2 इतिहास 34

यहूदा मुल्खो राज़अ जोशिया

1 ज़धू जोशिया यहूदा मुल्खो राज़अ बणअ, सह थिअ तधू आठा सालो शोहरू। तेऊ किअ एरुशलेम नगरी का कत्ती साला तैणीं यहूदा मुल्खै राज़। 2 जोशिया रहअ बिधाता लै शुचअ-पाक्‍कअ अर तेऊ किअ तिहअ ई ज़िहअ बिधाता च़ाहा त कि सह करे ज़िहअ तेऊओ दाद-बाब राज़अ दाबेद थिअ, तेही ई किई तेऊ सोभै गल्‍ला परमेशरे बधाने साबै।

जोशिया किऐ च़िल़्हखरै गान-स्तान खतम

3 राज़अ जोशिया त अज़ी लान्हअ ई, ज़ांऊं तेऊ राज़ै बणी आठ साला हुई, तेखअ लागअ सह आपणैं दाद-बाब राज़ै दाबेदे परमेशरे बारै शिखल़दअ। तेता का च़ऊ साला बाद ज़ांऊं सह बिहा साले अमरो हुअ, तेखअ लागअ सह यहूदा अर एरुशलेम हर ज़ैगे शुधी करदअ। तेऊ पाऐ सारै का मुहुर्ती पूज़ा करने गान-स्तान पठी ढोल़ी अर अशेरा देबीए डौंड अर होर मुहुर्ती बी काढी पठी पोर्ही। 4 तेऊ किअ हुकम कि बाल देअए बेदी पाआ ढोल़ी अर ज़ुंण उछ़टै दी धूपा ज़ाल़णे बेदी थिई, तिंयां बी पाई फाल़ी। अशेरा देबीए डौंड अर टिप्पी अर गल़ाऊई-ढल़ाऊई करै बणाईं दी होर मुहुर्ती बी किई तेऊ ज़ाक्‍करी करै भींन अर तेते छिक्‍करी डाही तेऊ तिन्‍नें मल्थाना दी शोटी ज़ुंण तिन्‍नां मुहुर्ती लै बल़ीदान करा तै। 5 ज़ुंण तिन्‍नां मुहुर्तीए पज़ैरै थिऐ, तिन्‍नें हाडकै किऐ तेऊ तिन्‍नें ई बेदी दी हूम अर इहअ करै काढी तेऊ सारै यहूदा अर एरुशलेम नगरी का छ़ोत पोर्ही। 6 ज़िधी मनिश्शे, शमौन, एप्रैम अर नप्ताली गोत्र आसा बस्सै दै, तिन्‍नें नगरी अर तेता ओरी-पोर्ही शुन्‍नैं रेगीस्तानै बणाईं दी बेदी बी पाई तेऊ फाल़ी। 7 तेथ बी पाऐ अशेरा देबीए डौंड अर टिप्पी अर गल़ाऊई-ढल़ाऊई करै बणाईं दी होर मुहुर्ती फाल़ी अर तिंयां किई तेऊ ज़ाक्‍करी करै माट्टै जैंदरी भींन। इज़राईल मुल्खै ज़ेतरी बी धूपा ज़ाल़णे बेदी थिई, तिंयां किई तेऊ पठी खतम अर तेखअ आअ सह खिरी एरुशलेम नगरी लै फिरी।

बधाने कताब लोल़ी

8 ज़ांऊं राज़अ जोशिया सारै यहूदा मुल्खै अर बिधाते भबना का मुहुर्ती पूज़ा करने गान-स्तान खतम करी शुधी करी मुक्‍कअ, तेखअ छ़ाडै तेऊ आपणैं राज़ा दी ठार्हुई साला बिधाते भबने मराम्मती करदै आपणैं कार-करिंदै मांझ़ै असलाहो शोहरू शापान, एरुशलेम नगरीओ राज़पाल मासेया जोअहाजो शोहरू जोआह ज़ुंण इतिहास लिखणैं आल़अ काईथ थिअ। 9 तिंयां डेऊऐ माहा प्रोहत हिलकिया सेटा। लेबी मांझ़ै ज़ुंण बिधाते भबने प्रऊल़ी सेटा पहरी थिऐ, तिन्‍नैं दैनै माहा प्रोहता का तिंयां ढब्बै सभाल़ी ज़ुंण बिधाते प्रऊल़ी सेटा पहरी लोगा का दान ढाकै तै। तिन्‍नैं लेबी तै तिंयां ढब्बै एप्रैम, मनिश्शे अर होरी उतरा बाखा बस्सै दै इज़राईली, यहूदा, बिन्यामीन अर एरुशलेम नगरीए लोगा का झाल़ै दै। 10 तेखअ सभाल़ै तिंयां ढब्बै तिन्‍नां चिई का ज़हा लै राज़ै बिधाते भबने मराम्मती करने ज़िम्मैंबारी थिई सभाल़ी दी। तिन्‍नैं दैनी तेता मांझ़ै काठे कारीगीर अर 11 पात्थरे कारीगीरे मज़दूरी अर बाकी ढब्बै करै लऐ तिन्‍नैं तेता करै काठ-पात्थर अर होर च़िज़ा मोलै ज़ुंण भबने मराम्मती दी कामैं एछे अर तिन्‍नां होरी घअरे मराम्मती करना लै बी किऐ खर्च़ ज़ुंण यहूदे राज़ै कई राज़ै ढोल़ी तै पाऐ दै।

12 ज़हा का बिधाते भबने मराम्मत करनैओ काम त सभाल़अ द, तिंयां थिऐ शुचै-पाक्‍कै मणछ। कारीगीरे कामों धैन डाहणैं आल़ै दरोगै थिऐ मरारी टोली का जहात अर ओबेदियो, कहात टोली का जकर्या अर मशूलाम। लेबी तै कामां कराऊंणै आल़ै ज़ाण-प्रबीण अर गाज़ै-बाज़ैओ बी थिअ तिन्‍नां का थोघ कि कुंण राग केभै बाज़ा। 13 होर तै लेबी मांझ़ै बेठूए कामों धैन डाहणैं आल़ै अर होरी कई कामों धैन डाहणैं आल़ै, कई तै भबना ओर्ही-पोर्ही पहरी अर कई साब-कताब लिखी डाहणैं आल़ै काईथ।

14 ज़ांऊं भढारा का ढब्बै बागा लै काढदै लागै, हिलकिया माहा प्रोहता भेटी तेथ बिधाते गूर मोसा लिखी दी बधाने कताब। 15 हिलकिया माहा प्रोहतै बोलअ शापान काईथा लै, "मुंह भेटी बिधाते भबनै बधाने कताब।" तेखअ दैनी सह कताब तेऊ शापान काईथे हाथै। 16 शापानै निंईं सह कताब राज़ै सेटा संघा बोलअ इहअ, "ज़िहअ-ज़िहअ काम तंऐं हाम्हां का सभाल़अ त, सह तेता आसा हाम्हैं तिहअ ई करदै लागै दै। 17 ज़ुंण ढब्बै बिधाते भबने तै डाहै दै, तिंयां हेरै हाम्हैं तिन्‍नां का दैई ज़हा लै बिधाते भबने मराम्मतीओ काम आसा सभाल़अ द।" 18 तेखअ बोलअ शापान काईथै राज़ै लै इहअ, "माहा राज़अ, माहा प्रोहत हिलकिया दैनी मुखा अह कताब बी।" तेखअ लागअ शापान तैहा कताबा का ज़ोरै-ज़ोरै पहल़दअ।

19 बधाने कताबे गल्‍ला शूणीं धेल़ै दुखा दी राज़ै आपणैं झिकल़ै। 20 तेखअ किअ राज़ै जोशिया हिलकिया प्रोहत, शापाने शोहरू आहीकाम, मिके शोहरू अबदोन, शापान काईथ अर असाया नाओंए एकी दरबारी लै इहअ हुकम, 21 "बिधाता हणीं मुल्है अर यहूदा मुल्खे परज़ा लै खास्सी रोश्शै आई दी! किल्हैकि म्हारै दादै-बाबै निं सह बधान पूरअ किअ ज़ुंण ऐहा कताबा दी लिखअ द आसा! तम्हैं एछा मुंह बाखा बिधाता पुछ़ी कि बिधाता किहअ बोला कि हाम्हैं इज़राईली करे।"

22 तेखअ डेऊऐ हिलकिया प्रोहत, शापाने शोहरू आहीकाम, मिके शोहरू अकबोर, शापान बज़ीर अर असाया नाओं दरबारी हुल्दा नाओंए एकी बेटल़ी सेटा पुछ़दै। तेसे लाल़ै नाअं त शलूम अर सह थिअ बिधाते भबनै झिकल़ैओ भढारी। शलूम थिअ तोखातो शोहरू अर हासराहो पोचअ। हुल्दा रहा ती राज़धानी एरुशलेम नऊंऐं गराऊंऐं। तिन्‍नैं खोज़ी तैहा का राज़ै बाखा सारी गल्‍ला। 23 हुल्दा बोलअ तिन्‍नां लै इहअ कि तम्हैं डेओआ राज़ै सेटा बापस फिरी, संघा खोज़ै राज़ै का इहअ समाद कि इज़राईलो परमेशर बिधाता बोला इहअ, 24 "मंऐं लाई एरुशलेम नगरी अर तेथ बस्सै दै सोभी मणछा लै तेही ई सज़ा दैई ज़ुंण तैहा कताबा दी आसा लिखअ द ज़ुंण कताब यहूदा मुल्खे राज़ै नदरी पहल़ी। 25 यहूदा मुल्खै बस्सी दी परज़ा समझ़अ हुंह नकदरअ। तिंयां लागै पराऐ देअआ पूज़दै अर बल़ीदान करदै। तिन्‍नैं आणी मुल्है खास्सी रोश्शै अर ऐबै निं मेरअ रोश्श फांभअ हंदअ। 26,27 यहूदे राज़ै जोशिया ज़ुंणीं तम्हैं पुछ़दै छ़ाडै, तेऊ का खोज़ै इहअ कि हुंह इज़राईलो परमेशर बिधाता बोला तेरै बारै इहअ कि मंऐं भाल़अ कि तूह किहअ दुखी हुअ ज़ांऊं तंऐं इहअ शूणअ कि अह देश अर एथ बस्सै दै लोग हणैं पठी खतम। तंऐं धेल़ै तेऊ दुखै आपणैं झिकल़ै अर मंऐं शूणअ तूह लेरदअ बी। 28 ऐबै करनअ मुंह इहअ कि ज़ुंण आफ़त मुंह एरुशलेम नगरी लै पाणीं, तैहा निं हुंह तेरी ज़िऊंदी ज़िता पल़णै दैंदअ, ईंयां गल्‍ला निभदी निं ताह आपणीं आछी नदरी भाल़णीं।"

जोशिया किई मुहुर्ती पूज़ा बंद

29 राज़ै जोशिया शादै यहूदा मुल्खे अर एरुशलेम नगरीए सोभ सैणैं, 30 संघा डेऊऐ तिंयां सोभै ज़ण्हैं एरुशलेम बिधाते भबना लै, तिन्‍नां संघै तै लेबी, गूर, प्रोहत अर यहूदा मुल्खे आम आदमी बी। ज़ांऊं सोभै ज़ण्हैं तिधी थिऐ, राज़ै जोशिया पहल़ी बधाने सह कताब बाढै ज़ोरै-ज़ोरै ज़ुंण बिधाते भबनै भेटी ती। 31 ज़ांऊं जोशिया राज़अ पहल़ी मुक्‍कअ, सह खल़्हुअ बिधाते भबनै एकी थाम्हा नेल़। संघा बझ़ैल़ै सोभी लोगा का सोह खाणैं कि आझ़ा बाद मनणअ हाम्हां बिधातो बधान, सोभ बिधी अर हुकम तत्त-दिला का। हाम्हां करनअ तिहअ ई ज़िहअ ऐहा बधाने कताबा दी आसा लिखदअ द। ज़ेतरै लोग तिधी थिऐ, तिन्‍नैं सोभी तिन्‍नैं सोभी किई बिधाते सोह खाई करार। 32 ज़ुंण बिन्यामीन गोत्रा मांझ़ै एरुशलेम तै आऐ दै, तिन्‍नां का बी बझ़ैल़ी बिधाते नाओंऐं करार करनै। एरुशलेम बस्सै दै सोभ लोग लागै तिहअ ई करदै ज़िहअ तिन्‍नें दादा-बाबो परमेशर च़ाहा त कि तिंयां करे। 33 राज़ै जोशिया किई इज़राईली मांझ़ै सारै का च़िल़्हखरी मुहुर्ती अर छ़ोतली च़िज़ा दूर। आपणीं ज़िऊंदी ज़िता डाहै तेऊ सोभ लोग आपणैं दादा-बाबे परमेशर बिधाते स्तोती करदै लाई।