एज्रा 1

यहूदी गलामो एरुशलेम नगरी लै बापस फिरनअ

1 कुस्रू बणअ फारस देशै राज़अ, तेऊए राज़ा दी पैहली साला किई बिधाता तिंयां गल्‍ला पूरी ज़ुंण तेऊ आपणैं गूर जेरमयाह बाती बोली ती। बिधाता पाई राज़ै कुस्रूए मन्‍नैं एही कि तेऊ दैनअ च़िठी लिखी तिन्‍नां सोभी देशा लै समाद ज़हा प्रैंदै तेऊओ राज़ थिअ। समाद त इहअ:

2 "हुंह फारसी माहा राज़अ कुस्रू बोला इहअ, ‘स्वर्गे परमेशर बिधाता बणाअं हुंह सोभी देशा प्रैंदै माहा राज़अ। तेऊ बिधाता सभाल़ी मुल्है ज़िम्मैंबारी कि हुंह यहूदा मुल्खै एरुशलेम नगरी तेऊ लै भबन बणांए। 3 ऐबै तम्हां बिधाते परज़ा मांझ़ै ज़ेतरै बी यहूदा लै बापस डेऊणअ च़ाहा, तिंयां डेओआ, संघा च़िणां एरुशलेम डेऊई इज़राईले परमेशर बिधातो भबन भिई, ज़सरी पूज़ा-गाज़ा एरुशलेम हआ। हुंह करा एही अरज़ कि बिधाता लोल़ी आप्पै तम्हां संघै रहअ। 4 ज़ैगै-ज़ैगै ज़हा देशै बी यहूदी होए, तिंयां करै तिन्‍नां यहूदी मणछे सुन्‍नअ, च़ंदी, ज़ैदात, डागै-चैणैं अर बाता खाणां-पिणां लै ज़िणस दैई घअरा लै बापस फिरना लै मज़त। तेता का लाऊआ दैऐ एरुशलेम बिधाते भबना लै ज़ेतरी तम्हां का पुगे तेतरी भैंट।’"

5 तेखअ तैर्हुऐ यहूदा अर बिन्यामीन गोत्रा मांझ़ै सोभ सैणैं, लेबी, प्रोहत अर तिंयां सोभ लोग एरुशलेम नगरी डेऊणा लै ज़ुंण तत्त-दिला का बिधाते भबना च़िणना लै मज़त करनी च़ाहा तै। 6 तिन्‍नां संघा बस्सै दै ज़ुंण होर गरांईं थिऐ, तिन्‍नैं किई तिन्‍नें सुन्‍नअ, च़ंदी, ज़ैदात, डागै-चैणैं अर होर बी कई किम्मती च़िज़ा दैई मज़त अर एता का लाऊआ दैनी तिन्‍नैं दिला का बिधाते भबना लै भैंट।

7 राज़ै नबूकदनेसरै एरुशलेम नगरी बिधाते भबना का ज़ुंण किम्मती भांडै निंईं आपणैं देअए देहुरै तै डाहै दै, तिंयां बी दैनै माहा राज़ै कुस्रू बापस। 8 फारसी माहा राज़ै कुस्रू बझ़ैल़ै तिंयां राज़ दरबारे खज़ाने भढारी मिथ्रदाता का ओर्ही काढणैं संघा दैनै गणी करै शेशबासरा का ज़ुंण यहूदा मुल्खो राज़पाल थिअ। 9 तिंयां भांडै तै ईंयां:

भैंट च़ढाऊंणा लै सुन्‍नें तिह थाल़ा

भैंट च़ढाऊंणा लै च़ंदीए एक हज़ार थाल़ा,

छ़ूरी ती उणत्ती

10 तिह होछ़ी सुन्‍नें कऊली

च़ार शौ दस होछ़ी च़ंदीए कऊली

इना का लाऊआ होर भांडै तै एक हज़ार।

11 थाल़ू अर सुन्‍नैं-च़ंदीए होरी सोभी भांडै संघी थिऐ पठी पांज़ हज़ार च़ार शौ भांडै। ईंयां सोभै भांडै बी पजैल़ै शेशबासरै तिन्‍नां होरी संघै एरुशलेम नगरी बापस ज़ुंण बाबेल देशे गलामी का बापस आऐ तै।