बिधाते भबना का थिऐ लुटी आणै दै।✝5:2 2 राज़. 25:15 राज़अ बेलशेसर च़ाहा त तेऊए खास कार-करिंदै अर सह आप्पू आपणीं सोभी राणीं अर डाही दी बेटल़ी संघी तिन्‍नां भांडै दी शराब झुटणअ।

3 दासै किअ ज़िहअ राज़ै हुकम किअ तिहअ ई। ज़ुंण सुन्‍नैं-च़ंदीए भांडै एरुशलेम बिधाते भबना का लुटी तै आणै दै, तिंयां आणै तिन्‍नैं बेलशेसर राज़ै सेटा। तेखअ झुटी राज़ै, तेऊए खास कार-करिंदै अर तेऊए सोभी राणीं अर डाही दी बेटल़ी तिन्‍नां भांडै दी शराब। 4 शराब झुटी लागै तिंयां आपणैं देअआ-देबीए ज़ै-ज़ैकार करदै ज़ुंण सुन्‍नैं, च़ंदी, पितल़, लोहै, काठा अर पात्थरे थिऐ बणाऐं दै।✝5:4 भज. 135:15-18

5 तिधी शुझुअ नच़ानक राज़ै का मणछे हाथा ज़िहअ। सह हाथ लागअ गुंठी करै सदीऐ पिछ़ू च़ुन्‍नैं लाई दी भित्ती दी लिखदअ अर राज़अ लागअ तेता भाल़अ। 6 एता भाल़ी फिरअ राज़ैओ मुंह शेफल़अ अर तेऊ छ़ुटी डरै हाथै-खूरै एही काम्मणीं कि तेऊए ज़ान्हूं लागै जल़ाखदै।

7 राज़ै पाई तेभी आपणैं दासा लै हाक संघा किअ हुकम कि जोतषी, कसदी पंडत अर मणशाण झ़ैऊंणै आल़ै आणा मुंह सेटा लै शादी। ज़ांऊं तिंयां राज़ै सेटा हाज़र किऐ, तेऊ पुछ़अ तिन्‍नां का, "ज़ुंण अह भित्ती दी लिखअ द पहल़े अर तेतो मतलब बी मुखा खोज़े, तेऊ लै बन्हैऊंणैं मुंह तिंयां किम्मती झिकल़ै ज़ुंण राज़अ बान्हां, गल़ै पाणीं तेऊए सुन्‍नें कंठी अर तेऊ लै दैणीं मुंह आपणैं राज़ा दी बाबेल देशै चिऊथी सोभी का बडी पदबी।"

8 राज़ै बेलशेसरे सोभ कार-करिंदै आऐ तेऊ सेटा लै, पर तिंयां निं भित्ती दी लिखअ द पहल़ी सकै, नां तेतो मतलब खोज़ी सकै। 9 तेखअ डरअ राज़अ बेलशेसर होर बी खास्सअ अर तेऊओ मुंह फिरअ होर बी शेफल़अ। तेऊए कार-करिंदै निस्सी समझ़ ई पल़ी कि ऐबै किज़ै करनअ!

10 राज़ माता शूणैं राज़अ अर कार-करिंदै गल्‍ला करदै अर तेता शूणीं आई सह भितरा लै संघा बोलअ आपणैं शोहरू बेलशेसर राज़ै लै,

"राज़अ, तेरी लोल़ी लाम्मी अमर हुई! तूह निं डरै आथी नां इना गल्‍ला पिछ़ू आपणअ मुंह शेऊई। 11 तेरै देशै आसा एक इहअ मणछ ज़हा दी परमेशरे आत्मां आसा। तेरै बाब नबूकदनेसरे राज़ा दी हुई ती एही ई गल्‍ला, तेता करै लागअ त थोघ कि सह आसा खास्सअ ज़ाणकार अर तेऊ आसा देअआ ज़ेही अक्ल अर समझ़। तेरै बाब राज़ै नबूकदनेसरै बणाअं त सह सोभी जोतषी, कसदी पंडता प्रैंदै बडअ बज़ीर। 12 तेऊ नाअं आसा दानिएल पर राज़ै त तेऊ नाअं बेलतेशर डाहअ द। सह आसा खास्सअ अक्ली आल़अ अर खास्सी गल्‍लो ज़ाणकार। सह सका सुपनैओ फल बी खोज़ी, सह भुझ़ा हर गल्‍ला अर सह सका हर परशैनी का बागै काढी। तूह छ़ाड कहा, संघा आण दानिएला इधा लै शादी। तेऊ हेरनअ ताखा खोज़ी कि अह भित्ती दी किज़ै आसा लिखअ द।"

13 ज़ांऊं दानिएल राज़ै सेटा हाज़र किअ, राज़ै पुछ़अ तेऊ का,

"तूह सह ई मणछ आसा ज़ुंण मेरै बाबै यहूदा मुल्खा का इधा लै कैद करी आसा आणअ द? ताह नाअं दानिएल आसा? 14 मंऐं शूणीं एही गल्‍ला कि ताह दी आसा परमेशरे आत्मां अर तूह आसा अक्ली आल़अ अर खास्सी गल्‍ला ज़ाणनै आल़अ। 15 मंऐं शादै आपणैं देशे जोतषी अर पंडत आपणैं राज़ मैहला लै कि तिंयां खोज़े कि भित्ती दी किज़ै आसा लिखअ द अर तेतो किज़ै मतलब आसा? पर तिन्‍नां मांझ़ै निं कोह निखल़अ ज़ुंण एता खोज़ी सके! 16 मंऐं शूणअ इहअ कि तूह खोज़ा सुपनैओ फल अर तूह भुझ़ा हर गल्‍ला अर तूह सका हर परशैनी का बागै काढी। ज़ै तूह खोज़े कि अह भित्ती दी किज़ै आसा लिखअ द, संघा एतो मतलब बी खोज़े, ताल्है बन्हैऊंणैं मुंह तिंयां किम्मती झिकल़ै ज़ुंण राज़अ बान्हां। गल़ै पाणीं तेरै सुन्‍नें कंठी अर ताल्है दैणीं मुंह आपणैं राज़ा दी चिऊथी सोभी का बडी पदबी।"

17 दानिएलै दैनअ ज़बाब,

माहा राज़अ, मुंह हेरनअ ताखा खोज़ी कि अह भित्ती दी किज़ै आसा लिखअ द अर एतो मतलब बी समझ़ाऊं हुंह ताखा। पर ज़ुंण तूह मुल्है भैंट दैणी च़ाहा, तैहा डाहै आप्पू का अर तेता दैऐ कहा होरी लै। 18 माहा राज़अ, परमेशर ज़ुंण सोभी का बडअ आसा, तेऊ बणाअं तेरअ बाब नबूकदनेसर बलबान राज़अ, सह किअ तेऊ सारै दी मशूर अर लोग करा तै तेऊओ अदर कि सह त महान राज़अ। 19 परमेशरै बणाअं सह एतरअ महान एते तैणीं कि देशा-देशे लोग, ज़ुदी-ज़ुदी भाषा-बोली बोल़णैं आल़ै लोग डरा तै तेऊ का खास्सै। तेरअ बाब ज़हा मारनअ च़ाहा त, तेऊ पाआ त सह मारी, ज़हा सह ज़िऊंदअ डाहणअ च़ाहे, तेऊ डाहा त सह ज़िऊंदै। ज़हा लै तेऊओ दिल बोलअ, तेऊ बशैल़ा त सह बडी पदबी दी अर ज़हा लै तेऊओ दिल बोला थिअ, तेऊ काढा त सह पदबी का पोर्ही।

20 "ज़ांऊं सह खास्सअ काठअ अर आपणैं बलबान अर महान हणैंओ खास्सअ घमंड हुअ, परमेशरै किई तेऊए शोभा-शान अर तेऊओ राज़ तेऊ का दूर।✝5:20 सैणीं. 16:15 21 सह काढअ मणछे राज़-समाज़ा का दूर अर तेऊओ दमाग हुअ पशू ज़िहअ। सह लागअ बणें गाधै ज़िहअ ज़ीबा संघै रहंदअ अर बल्दा ज़िहअ घाहा च़रदअ। तेऊए देही भिज़ा ती सरगा का पल़ी दी ओशा करै। तेखअ ज़ाण्हुंअ तेऊ का बी कि परमेशर ज़ुंण सोभी का बडअ आसा, सह करा मणछे सोभी राज़ा प्रैंदै राज़। ज़हा सह आप्पै छ़ांटा, तेऊ बणाआं सह राज़अ।

22 "पर माहा राज़अ बेलशेसर, तूह आसा तेऊओ शोहरू अर ताखा आसा इना सोभी गल्‍लो थोघ। तंऐं निं अज़ी बी आपणअ घमंड छ़ाडअ। 23 तूह सोठा इहअ कि तूह आसा तेऊ मालका का महान ज़ुंण स्वर्गै आसा बेठअ द! तंऐं बझ़ैल़ै बिधाते भबने पबित्र भांडै आप्पू सेटा पेश करनै। तंऐं, तेरी सोभी राणीं अर तेरै खास कार-करिंदै झुटी तिन्‍नां भांडै करै शराब! तेखअ फिरै तम्हैं आपणैं तिन्‍नां देअआ-देबीए ज़ै-ज़ैकार करदै ज़ुंण सुन्‍नैं-च़ंदी, पितल़, लोहै काठ अर पात्थरे आसा बणाऐं दै! ज़ुंण मुहुर्ती नां भाल़ी सकदी, नां शूणीं सकदी अर किज़ै समझ़ी सकदी! बेलशेसर! ज़हा परमेशरे हाथै तेरअ शाह आसा, ज़सरै बशै तेरी ज़िन्दगी आसा, तंऐं निं तेऊओ धख बी अदर किअ।✝5:23 आयू. 12:10; भज. 115:4-8 24 तैही छ़ाडअ तेऊ हाथ कि सह भित्ती दी ताल्है एऊ समादा लिखे।

25 "भित्ती दी आसा लिखअ द, ‘मेने, मेने, तकेल अर पर्सीन।’ 26 एतो मतलब आसा, ‘मेने’ मतलब गणी डाहै दै। परमेशरै आसा तेरै राज़ करने धैल़ै गणी डाहै दै अर ऐबै गऐ ईंयां धैल़ै मुक्‍की अर तेरअ राज़ हणअ खतम। 27 ‘तकेल’ मतलब तोली डाहअ द। परमेशरै तोलअ तूह! पर तराकल़ी दी निखल़अ तेरअ बज़न बेघै हल़कअ। 28 ‘पर्सीन’ मतलब बांडी डाहअ द। परमेशरै बांडअ तेरअ राज़ दूई बाखा लै ज़ुदअ-ज़ुदअ। आधअ राज़ दैनअ तेऊ मादी लोगा लै अर आधअ दैनअ फारसी लोगा लै।"

29 इहअ शूणीं किअ बेलशेसर राज़ै हुकम कि दानिएला लै बन्हैऊंआं तिहै किम्मती झिकल़ै ज़ुंण राज़अ बान्हां, एऊए गल़ै पाआ सुन्‍नें कंठी। ज़िहअ राज़ै हुकम किअ तिन्‍नैं किअ तिहअ ई। बाबेल सारै देशै किअ हुकम ज़ारी कि दानिएल का आसा देशा प्रैंदै राज़ करना लै चिऊथी बडी पदबी।

30 तैहा ई राची पाअ कसदीओ*5:30 कसदीओ बाबेल देशो राज़अ बेलशेसर मारी। 31 तेखअ बेठअ मादी लोगा मांझ़ै दारा बाबेल देशे राज़गाद्दी दी। तेऊए अमर ती कोई बाहठा साले।