गब्रीएल स्वर्ग दूतै खोज़ी आजू हणीं ईंयां गल्ला पूरी
20 हुंह रहअ एही अरज़ करदअ लागी अर मंऐं मनी अह गल्ल आपणैं मालक बिधाता सेटा कि मंऐं किऐ पाप अर मेरै भाई-बंध इज़राईली बी किऐ पाप। मंऐं किई आपणैं परमेशर बिधाता सेटा लेर-पकार एही अरज़ कि सह आपणीं पबित्र धारा एरुशलेम नगरी भिई खल़ी करे। 21 हुंह त इना गल्ला बिधाता सेटा बोल्दअ लागअ द अर मुखा शुझुअ गब्रीएल नाओं स्वर्ग दूत आप्पू बाखा लै उंधै एछदअ। अह त सह ई ज़ुंण मुखा पैहली बारी सुपनै दी शुझुअ त। तेऊ बाहअ उपरा का कोहरअ डैअ मुंह बाखा लै। सह त सान्हां बिधाता लै नाज़ बल़ी भैंट करनैओ बगत।9:21 लूक. 1:19,26 22 सह लागअ मुल्है बोल्दअ, "दानिएल, हुंह आअ इधी ताल्है सोर अर समझ़ दैंदअ।
23 "तूह त लेर-पकार पाई परमेशरा सेटा अरज़ करदअ लागअ द, तेऊ हेरी तेरी अरज़ शूणीं। सह झ़ूरा ताल्है खास्सअ अर तैही आसा हुंह ताह सेटा लै तेऊओ समाद खोज़दअ आअ द। तूह शूणैं मेरी गल्ला धैन दैई ताकि ताह समझ़ एछे कि ज़ुंण ताह धैन हुअ, तेतो किज़ै मतलब आसा।