एज्रा 6

माहा राज़ै दारा किअ हुकम

1 माहा राज़ै दारा किअ हुकम कि राज़ दरबारे पराणीं बही-पोथी दैआ लोल़णी ज़ुंण बाबेल देशे भढारै आसा डाही दी। 2 खिरी भेटी तिन्‍नां मादी मुल्खे राज़धानी अकबताना नगरीए गहल़ै एक बही। तेथ त इहअ लिखअ द:

3 "माहा राज़ै कुस्रू किअ आपणैं राज़ा दी पैहली साला इहअ हुकम, ‘एरुशलेम नगरीओ भबन ज़िधी परमेशरा लै बल़ीदान अर हूम करा तै, तेऊ च़िणां भिई। तेते आथरी पाऐ डुघी अर तेऊ च़िणैं शाठ हाथ उछ़टअ अर शाठ हाथ बिरलअ। 4 तेते भित्ती च़िणणा लै दैऐ मेट-पूर बडै-बडै रद्दे चअन फेरै अर च़ौथै फेरै लोल़ी तेथ चाची पाई। भबना बणाणां लै ज़ेतरअ बी खर्च़अ होए सह दैणअ राज़ दरबारे खज़ानै का। 5 ज़ुंण सुन्‍नैं-च़ंदीए भांडै माहा राज़ै नबूकदनेसरै एरुशलेम परमेशरे भबना का बाबेल देशा लै आसा आणै दै, तिन्‍नां पजैल़ा तेते असली ज़ैगा एरुशलेम परमेशरे भबनै बापस।’"

माहा राज़ै दारा किअ काम शुरू डाहणेंओ हुकम

6 माहा राज़ै दारा दैनअ च़िठी लिखी इहअ समाद बापस:

"राज़पाल तत्तनाई, शेतेर-बोज़नाई अर फरात दरैऊआ पार पछ़मा बाखा मुल्खै तिन्‍नां संघै होर सोभ फारसी साथी,

"तम्हैं रहा तेऊ भबना का दूर 7 अर तेते कामां रोक्‍कदै निं लागा। यहूदा मुल्खे राज़पाल अर यहूदी मणछे सैणैं दैआ तेऊ भबना तिधी भिई च़िणनै ज़िधी सह पैहलै थिअ। 8 हुंह करा तम्हां लै इहअ हुकम कि हथू करा यहूदी सैणैं संघै तेऊ भबना बणाणां लै तिन्‍नें मज़त। ज़ुंण ढब्बै फरात दरैऊआ पार पछ़मा बाखा मुल्खा का कारै गराही आसा झाल़ै दै, तेता का दैआ तिन्‍नां लै खर्च़अ बी ताकि सह काम नां रुके। 9 एरुशलेम नगरी दैऐ प्रोहते ज़ेही तिन्‍नें ज़रुरत होए तेही मज़त करी, तेता निं बिस्सरी आथी! तिन्‍नां स्वर्गे परमेशरा लै हूम बल़ीदान करना लै बाछ़ू, बल्द, रिठ, गाभू, छ़ेल्हू, नाज़ बल़ीदान करना लै कणक, लूंण, दाखो रस, जैतूनो तेल लोल़ी होए तेता करै हर धैल़ै दैई। 10 ईंयां गल्‍ला दैणीं एते तैणीं कि तिंयां तेता स्वर्गे परमेशरा लै खुश करनै आल़अ बल़ीदान करे अर तिंयां मुल्है अर मेरै शोहरूए लाम्मी अमरा लै परमेशरा सेटा अरज़ करे। 11 मेरअ आसा आजू इहअ हुकम कि ज़ुंण मेरअ हुकम नांईं मने, तेऊ लै काढणीं तेऊए ई घअरे भ्रैहण संघा खभेऊणअ सह तेऊए पेटै। तेऊओ घअर डाहणअ ढोल़ी करै गट्टै-माट्टैओ रूल़ बणाईं। 12 सह परमेशर ज़ुंणी एरुशलेम आपणीं पूज़ा-गाज़ा हणें ज़ैगा छ़ांटी, सह करे तिन्‍नां राज़ै या तिन्‍नां देशा पठी बरैबाद ज़ुंण एऊ परमेशरे भबना बरैबाद करदै आजू एछे। अह हुकम किअ मंऐं दारा, एता मनै ज़िहअ मंऐं बोलअ तिहअ ई।"

बिधाते भबने पूज़

13 ज़ांऊं राज़पाल तत्तनाई, शेतेर-बोज़नाई अर तिन्‍नें होरी साथी कार-करिंदै सेटा च़िठी पुजी। तिन्‍नैं किअ ठीक तिहअ ई ज़िहअ माहा राज़ै दारा हुकम किअ त। 14 हगाई गूर, ईदूए शोहरू जकर्या बाती ज़ुंण बिधाता गल्‍ला प्रगट किई ती, तेता करै आई यहूदी सैणैं होर बी हिम्मत अर तिन्‍नैं किई बिधाते भबना बणाणां लै होर बी खास्सी मैन्थ। खिरी हुऐ तिंयां सफल अर तिन्‍नैं छ़ेक्‍कअ बिधातो भबन भिई बणाईं ज़िहअ बिधाता हुकम किअ त अर ज़ेही फारस देशे माहा राज़ै कुस्रू, अर्तक्षत्र अर दारा का ज़ाज़त भेटी ती। 15 तिन्‍नैं छ़ेक्‍कअ माहा राज़ै दारे राज़ा दी छ़हुई साला चिई फागणै बणाईं। 16 इज़राईली, प्रोहतै, लेबी अर होर ज़ुंण गलामी का फिरी आऐ तै, तिन्‍नैं किई तेखअ खास्सै खुश हई भबने प्रतिष्ठा। 17 तैहा प्रतिष्ठा लै काटै तिन्‍नैं एक शौ बल्द, दूई शौ रिठ अर च़ार शौ गाभू। संघा काटै इज़राईले बारा गोत्रे साबै सोभी इज़राईलीए पाप माफी लै बारा बाकरै। 18 तेखअ सभाल़ी तिन्‍नैं प्रोहत अर लेबी लै एरुशलेम बिधाते भबने च़ाकरी, ज़ेऊ साबै मोसा गूरै लिखै दै बधाना दी खोज़अ द आसा।

ऊवार्णैओ थैर

19 ज़ुंण लोग गलामी का फिरी आऐ तै, तिन्‍नैं मनाऊंअ तेखअ आजू नऊंईं साला च़ौदा च़ैत्रै ऊवार्णैओ थैर। 20 सोभी प्रोहतै अर होरी लेबी किई बधाने साबै आपणीं-आपणीं शुधी। तिन्‍नैं काटै आप्पू, आपणैं साथी प्रोहता लै अर तिन्‍नां सोभी लोगा लै ऊवार्णै ज़ुंण गलामी का फिरी आऐ तै। 21 तेते शिखा खाई सोभी इज़राईली, ज़ुंण लोग गलामी का फिरी आऐ तै अर तिन्‍नैं पराई ज़ातीए सोभी लोगै ज़ुंण तेऊ देशै बस्सी छ़ोतलै देअआ छ़ाडी इज़राईले परमेशर बिधाते पूज़ा-गाज़ा करा तै। 22 तेखअ मनाऊंअ तिन्‍नैं खुशी-खुशी साता धैल़ी तैणीं आखरी-रोटीओ थैर। तिंयां थिऐ खास्सै खुशी हुऐ दै, किल्हैकि बिधाता फरेऊअ अश्शूर देशे माहा राज़ैओ मन्‍न तिन्‍नां बाखा अर तेऊ दैनअ तिन्‍नां लै इज़राईले परमेशर बिधाते भबना बणाणां लै साथ।