1 ज़धू हिजकिया राज़अ बणअ, तधू ती तेऊए अमर पच्‍ची साले। तेऊ किअ एरुशलेम नगरी का उणत्ती साला तैणीं इज़राईला दी राज़। तेऊए ईजा नाअं त अबियाह अर सह थिई जकर्ये शोहरी। 2 हिजकिया किअ आपणैं दाद-बाब दाबेदा ज़िहअ ई भलअ ज़ेता लै बिधाता खुश हआ।

3 ज़ांऊं हिजकिया राज़अ बणअ, पैहली ई साला खोल्ही तेऊ बिधाते भबने प्रऊल़ संघा किई तेते मराम्मत। 4 तेऊ किअ बिधाते भबने पुर्बा बाखा ताटी लेबी अर प्रोहतो झाल़अ। 5 तिधी किई तेऊ तिन्‍नां संघै गल्‍ला, "तम्हैं लेबी हआ आप्पू च़ांगै-च़ोखै संघा करा आपणैं दादा-बाबे परमेशर बिधाते भबने शुधी।" ज़ुंण बी बिधाते भबनै छ़ोतली च़िज़ा आसा पाई दी, तिन्‍नां काढा पोर्ही। 6 म्हारै दादा-बाबा मांझ़ै निं कई बिधाता लै शुचै-पाक्‍कै रहै अर तिन्‍नैं किअ तिहअ काम ज़ेता का बिधाता नफरत करा। तिन्‍नैं छ़ाडअ बिधाता मनणअ अर तिन्‍नैं किअ बिधातो भबन पठी नकदरअ। 7 तिन्‍नैं डाही बिधाते भबने प्रऊल़ी बी हूल़ी, सदीऐ पाऐ शेऊई, खास पबित्र ज़ैगा छ़ाडअ तिन्‍नैं धूप ज़ाल़णअ अर इज़राईले परमेशर बिधाता लै बल़ीदान अर हूम करने बी पाई तिन्‍नैं छ़ाड़। 8 तैही पल़अ यहूदा अर एरुशलेम नगरी लै बिधातो कोप। तेता पिछ़ू बिधाता ज़ेही सज़ा दैनी तेता भाल़ी छ़ुटअ सोभी दर्छ़णअ अर सोभ आसा हक्‍कै-बक्‍कै हुऐ दै। इना सोभी गल्‍ला आसा तम्हैं सोभै आपणीं आछी भाल़ै लागै दै। 9 तैही पाऐ म्हारै बाब जुधा दी मारी अर म्हारै बेटल़ी-माठै निंयैं कैद करी गलामी लै!

10 "ऐबै आसा मंऐं आपणैं दिलै एही डाही दी कि मुंह करनी इज़राईले परमेशर बिधाता संघै करार कि ऐबै निं हाम्हां लै तेऊओ कोप लोल़ी पल़अ।" 11 मेरै साथीओ, मेरै शोहरूओ, ऐबै निं बल़ैघदै लागा, तम्हैं आसा तिंयां प्रोहत ज़ुंण बिधाता आसा छ़ांटै दै कि तेऊ सेटा धूप ज़ाल़े अर सारी परज़ा का बिधाते स्तोती कराओए अर तेऊ लै भैंट च़ढाऊए।

12 ज़ांऊं राज़अ हिजकिया इना गल्‍ला करी मुक्‍कअ, तिधी सोभ लेबी उझ़ुऐ संघा सभाल़अ आपणअ-आपणअ काम। ज़ुंण लेबी तिधी थिऐ, तिंयां थिऐ ईंयां:

कहात टोली का थिऐ अमासो शोहरू महात, अजर्याहो शोहरू जोएल।

मरारी टोली का थिऐ अबदीओ शोहरू कीश अर जहलेलो शोहरू अजर्याह।

गर्शोनी टोली का थिऐ जिम्मो शोहरू जोआह अर जोआहो शोहरू एदेन।

13 एलीसापाने लुआदा मांझ़ै थिऐ शिम्री अर जेइल।

असापे लुआदा मांझ़ै आसा तै: जकर्या अर मतानियाह।

14 हमाने लुआदा मांझ़ै थिऐ जेहीएल अर शिमी।

जदूतूने लुआदा मांझ़ै थिऐ शमयाह अर उज्जीएल।

15 इनै झाल़ै आपणैं सोभ लेबी भाई-बंध संघा हुऐ आप्पू सोभ ज़ण्हैं च़ांगै-च़ोखै। तेखअ लागै तिंयां बिधाते भबने शुधी करदै ज़िहअ राज़ै तिन्‍नां लै हुकम किअ त। तिंयां लागै बिधाते बिधी-बधानो धैन डाही तिन्‍नें कामां करदै। 16 प्रोहत डेऊऐ खास पबित्र ज़ैगा संघा किई तेथ सारै धोई-शोई शुधी। ज़ुंण बी तेथ छ़ोतली च़िज़ा थिई, तिंयां काढी तिन्‍नैं बिधाते भबना बागै खोल़ै लै अर तिधा का च़की होरी लेबी संघा डाही नगरी बागै किद्रोन नाल़ै शोटी।

17 साज़ै च़ैत्रै नऊंऐं संबता पोर्ही किअ तिन्‍नैं बिधाते भबने धोणैं-शोणैओ काम शुरू अर बिधाते भबना फेर ताटी दी लागै तिन्‍नां आठ धैल़ै। तेखअ किई तिन्‍नैं बिधाते भबने शुधी अर तेथ लागै आठ धैल़ै होर अर इहअ करै मुक्‍कै तिंयां सोल़ा च़ैत्रै बिधाते भबना धोई-शोई।

18 तेखअ डेऊऐ तिंयां हिजकिया राज़ै सेटा संघा खोज़अ, "माहा राज़अ, हाम्हैं हेरअ आपणअ काम पूरअ करी। ऐबै हेरी हाम्हैं बिधाते भबनै सारै दी शुधी करी, हूम करने बेदी, भोज़ना डाहणेंओ मेज़ बगैरा सारै चाण-भांडै हेरै हाम्हैं धोई-शोई।" 19 ज़ुंण चाण-भांडै अहाज राज़ै आपणैं राज़ा दी विश्वास घात करी बिधाते भबना का पोर्ही शोटै तै, तिंयां बी डाहै हाम्हैं धोई-शोई बेदी सेटा झाल़ी।

20 दुजै धैल़ै दोत्ती-दोत्थी किऐ राज़ै हिजकिया नगरीए सोभ कार-करिंदै कठा संघा डेऊऐ तिंयां बिधाते भबना लै। 21 तिन्‍नैं निंयैं आप्पू संघै सात बल्द, सात रिठ, सात होछ़ै गाभू हूम बल़ीदान करना लै अर सात निंयैं बाकरी मांझ़ा का बाकरै राज़ै अर यहूदा मुल्खे लोगे पाप माफी लै पाप बल़ीदान करना लै। ज़ुंण हारणे खिंबा का प्रोहत थिऐ, राज़ै किअ तिन्‍नां लै हुकम कि तिंयां सोभी पशू बल़ीदान करी बिधाते बेदी दी हूम करे। 22 तिन्‍नैं काटै तिंयां बल्द संघा छ़ल़िकअ तेतो लोहू बेदी दी। तेखअ काटै तिन्‍नैं रिठ संघा छ़ल़िकअ प्रोहतै तेतो लोहू बेदी दी अर खिरी काटै तिन्‍नैं तिंयां होछ़ै गाभू अर तिन्‍नों लोहू बी छ़ल़िकअ बेदी दी। 23 तेखअ आणै पाप बल़ी लै बाकरै राज़ै अर सोभी लोगा नेल़ तिन्‍नैं सोभी लाऐ आपणैं हाथ तिन्‍नां दी। 24 तेखअ काटै प्रोहतै तिंयां बाकरै पाप बल़ी लै संघा छ़ल़िकअ तिन्‍नों लोहू बेदी दी ताकि सारै इज़राईलीए पापो प्राश्त होए। किल्हैकि राज़ै किअ त हुकम कि सोभी इज़राईली लै करै हूम बल़ीदान अर पाप माफी लै बल़ीदान।

25 तेखअ सभाल़ै राज़ै हिजकिया सोभी लेबी लै बिधाते भबनै तिन्‍नें आपणैं-आपणैं काम। तेऊ दैनी छ़छ़ाल़ा, बींन, नर्शिंगै अर होर साज़-बाज़ राज़ै दाबेदे गूर गाद अर नाताना का सभाल़ी। ज़िहअ बिधाता हुकम त किअ द। 26 तेखअ खल़्हुऐ लेबी राज़ै दाबेदै बणाऐं दै तिन्‍नां सोभी साज़-बाज़ च़की अर प्रोहत खल़्हुऐ नर्शिंगै च़की। 27 तेखअ किअ राज़ै हिजकिया हुकम कि बल़ी किऐ दै पशू बेदी दी हूम करे। ज़ांऊं बेदी दी हूम शुरू हुअ। प्रोहत लागै बिधाते गिहा बोल्दै, नर्शिंगै बाज़दै अर इज़राईल मुल्खे राज़ै दाबेदै बणाऐं दै तिन्‍नां साज़-बाज़ा बाज़दै। 28 तिधी आऐ दै सोभी लोगै किई बिधाते स्तोती अर सोभ रहै नर्शिंगै, गाज़ै-बाज़ै संघै गिहा बोल्दै लागी ज़ेभै तैणीं हूम करी निं मुक्‍कै। 29 ज़ांऊं हूम करी मुक्‍कै तेखअ टेक्‍कअ राज़ै अर सोभी लोगै धरनीं उटी बाखा माथअ। 30 तेखअ किअ राज़ै हिजकिया अर राज़े कार-करिंदै लेबी लै हुकम कि राज़ै दाबेद अर असाप गूरै लिखै दै भज़ना बोली करा बिधाते स्तोती। सोभी टेक्‍कअ धरनीं उटै पल़ी बिधाता सेटा माथअ संघा लागै सोभै खुशी-खुशी गिहा बोली बिधाते स्तोती करदै।

31 तेखअ बोलअ राज़ै हिजकिया सोभी लोगा लै, "ऐबै हुऐ तम्हैं सोभै बिधाता लै शुचै, ऐबै आणा ओर्ही बिधाता लै मेल़-ज़ोल़ अर शूकर करनैओ बल़ीदान।"

तेखअ आणै परज़ा मांझ़ै बिधातो शूकर करना लै बल़ीदान अर ज़ुंण दैई सका तै तिन्‍नैं दैनै तत्त-दिला का बिधाता लै हूम बल़ीदान बी। 32 आम लोगा मांझ़ै आणै बिधाता लै सत्तर बल्द, एक शौ रिठ अर दूई शौ होछ़ै गाभू हूम बल़ीदान करना लै। 33 होर आणै छ़ह शौ बल्द अर चअन हज़ार भेडा-बाकरीए हेल़्ह ज़ुंण आम लोगै बिधाता बर्गत मांगणा लै बांधअ तै डाहै दै। 34 तिधी तै प्रोहत बेघै थोल़ै कि तिन्‍नां निस्सअ हूम बल़ीदान करना लै पशूए खाला बी काढी सकै, किल्हैकि कई प्रोहता निं आपणीं शुधी करनैओ बगत भेटअ त। तेखअ आऐ तिन्‍नें मज़ती लै होर लेबी ज़ुंण आपणीं शुधी करी शुचै तै हुऐ दै, तिन्‍नैं किई तिन्‍नें मज़त ज़ांऊं तैणीं सारअ काम निं छ़ेक्‍कअ। लेबी डाहा तै प्रोहत च़ांगै-च़ोखै रहणा लै प्रोहता का बी खास्सअ धैन। 35 हूम बल़ीदाने पशू पठी हूम करनै का लाऊआ लागा ती प्रोहता होरी बल़ीदाना का बिधाता लै भैंट किई दी च़र्बी बी हूम करनी, हर हूम बल़ीदाना संघै लागा त दाखे रसो अर्घअ दैणअ।

इहअ करै हुई बिधाते भबनै भिई पूज़ा-गाज़ा शुरू। 36 राज़अ हिजकिया अर यहूदा मुल्खे सारी परज़ा ती खास्सी खुश हुई दी। किल्हैकि ज़ुंण काम तिन्‍नैं करनअ सोठअ त सह किअ बिधाता हेरा-हेरी पूरअ।