2 इतिहास 36

यहूदा मुल्खो राज़अ जोअहाज

1 यहूदा मुल्खे परज़ा किअ एरुशलेम नगरी जोशिया राज़े शोहरू जोअहाजो अभिषेक संघा बणाअं सह जोशिये ज़ैगा आजू यहूदा मुल्खो राज़अ। 2 ज़धू जोअहाज यहूदा मुल्खो राज़अ बणअ, तधू त सह त्रेई सालो। तेऊ किअ एरुशलेम नगरी का यहूदा मुल्खै चिई भिन्‍नैं तैणीं राज़। 3 मिसर देशे राज़ै किअ जोहाज कैद संघा बोलअ तेऊ देशा का चऊती कुंटल़ च़ंदी अर चऊती किलू सुन्‍नअ कारअ भरना लै। 4 मिसर देशे राज़ै नेकू बशैल़अ तेखअ जोशिया राज़ैओ शोहरू एलीकीम राज़धानी एरुशलेम यहूदा मुल्खो राज़अ अर तेऊओ नाअं डाहअ बदल़ी करै जेहोकीम। जोअहाज राज़अ निंयं तेऊ आप्पू संघै कैद करी मिसर देशा लै।

यहूदा मुल्खै जेहोकीम राज़अ

5 ज़धू जेहोकीम यहूदा मुल्खो राज़अ बणअ, तधू ती तेऊए अमर पच्‍ची साले। तेऊ किअ एरुशलेम नगरी का गैरा साला तैणीं राज़। तेऊ किअ तिहअ ई पाप ज़ेता का बिधाता नफरत करा। 6 बाबेल देशे राज़ै नबूकदनेसरै छ़ेल़अ यहूदा मुल्खा संघै जुध, तेऊ किअ राज़अ जेहोकीम कैद संघा निंयं शांघल़ी करै बान्हीं बाबेल देशा लै। 7 नबूकदनेसर राज़ै निंयैं बिधाते भबना का कई किम्मती च़िज़ा, संघा डाही तिंयां बाबेल देशै पुजी आपणैं मैहलै। 8 जेहोकीम राज़ै ज़िहै-ज़िहै काम किऐ, ज़ुंण तेऊ कदुष्ट अर च़िल़्हखरै काम बी किऐ, तिंयां सोभै गल्‍ला आसा यहूदा अर इज़राईल मुल्खे इतिहासे कताबा दी लिखी डाही दी। तेऊ बाद बणअ तेऊओ शोहरू जेहोकीन यहूदा मुल्खो राज़अ।

यहूदा मुल्खै जेहोकीन राज़अ

9 ज़धू जेहोकीन यहूदा मुल्खो राज़अ बणअ, तेऊए अमर ती तधू ठारा साले। तेऊ किअ एरुशलेम नगरी का चिई भिन्‍नैं अर दसा धैल़ी तैणीं राज़। तेऊ बी किअ तिहअ ई पाप ज़ेता का बिधाता नफरत करा। 10 नऊंअ संबत एछदी छ़ाडै बाबेल देशे राज़ै नबूकदनेसरे सैनापति एरुशलेम नगरी लै संघा निंयं यहूदा मुल्खो राज़अ जेहोकीन कैद करी बाबेल देशा लै अर बिधाते भबना का किम्मती च़िज़ा बी बझ़ैल़ै तेऊ बाबेल देशा लै आणनैं। नबूकदनेसरै बणाअं जेहोकीमे ज़ैगा तेऊओ च़ाच़ू सिदकिया राज़अ।

यहूदा मुल्खै राज़अ सिदकिया

11 ज़धू सिदकिया यहूदा मुल्खो राज़अ बणअ, सह थिअ तधू इक्‍की सालो। तेऊ किअ एरुशलेम नगरी का गैरा साला तैणीं राज़। 12 राज़ै सिदकिया बी किअ पाप ज़ेता बिधाता नांईं च़ाहंदअ त कि सह करे। बिधाता दैनी आपणैं गूर जेरमयाह बाती तेऊ लै चतैनगी बी, पर तेऊ निं तेथ बाखा धैन बी दैनअ।

एरुशलेम नगरीए बरैबादी

13 खिरी किअ सिदकिया बाबेल देशे राज़ै नबूकदनेसरा लै द्रोह ज़ुंणीं तेऊ का बिधाते नाओंऐं कसमा थिई खैऊई दी कि सह सदा तेऊए पक्षा दी रहे। पर सिदकिया हुअ इहअ काठअ कि सह निं इज़राईले परमेशर बिधाता बाखा बी फिरअ। 14 एता का लाऊआ, यहूदा मुल्खे सैणैं, प्रोहत अर होरी लोगै बी किअ आप्पू ओरी-पोरी होरी देशा ज़िहअ मुहुर्ती पूज़ा करी बिधाता लै विश्वास घात अर इहअ करै लाई तिन्‍नैं एरुशलेम तेऊ भबनै बी छ़ोत ज़ुंण बिधाता आप्पै पबित्र थिअ किअ द। 15 ज़हा बिधाता तिन्‍नें दाद-बाब मना तै, सह रहअ कबल्‍लअ तिन्‍नां सेटा लै आपणैं गूर छ़ाडी चतैनगी दैंदअ लागी। किल्हैकि बिधाता निं च़ाहंदअ त कि तिंयां अर सह भबन बरैबाद होए। 16 पर ज़ुंण बी बिधातो दूत तिन्‍नां सेटा एछा त, तिंयां लागा तै तेऊ लै हास्सदै अर ज़ुंण गूर तिन्‍नां सेटा लै एछा तै तिन्‍नें लागा तै तिंयां सुहांगा करदै। खिरी पल़अ तिन्‍नां लै बिधातो इहअ कोप कि तिन्‍नां निं तेता का छ़ुटणा लै बात निस्सी भेटी।

17 बिधाता दैनअ तिन्‍नां लै बाबेल देशे राज़ै एछणैं। नबूकदनेसरै पाऐ यहूदा मुल्खै खारकै मणछ मारी, इधी तैणीं कि ज़ुंण बिधाते भबनै च़ाकरी करनै आल़ै बी थिऐ तिंयां बी निं तेऊ मारनै का छ़ाडै। तेऊ निं होछ़ै-प्रोढै, मर्ध-बेटल़ी, रोगी-नरोगी कोही लै झींण किई। बिधाता दैनअ तेऊ तिन्‍नां सोभी मारनै। 18 बाबेल देशे राज़ै लुटअ बिधातो भबन अर तेते भढार पठी। राज़ै अर तेऊए कार-करिंदे का ज़ेतरी बी धन-माया थिई, सह निंईं तेऊ आप्पू संघै बाबेल देशा लै। 19 तेऊ चैल़ी बिधाते भबनै अर एरुशलेम नगरी आग। राज़े मैहलै, होर भबन अर नगरी फेर गहल़े दुआली पाई ढोल़ी अर तेथ लागी दी किम्मती च़िज़ा हुई पठी बरैबाद। 20 ज़ुंण तेऊ का ज़िऊंदै बच़ै, तिंयां निंयैं तेऊ आप्पू संघै कैद करी बाबेल देशा लै। तिंयां रहै बाबेल देशे राज़ै अर तेऊए आजू आद-लुआदे तेभै तैणीं गलाम बणी ज़ेभै तैणीं फारसी राज़ै बाबेल देशै कबज़अ निं किअ। 21 यहूदा मुल्ख हुअ पठी उज़र अर रित्तअ, इहअ करै हुई सह गल्‍ल पूरी ज़ुंण बिधाता आपणैं गूर जेरमयाह बाती बोली ती, "अह ज़ैगा रहणीं सत्तर साला तैणीं उज़र पल़ी, ताकि ऐहा ज़ैगा बशैघे धैल़ी ज़िहअ बशैघ भेटे ज़ुंण ऐहा ज़ैगा कधि निं भेटअ।"

राज़ै कुस्रू किअ यहूदी लै आपणैं देशा लै बापस फिरनेओ हुकम

22 कुस्रू बणअ फारस देशै राज़अ, तेऊए राज़ा दी पैहली साला किई बिधाता तिंयां गल्‍ला पूरी ज़ुंण तेऊ आपणैं गूर जेरमयाह बाती बोली ती। बिधाता पाई राज़ै कुस्रूए मन्‍नैं एही कि तेऊ दैनअ च़िठी लिखी तिन्‍नां सोभी देशा लै समाद ज़हा प्रैंदै तेऊओ राज़ थिअ। सह समाद त इहअ,

23 "हुंह फारसी माहा राज़अ कुस्रू बोला इहअ, स्वर्गे परमेशर बिधाता बणाअं हुंह सोभी देशा प्रैंदै माहा राज़अ। तेऊ बिधाता सभाल़ी मुल्है ज़िम्मैंबारी कि हुंह यहूदा मुल्खै एरुशलेम नगरी तेऊ लै भबन बणांए। ऐबै तम्हां बिधाते परज़ा मांझ़ै ज़ेतरै बी यहूदा लै बापस फिरनअ च़ाहा, तिंयां लागा हांढदै, सह बिधाता रहणअ तम्हां संघै आप्पै।"