1 यहूदा मुल्खो राज़अ जहोशापात हुअ खास्सअ सेठ अर मशूर। तेऊ किअ आपणैं शोहरू जेहोरामो बैह इज़राईले राज़ै अहाबे शोहरी संघै करी मेल़-ज़ोल़। 2 थोल़ी साला बाद डेऊअ जहोशापात इज़राईल मुल्खे राज़धानी सामरी नगरी अहाब राज़ै सेटा मिलदअ। अहाब राज़ै दैनी जहोशापात अर तेऊए कार-करिंदै लै रिठ-बाकरे हेल़्ही काटी धाम। अहाब राज़अ च़ाहा त इहअ कि जहोशापात तेऊ संघै ज़ुल़ी गलाद मुल्खे रामोत नगरी संघै जुधा लै एछे। 3 इज़राईले राज़ै अहाबै पुछ़अ यहूदे राज़ै जहोशापाता का, "गलाद मुल्खै रामोत नगरी ताह मेरी साथा अरामी संघै जुधा लै एछणअ ऐ?"

जहोशापातै बोलअ, "हो, हाम्हैं आसा दुहै एक। मेरी सैना आसा तेरी बी सैना अर मेरै घोल़ै बी आसा तेरै बी घोल़ै। 4 पर तेता का आजी लणअ हाम्हां बिधाता पुछ़ी कि सह किज़ै बोला।"

5 तेखअ शादै इज़राईले राज़ै अहाबै कोई च़ार शौ गूर संघा पुछ़ै तिंयां, "हुंह गलाद रामोत नगरी अरामी संघै जुध छ़ेल़ूं कि रहणैं दैंऊं?"

तिन्‍नैं बोलअ, "तूह छ़ेल़ तिन्‍नां संघै जुध बिधाता हेरनअ तूह ज़ताऊई।"

6 पर जहोशापातै पुछ़अ, "इधी बिधातो कुंण होर गूर बी किनी आसा ताकि तेऊ पुछ़ी हाम्हां ऐहा गल्‍ला लै निहंचअ होए?"

7 अहाब राज़ै दैनअ जहोशापाता लै ज़बाब, "एक गूर आसा होर, इमलो शोहरू मिका तेऊ बाती बी सका हाम्हैं बिधाता पुछ़ी। पर तेऊ गूरे लागा मुंह रोश्श! किल्हैकि सह निं मुल्है कधू राम्बल़अ खोज़दअ ई आथी, सह खोज़ा कबल्‍लअ बूरअ ई।"

जहोशापातै बोलअ इज़राईले राज़ै लै, "तूह निं इहअ बोलै आथी!"

8 तेखअ शादअ इज़राईले राज़ै अहाबै एक दरबारी संघा किअ तेऊ लै हुकम, "इमले शोहरू मिका आण एभी शादी।"

9 इज़राईलो राज़अ अहाब अर यहूदो राज़अ जहोशापात तै दुहै ज़ण्हैं राज़ेए सुआबा बान्हीं सामरी नगरीए प्रऊल़ी बागै ताटी आपणीं-आपणीं गाद्दी दी बेठै दै। सोभै गूर तै तिन्‍नां सेटा आजू हणैं आल़ी गल्‍ला प्रगट करदै लागै दै। 10 कनाने शोहरू सिदकिया गूरै बणाऐं लोहे शींग संघा बोलअ अहाब राज़ै लै, "बिधाता बोला इहअ, ‘इना शींगा करै करनअ ताह अरामी संघै जुध अर तिंयां करनै ताह पठी मारी खतम।’" 11 होरी गूरै बी बोली एही गल्‍ल, "तूह निखल़ गलाद मुल्खे रामोत नगरी जुधा लै, बिधाता हेरनअ तूह ज़ताऊई।"

12 ज़ुंण दरबारी अहाब राज़ै मिका सेटा लै दूत छ़ाडअ त, तेऊ बोलअ मिका लै, "होरी सोभी गूरै खोज़अ इहअ कि राज़अ हणअ सफल, तूह च़ाल्‍ल संघा खोज़ै तूह बी इहअ ई।"

13 पर मिका दैनअ ज़बाब, "हुंह काढा तेऊ बिधाते सोह ज़ुंण सदा ज़िऊंदअ आसा, ज़िहअ सह मुखा खोज़े मुंह बोल़णअ तिहअ ई!"

14 ज़ांऊं मिका राज़ै सेटा पुजअ, अहाब राज़ै पुछ़अ तेऊ का, "मिका, तूह खोज़ कि हुंह अर जहोशापात गलाद रामोत नगरी अरामी संघै जुध छ़ेल़ूं कि रहणैं दैंऊं?"

मिका दैनअ ज़बाब, "जुध छ़ेल़, अह गल्‍ल आसा पाक्‍की कि तूह जाणअ ज़िती। बिधाता हेरनअ तूह ज़ताऊई।"

15 अहाब राज़ै पुछ़अ भिई, "मिका, मंऐं हेरअ ताल्है कई बारी बोली कि तूह खोज़ मुखा शुची गल्‍ला! तूह खोज़ बिधाते नाओंऐं कि असली दी बिधाता किज़ै बोला?"

16 मिका दैनअ ज़बाब, "मुखा शुझिआ इहअ कि इज़राईले सैना छिंघुई उझै धारा एही भेडा-बाकरीए हेल़्ही ज़ेही ज़हा फुआल कोहै निं हंदअ। बिधाता बोला इहअ, ‘इनो फुआल पाअ मारी। इना दैआ राज्ज़ी-राम्बल़ै घअरा लै डेऊणैं।’"

17 इज़राईले राज़ै अहाबै बोलअ तेखअ जहोशापाता लै, "मंऐं हेरअ त ताखा पैहलै ई खोज़ी कि अह गूर निं मुल्है कधू राम्बल़अ खोज़दअ ई आथी, अह खोज़ा कबल्‍लअ बूरअ ई!"

18 तेखअ खोज़अ मिका आजू इहअ, "ऐबै शुण बिधातो समाद! मुखा शुझिआ इहअ बी कि बिधाता आसा आपणीं गाद्दी दी बेठअ द अर स्वर्गे सोभ ज़ीब हुऐ तेऊ फेर कठा। 19 बिधाता पुछ़अ, ‘इज़राईलो राज़अ अहाब कहा डाहणअ ठगी कि सह गलाद मुल्खे रामोत नगरी अरामी संघै जुध छ़ेल़े अर तिधी पाणअ सह मारी?’ तिधी दैनी स्वर्ग दूतै आपणैं-आपणैं साबै कई सलाह। 20 खिरी आई एक आत्मां संघा खल़्हुई बिधाता सेटा। तैहा बोलअ इहअ, ‘सह डाहणअ मुंह ठगी।’ बिधाता पुछ़अ तैहा आत्मां का, ‘ताह किहअ करै ठगणअ सह?’ 21 तैहा आत्मां दैनअ ज़बाब, ‘मुंह डेऊणअ अहाब राज़े सोभी गूरा दी संघा बझ़ैल़णअ मुंह झ़ुठअ बोल़णैं।’ बिधाता बोलअ, ‘तै जाणीं तूह अहाब राज़ै ठगणा लै सफल हई, डेऊ ज़िहअ तूह सोठा तिहअ कर।’"

22 खिरी बोलअ मिका इहअ, "अहाब, असली दी हुअ ताल्है इहअ। बिधाता दैनअ हणैं कि ईंयां गूर ताल्है झ़ुठअ बोले। बिधाता आसा हेरै असली दी तेरै बारै इहअ खोज़अ द कि तूह हणअ पठी बरैबाद!"

23 तेखअ उखल़अ कनानो शोहरू सिदकिया गूर उझै मिका सेटा तेऊ बाही मिके थोथरै च़ैंडै संघा बोलअ इहअ, "बिधाता कधू गअ मुंह छ़ाडी ताखा खोज़दअ लागी?"

24 मिका दैनअ ज़बाब, "ताखा लागणअ तैहा धैल़ी थोघ ज़ेभै ताह लुक्‍कणा लै पांडा-पांडा लागणअ ठुहर्नअ।"

25 तेखअ किअ इज़राईले राज़ै अहाबै आपणैं सपाही लै हुकम, "मिका करा कैद, संघा निंयां एऊ नगरीए राज़पाल अमोन अर जोआश टिक्‍कै सेटा। 26 तिन्‍नां का बोलै तम्हैं, ‘राज़ैओ हुकम आसा कि एऊ डाहा कैद खानै पाई, ज़ेभै तैणीं हुंह राज्ज़ी-राम्बल़अ बापस निं फिरुं, तेभै तैणीं निं एऊ लै शुक्‍की रोटी अर पाणीं का सुआई खाणां लै किछ़ दैई।’"

27 इहअ शूणीं बोलअ मिका, "ज़ै तूह राज्ज़ी-राम्बल़अ बापस फिरे, तै निं बिधाता ईंयां गल्‍ला मुंह बाती बोली!" तेखअ बोलअ मिका इहअ, "इधी तम्हैं होर बी डाहा शूणीं कि मंऐं किज़ै बोलअ।"

28 तेखअ डेऊऐ इज़राईलो राज़अ अहाब अर यहूदो राज़अ जहोशापात दुहै आपणीं सैना पाई गलाद मुल्खे रामोत नगरी अरामी संघै जुधा लै। 29 अहाब राज़ै बोलअ जहोशापाता लै, "हुंह डेऊं जुधा लै भेश बदल़ी अर तूह डाहै राज़ैओ सुआब बान्हीं।" तेखअ डेऊअ इज़राईलो राज़अ अहाब जुधा लै भेश बदल़ी।

30 अराम देशे राज़ै किअ आपणैं रथा आल़ै सैनापति लै हुकम, "तम्हैं पल़ै होरी सोभी छ़ाडी सिधै इज़राईले राज़ै अहाबा लै चुटी।" 31 ज़ांऊं तिन्‍नैं जहोशापात भाल़अ, तिन्‍नैं ज़ाणअ सोभी इहअ कि अह आसा इज़राईलो राज़अ अहाब अर तिंयां पल़ै तेऊ लै चुटी। ज़ांऊं जहोशापातै हाक्‍का पाई, बिधाता किई तेऊए एही मज़त कि अरामी सैना हटी तेऊ का पिछ़ू। 32 अरामी दलपति का गअ थोघ लागी कि अह निं इज़राईलो राज़अ अहाब आथी अर तिन्‍नैं छ़ाडअ तेऊओ पिछ़अ करनअ। इहअ करै बच़ाऊअ बिधाता जहोशापात। 33 एकी अरामी सपाही बाही कतीरै अर सह लागी कुदरती इज़राईले अहाब राज़ै लै तेऊए कबचा मांझ़ै ज़िधी ज़ोल़ हआ, अहाबै बोलअ आपणैं सारथी लै, "हुंह हुअ ज़खमी! रथ फरेऊ पिछ़ू संघा निंऊं मुंह जुधा का दूर!" 34 जुध च़लअ सारी धैल़ी, अहाब राज़अ रहअ आपणैं रथा दी अरामी बाखा मुंह करी होरी सपाही दी नील़ लाई खल़्हुई। खिरी शोटै उडै तेऊ प्राण।