दानिएल 8

बाकरै अर गाभो सुपनअ

1 बाबेल देशे राज़ा दी त बेलशेसर माहा राज़अ, तेऊए राज़ा दी चिऊथी साला हुअ मुंह दानिएला एक होर सुपनअ।

2 सुपनै शुझुअ मुखा इहअ कि हुंह आसा एलाम मुल्खै शुशन नाओंए गहल़ा आल़ी नगरी। तिधी आसा हुंह ऊलाई नाओंए गाडे बाढै खल़्हुअ द। 3 हुंह लागअ उझै बाखा भाल़अ अर तेथ शुझुअ मुखा एक गाभ अर तेऊए आसा बडै-बडै शगैठ। एक शगैठ त दुजै शगैठा का लाम्मअ अर सह लाम्मअ शगैठ ज़ाण्हिंआं त इहअ कि सह आसा तेऊ होछ़ै शगैठा बाद टिप्पअ द। 4 तेखअ शुझुअ मुखा कि सह गाभ लागअ आपणैं शींगा करै पछ़म, उतर अर दखण दिशा बाखा जल़ाखदअ। तेऊओ मकाबलअ निं कोह ज़ीब करी सकअ अर तेऊए ज़ोरा का निं कोह आप्पू बच़ाऊई सकदअ। तेऊ किअ ज़िहअ तेऊओ दिल बोलअ तिहअ अर तेऊ त आपणैं ज़ोरो बडअ घमंड।

5 हुंह त तेते बारै सोठदअ समझ़दअ ई लागअ द कि एतो किज़ै मतलब आसा। मुखा शुझुअ एक बाकरअ आअ पछ़म दिशा बाखा, सह आअ इहअ बागरी ज़िहअ ठुर्ही कि तेऊए छ़ल़ू निं धरनीं बी लागदै तै। तेऊ बाकरे दूई आछी मांझ़ै त एक बडअ शींग। 6 सह आअ कोहरअ तेऊ दूई शींगा आल़ै गाभा सेटा लै ठुर्ही ज़ुंण मंऐं गाडे बाढै भाल़अ त। तेऊ बाकरै ती खास्सी रोश्शै आई दी अर सह पल़अ पूरै ज़ोरा संघी तेऊ गाभा लै चुटी। 7 मुखा शुझुअ कि सह बाकरअ पल़अ तेऊ गाभा लै चुटी, खास्सै रोश्शा संघी बाही तेऊ बाकरे दूई शींगा आल़ै गाभा लै एही जडराल़ कि तेऊए तिंयां शींग पाऐ चोल़ी। गाभा निं तेखअ तेऊ बाकरैओ मकाबलअ करनै जोगी ज़ोर रहअ। बाकरै बदल़अ सह गाभ धरनीं संघा दघोस्सअ सह आपणैं छ़ल़ू करै। इहअ निं कोह निखल़अ ज़ुंण गाभा तेऊ बाकरै का बच़ाऊई सके।

8 तेऊ बाकरै त आपणैं ज़ोरो बडअ घमंड अर तेखअ हुअ सह होर बी शरेरअ। पर ज़ांऊं सह खास्सअ बलबान हुअ, तेऊओ सह शींग चुटअ पोर्ही अर तेते ज़ैगा टिप्पै च़ार शींग ज़ुंण भाल़णा लै नुआहरै आसा तै! तिंयां शींगे च़ुंज़ी फिरी उझै बझ़ी करै ज़ुदी-ज़ुदी च़ऊ दिशा बाखा।

9 इना च़ऊ शींगा मांझ़ै टिप्पअ एकी शींगा का एक होछ़अ ज़िहअ होर शींग। सह बझ़अ दखण-पुर्ब दिशा बाखा अर म्हारै शोभलै देशा बाखा। 10 सह शींग हुअ एतरअ बलबान कि तेऊ छ़ेल़अ स्वर्गे सैना अर तारै संघै बी जुध। तिन्‍नां मांझ़ै शोटै तेऊ कई तारै धरनीं संघा जैंटै धरनीं।✝8:10 प्रका. 12:4 11 सह लागअ आप्पू इहअ समझ़दअ कि सह आसा तेऊ का बी बडअ ज़ुंण स्वर्गे सैनो सैनापति आसा! परमेशरा लै धैल़ ज़ुंण हूम अर बल़ीदान हआ तै, लोग रोक्‍कै तेऊ तेता करनै का। ज़ुंण परमेशरो बसेरअ आसा थिअ, सह पबित्र भबन बी किअ तेऊ ढोल़ी पठ खतम, 12 परमेशरे परज़ा बी मनअ आप्पू प्रैंदै तेऊ शींगो राज़, किल्हैकि तिंयां तै परमेशरा का दूर हुऐ दै। तिन्‍नैं किऐ परमेशरा छ़ाडी तेऊ शींगा लै हूम अर बल़ीदान करी पाप। तेऊ शींगै डाहै तिंयां सत्ता दी विश्वास करनै का रोक्‍की। सह हुअ तिहअ करना लै सफल ज़िहअ सह करनअ च़ाहा त।

13 तेखअ शूणअ मंऐं एक स्वर्ग दूत दुजै स्वर्ग दूता लै, "एऊ सुपनै दी ज़ुंण गल्‍ला शुझुई, ईंयां केभै तैणीं रहणीं शुझदी लागी? धैल़ हूम बल़ीदाना दी अह घोर पाप केभै तैणीं रहणअ हंदअ लागी? स्वर्गे सारी सैना अर पबित्र भबनो बनाश कधू तैणीं रहणअ हंदअ लागी?"✝8:13 प्रका. 11:12

14 तेखअ शूणअ मंऐं सह दुजअ स्वर्ग दूत बोल्दअ, "ज़ेभै तैणीं त्रेई शौ सान्हां अर दोत्ती बिति निं जाए, तेभै तैणीं रहणअ अह पाप हंदअ लागी। तेता बाद करनअ बिधातो भबन भिई शुचअ।"

गब्रीएल स्वर्ग दूतै खोज़अ सुपनैओ फल

15 मुंह दानिएला ज़ुंण अह सुपनअ हुअ, हुंह त एता समझ़णें कोशिश करदअ लागअ द कि एतो कै मतलब आसा। तेभै शुझुअ मुखा नच़ानक कि मुंह आजू आसा कुंण खल़्हुअ द। सह ज़ाण्हिंआं त ज़ात मणछा ज़िहअ।

16 तेखअ शुण्हुंअ मुखा ऊलाई गाडा बाखा कुंण हाक्‍का लाई बोल्दअ, "गब्रीएल, एऊ मणछा का समझ़ाऊ तेतो मतलब ज़ुंण एऊ भाल़अ।"✝8:16 लूक. 1:19,26

17 गब्रीएल आअ मुंह नेल़ ज़िधी हुंह खल़्हुअ द त। मुंह छ़ुटअ डरै दर्छ़णअ अर हुंह पल़अ धरनीं उटी बाखा।

तेऊ बोलअ मुल्है इहअ, "मणछा, ज़ुंण सुपनअ तंऐं भाल़अ, तूह समझ़ एतो मतलब। अह सुपनअ आसा तेभा लै ज़ेभै संसार खतम हणअ।"

18 ज़ेभै सह गल्‍ला करदअ त लागअ द, तेभै त हुंह धरनीं उटी बाखा पल़अ द अर मुंह निं हैल़ी-हांस ई आथी त रहअ द। पर तेऊ छ़ुंहंअ हुंह संघा किअ हुंह मेरी ज़ांघा आज़रअ खल़अ। 19 तेखअ बोलअ तेऊ इहअ, "मंऐं लाअ ताखा रहैऊई कि परमेशरे रोश्शो नतिज़अ किज़ै निखल़ा। अह सुपनअ आसा तेरअ तेऊ बगते बारै ज़ेभै सोभै गल्‍ला खतम हणीं।

20 "ज़ुंण तंऐं गाभे दूई शींग भाल़ै, तिंयां आसा मादी अर फारसी लोगे दूई राज़ै। 21 सह बाकरअ आसा यूनान देशे लोगो राज़। तेऊ बाकरे दुही आछी मांझ़ै शींग आसा यूनानी राज़ो पैहलअ राज़अ। 22 तेऊ शींगा चुटी ज़ुंण तेते ज़ैगा च़ार शींग टिप्पै, सह आसा इहअ कि यूनानी राज़ बांढणअ च़ऊ ज़ुदै-ज़ुदै देशा दी। पर तिंयां निं पैहलै राज़ा ज़िहै बलबान हणैं।

23 "इना च़ऊ देशे राज़ैओ राज़ खतम हणैं खिरीए साला हणैं लोग पठी कदुष्ट। तेखअ निखल़णअ एक नर्दैई राज़अ, सह हणअ च़लाक अर ठग। 24 सह हणअ खास्सअ बलबान, तेऊ करनअ हर ज़ैगा घोर बनाश। सह हणअ तेऊए हर कामां लै सफल। तेऊ करनै बडै-बडै बलबान मणछ अर तिंयां पबित्र मणछ बरैबाद ज़ुंण परमेशरे खास परज़ा आसा। 25 सह हणअ इहअ च़लाक कि तेऊ ठगणै लोग पठी। तेऊ हणअ आपणैं बलबान हणैंओ खास्सअ घमंड। लोगा सोठणअ इहअ कि तिंयां आसा तेऊए राज़ा दी राज्ज़ी-राम्बल़ै बच़ै दै, पर तेऊ पाणै तिन्‍नां मांझ़ै खास्सै मारी। सह हणअ सोभी राज़ै प्रैंदै माहा राज़ैओ बी बरोधी। पर खिरी करनअ सह परमेशरा आप्पै खतम, तेऊ मारनै आल़अ निं कोह मणछ हणअ।

26 "ज़ुंण तंऐं सुपनै सान्हां अर दोत्तीए बारै शूणअ, सह गल्‍ल आसा शुची। पर तूह डाहै ऐहा गल्‍लो छ़पाअ, एता निं कोही का खोज़ी, किल्हैकि इना गल्‍ला पूरी हणां लै लागणीं अज़ी खास्सी साला।"

27 एऊ सुपनै भाल़णैं का बाद फिरअ हुंह दानिएल बाख दुबल़अ। हुंह रहअ खास्सै धैल़ै तैणीं बमार। ज़ांऊं हुंह बिज़रअ, तेखअ उझ़ुअ हुंह खल़अ संघा डेऊअ हुंह राज़ेए च़ाकरी करदअ फिरी। पर ज़ुंण मंऐं भाल़अ थिअ, तेता करै त हुंह खास्सअ झाखुअ द, किल्हैकि मुंह निस्सी ती तिंयां गल्‍ला समझ़ एछी।