2 इतिहास 33

यहूदा मुल्खै राज़अ मनिश्शे

1 ज़धू मनिश्शे यहूदा मुल्खो राज़अ बणअ, तेऊए अमर ती तधू बारा साले अर तेऊ किअ एरुशलेम नगरी का पजुंजा साला तैणीं राज़। 2 मनिश्शे किअ पाप ज़ेता बिधाता नांईं च़ाहंदअ त कि सह करे! तेऊ किऐ तिन्‍नां ज़ाती ज़िहै च़िल़्हखरै काम ज़ुंण बिधाता तेऊ देशै इज़राईली पुजणैं का आजी दूर किऐ तै।

3 मनिश्शे च़िणैं उझै धारा देहुरै भिई ज़ुंण तेऊए बाब हिजकिया खतम किऐ तै! तेऊ बणाईं इज़राईले राज़ै अहाबा ज़ेही बाल देअ अर अशेरा देबीए मुहुर्ती। सरगे ग्रहा पूज़दअ बी रहा त मनिश्शे लागी। 4 एरुशलेम नगरी बिधाते भबनै ज़िधी सिधै बिधाता सेटा माथअ टेक्‍का तै, तिधी बणाईं तेऊ होरी देअआ लै बी बेदी। 5 बिधाते भबनै दोहरी बाखा खोल़ै बणाईं ग्रहे पूज़ा करना लै बेदी। 6 हिनोम खागै किअ आपणअ शोहरू बी बल़ीदान करी हूम! मनिश्शे करा त डांऊं-च़ेल्‍लै, शाऊई भाल़णैं आल़ै, मणशाण झ़ैऊंणै आल़ै सेटा डेऊई। इहअ करै किअ तेऊ बिधाता लै घोर पाप अर तेता लै आई बिधाता खास्सी रोश्शै। 7 तेऊ ज़ुंण अशेरा देबीए मुहुर्ती बणाईं, तेऊ स्तापी सह बिधाते तेऊ भबनै ज़ेता लै बिधाता राज़ै दाबेद अर दाबेदे शोहरू सुलैमाना का इहअ बोलअ त, "इज़राईले बारा गोत्रे सोभी ज़ैगा मांझ़ै छ़ांटी मंऐं एरुशलेम नगरी अह ज़ैगा आप्पू लै ज़िधी सोभी एछी मुंह सेटा माथअ टेक्‍कणअ। 8 ज़ै इज़राईली मेरै सोभै हुकम मने अर मेरै तेऊ बधाने साबै आपणीं ज़िन्दगी ज़िऊए ज़ुंण मेरै दास मोसा तिन्‍नां लै दैनअ, तै डाहणैं मुंह तिंयां तेऊ देशै बसाऊई ज़ुंण मंऐं तिन्‍नें दादा-बाबा लै दैनअ। तिन्‍नां निं तिधा का किधी ठुल़णें ज़रुरत आथी।" 9 पर यहूदा अर एरुशलेम नगरीए लोगै निं बिधाते साबै ज़िन्दगी ज़िऊई। राज़ै मनिश्शे पाऐ तिंयां इहै कबाता कि तिंयां लागै तिन्‍नां होरी ज़ाती का बी खास्सै पाप करदै ज़ुंण बिधाता तेऊ देशा का इज़राईली नदरी खतम किई ती।

राज़अ मनिश्शे पछ़ताअ

10 बिधाता दैनी राज़ै मनिश्शे अर तेऊए परज़ा लै चतैनगी बी पर तिन्‍नैं किई शूणीं नां शूणीं। 11 तेखअ दैनअ बिधाता अश्शूर देशे सैनापति यहूदा मुल्खा संघै जुधा लै एछणैं। तिन्‍नैं किअ यहूदा मुल्खो राज़अ मनिश्शे कैद तेखअ लाई तेऊए नाकै नकेल संघा निंयं पितल़े शांघल़ी करै बान्हीं बाबेल देशा लै। 12 ज़ांऊं राज़ै मनिश्शे लै अह खरी पल़ी, तेखअ फिरी तेऊ आपणैं दादा-बाबे परमेशर बिधाते आद संघा मांगी बिधाता का माफी कि हे बिधाता, ऐबै कर मेरी मज़त तूह ई। 13 बिधाता शूणीं मनिश्शे अरज़ संघा पजैल़अ सह एरुशलेम बापस कि सह यहूदा मुल्खै राज़ करे। तेखअ हुअ मनिश्शे निहंचअ कि बिधाता ई आसा परमेशर।

14 एता बाद किअ राज़ै मनिश्शे दाबेदपूर पुर्बा बाखा गहल़ च़णाई करी होर बी उछ़टअ। सह च़णाई किई तेऊ पछ़मा बाखा गीहोन गाडा उझै म्हाछ़ली नाओंए प्रऊल़ी तैणीं अर नगरीए ज़ैगा फेर किअ सह गहल़ उछ़टअ ज़ेता लै ओपेल बोला। यहूदा मुल्खे सोभी गहल़ा आल़ी नगरी डाही तेऊ आपणीं सैना का ज़ुदै-ज़ुदै दल अर तिन्‍नां प्रैंदै डाहै सैनापति छ़ांटी। 15 बिधाते भबना का काढै तेऊ काठा-पात्थरे मुहुर्ती अर होरी देअआ-देबीए मैहरै पोर्ही। तिन्‍नें ज़ेतरी बेदी बिधाते भबनै, एरुशलेम नगरी ज़ैगै-ज़ैगै उछ़टी धारा थिई, तिंयां बी झाल़ी तेऊ सोभै संघा शोटी नगरी बागै। 16 तेखअ बझ़ैल़ी तेऊ बिधाते बेदी स्केरनै, संघा किअ तिधी बिधाता लै मेल़-ज़ोल़ अर शूकर करनैओ बल़ीदान। तेखअ किअ मनिश्शे यहूदा मुल्खै सोभी लोगा लै हुकम कि सोभ करा इज़राईले परमेशर बिधाते पूज़ा-गाज़ा। 17 पर तज़ी बी रहै परज़ा मांझ़ै कई लोग ज़ैगै-ज़ैगै उझै धारा बल़ीदान करदै लागी पर करा तै तिंयां बिधाते नाओंऐं।

मनिश्शेओ राज़ हुअ खतम

18 राज़ै मनिश्शे ज़ुंण बी काम किऐ, ज़ेही तेऊ परमेशरा सेटा अरज़ किई, इज़राईले परमेशर बिधाता गूरा बाती तेऊ लै किज़ै चतैनगी दैनी, ईंयां सोभै गल्‍ला आसा इज़राईले राज़े इतिहासे कताबा दी लिखी डाही दी। 19 राज़ै मनिश्शे प्राथणां, तेखअ परमेशरै सह केऊ साबै शूणीं, मनिश्शे किहै-किहै पाप किऐ, तेऊ किज़ै बूरअ किअ, तेऊ किधी-किधी धारा बणाऐं होरी देअए गान-स्तान, अशेरा देबीए डौंड तेऊ किधी-किधी डाहै घैऊई अर होर सह किज़ै-किज़ै मुहुर्ती पूज़ा त, इना सोभी गल्‍लो इतिहास आसा बिधाते गूर होसाह लिखी डाहअ द। 20 खिरी मूंअ राज़अ मनिश्शे संघा डाहअ सह तेऊए दादा-बाबा संघै तेऊए मैहलै दाबी। आजू बणअ तेऊओ शोहरू अमोन तेऊए ज़ैगा यहूदा मुल्खो राज़अ।

यहूदा मुल्खै राज़अ अमोन

21 ज़धू अमोन यहूदा मुल्खो राज़अ बणअ, तधू ती तेऊए अमर बाई साले। तेऊ किअ एरुशलेम नगरी का दूई साला तैणीं राज़। 22 अमोनै बी किअ आपणैं बाब मनिश्शे ज़िहअ पाप, ज़ेता बिधाता नांईं च़ाहंदअ त कि सह करे। सह लागअ तिन्‍नां मुहुर्ती पूज़दअ अर तेता लै बल़ीदान करदअ ज़ुंण तेऊए बाब मनिश्शे ती बणाईं दी। 23 अमोन निं आपणैं बाबा ज़िहअ पछ़ताअ करी बिधाता बाखा फिरअ। सह निखल़अ पाप करना लै आपणैं बाब मनिश्शे का बी च़ार गंईं आजू।

24 अमोने कार-करिंदै किअ तेऊ लै राज़ द्रोह संघा डाहअ सह तेऊए ई मैहला भितरी मारी। 25 यहूदा मुल्खे आम परज़ा पाऐ तिंयां मारी ज़ुंणीं अमोन मारअ त अर तेखअ बणाअं तिन्‍नैं अमोने ज़ैगा तेऊओ शोहरू जोशिया राज़अ।