अताल्या लै द्रोह
1 छ़हा साला तैणीं अहाजये शोहरू जोआशा च़ोरी डाहणैं बाद सोठअ जहोयादा प्रोहतै कि ऐबै हुअ किज़ै करनअ। तेऊ किऐ सातुई साला सैनापति, दलपति अर दरबारी मांझ़ै पांज़ ज़ण्हैं आप्पू बाखा संघा बझ़ैल़ी तिन्नां का बिधाते सोह खाई करार करनै। तिंयां कार-करिंदै तै जेरोहामो शोहरू अजर्याह, जहोहनानो शोहरू इशमाईल, ओबेदो शोहरू अजर्याह अदायो शोहरू मासेया अर ज़िक्रीओ शोहरू एलीशापात। 2 तिंयां हांढै यहूदा मुल्खै सोभी नगरी संघा आणै इज़राईली मांझ़ै लेबी अर सोभी टोलीए सैणैं एरुशलेम नगरी लै।
3 तिन्नैं सोभी किअ बिधाते भबनै झाल़अ अर तिन्नैं किई राज़े शोहरू जोआशा संघै करार। जहोयादा प्रोहतै बोलअ तिन्नां लै, "इधी आसा भाल़ा राज़ैओ शोहरू, अह हणअ म्हारअ आगलअ राज़अ ज़िहअ बिधाता आप्पै आसा बोलअ द कि दाबेदे खिंबा मांझ़ै ई हणअ एक ज़ण्हअ राज़अ।" 4 तम्हैं आसा पांज़ दल, ऐबै करै तम्हैं इहअ कि ज़ेभै बशैघे धैल़ी लेबी अर प्रोहत आपणीं च़ाकरी करदै एछे, थारै चिई दला मांझ़ै एक दल रहै भबने प्रऊल़ी पहरी। 5 एक दल रहै राज़े मैहलै पहरी अर एक दल डाहै राज़ मैहला पिछ़ू बाखा प्रऊल़ी सेटा पहरअ पाई। बाकी दूई दल रहै लोगा जैंदरी बिधाते भबने ताटी। 6 बिधाते भबनै निं बिधाते च़ाकरी करनै आल़ै प्रोहत अर लेबी का सुआई कोही भितरा लै एछणैं दैई। तिन्नां दै भितरा लै एछणैं किल्हैकि तिंयां हणैं आप्पू बिधी-बधाने साबै शुचै हुऐ दै। पर बाकी सोभी लोगै लोल़ी बिधातो हुकम मनअ कि तिंयां रहे बागै। 7 लेबी रहै राज़ै पहरी नेल़-नेल़ अर डाहै आप्पू का गुप्त तलबारा संघा रहै राज़ै जोआशा फेर संघा-संघा लगैग लाई हांढदै लागी। ज़ुंण भबना भितरी एछणें कोशिश करे, तेऊ पाऐ मारी।
8 ज़िहअ जहोयादा प्रोहतै हुकम किअ, लेबी अर होरी सोभी यहूदी किअ तिहअ ई। सैना मांझ़ै ज़ुंण दल छ़ुटी दी थिऐ, तिन्नें बशैघे छ़ुटी बी किई खारज अर इहअ करै ती सोभी दलपति का आपणीं सैना संघै ज़ुंण च़ाकरी लै एछणैं तै अर ज़ुंण छ़ुटी लै डेऊणैं तै, तिंयां थिऐ सोभ तिधी। 9 बिधाते भबनै राज़ै दाबेदे ज़ुंण ढाल़ा अर बर्छ़ै थिऐ, तिंयां दैनै जहोयादा प्रोहतै सैने दलपति लै। 10 जहोयादा बझ़ैल़ी सोभी पहरी का तलबारा गुप्त डाहणैं। तिन्नैं डाहअ बिधाते भबनै दखण बाखा पुंझ़ा पोर्ही उतरा बाखा पुंझ़ै तैणीं राज़ै जोआशा फेर पहरअ पाई। 11 तेखअ आणअ जहोयादा प्रोहतै जोआश बागा लै संघा लाअ तेऊए मुंडै मुगट संघा दैनअ तेऊए हाथै देशा दी राज़ करने बधाने च़ुआल़ी दी कताब। तेखअ किअ तिधी तेऊए मुंडै जैतूनो तेल तरैल़ी अभिषेक कि आगलअ राज़अ आसा ऐबै अह। सोभी लोगै बाज़ी तिधी ताल़ी संघा लागै ज़ोरै-ज़ोरै इहअ बोल्दै, "राज़ै जोआशे अमर लोल़ी खास्सी हुई!"
12 राणीं अताल्या का गई पहरी अर लोगे छ़ेल़ शुण्हुंई अर सह आई तेभी बिधाते भबना लै ज़िधी खास्सै मणछ तै कठा हुऐ दै। 13 तिधी भाल़अ तैहा कि नऊंअ राज़अ आसा बिधाते भबनै दूई थाम्हा मांझ़ै खल़्हुअ द, ज़िहअ तिन्नों रबाज़ थिअ। तेऊ फेर थिऐ कार-करिंदै अर नर्शिंगै बाज़णैं आल़ै। लोग तै खुशी मनाऊंदै अर नर्शिंगै बाज़दै लागै दै। अताल्या धेल़अ आपणअ बाघलअ सुआब संघा लागी ज़ोरै लैल़ा पाई इहअ बोल्दी, "अह आसा राज़ द्रोह! अह किअ राज़ द्रोह!"
14 जहोयादा प्रोहत निं अताल्या बिधाते भबना नेल़ मारनअ च़ाहंदअ त, तेऊ किअ कार-करिंदै लै हुकम, "पहरीए लगैगा मांझ़ा का काढा ऐहा पोर्ही संघा निंयां ऐहा इधा का दूर, ज़ुंण ऐहा छ़ड़ैऊंदअ पिछ़ू एछे, तेऊ पाऐ मारी।"
15 अताल्या निंईं तिन्नैं कैद करी राज़े मैहला नेल़, तिधी पाई तिन्नैं घोल़े प्रऊल़ी सेटा मारी।
जहोयादा प्रोहतै खोज़अ बधान
16 जहोयादा प्रोहतै किई जोआश अर लोगे बिधाता संघै एही करार कि तिंयां लोल़ी सदा बिधाते परज़ा रही। राज़ै अर परज़ा मांझ़ै बी किई तेऊ बिधाता शाजत मनी करार कि तिंयां लोल़ी एकी-दुजै लै शुचै-पाक्कै रहै। 17 तेखअ डेऊऐ लोग बाल देअए देहुरै संघा ढोल़अ सह पठी। बेदी अर मुहुर्ती पाई तिन्नैं फाल़ी अर बाल देअ प्रोहत मतान पाअ तिन्नैं बेदी सम्हनै मारी। 18 जहोयादा प्रोहतै सभाल़अ बिधाते भबनो काम काज़ प्रोहत अर लेबी का ज़िहअ राज़ै दाबेदै सोभी लै काम बांडअ द थिअ। तिन्नें ज़िम्मैंबारी ती मोसा गूरे बधाने साबै बिधाता लै हूम बल़ीदान करनअ अर साज़-बाज़ा संघै गिहा बोली बिधाते स्तोती करनी। 19 जहोयादा प्रोहतै डाहै बिधाते भबने प्रऊल़ी दी पहरी लाई कि ज़ुंण छ़ोतलअ होए, तेऊ बागै रोक्के।
20 तेखअ निंयं राज़अ जोआश जहोयादा प्रोहतै संघा हांढणै आल़ै सपाही, दरबारी, दलपति अर सैनापतिए पहरै दी बिधाते भबना का उंधै संघा पजैल़अ राज़े मैहलै, होर लोग आऐ तेऊ पिछ़ू। जोआश डेऊअ पहरीए प्रऊल़ी बाती मैहला भितरी संघा बेठअ राज़गाद्दी प्रैंदै। 21 सोभ लोग तै तिधी खुशी हुऐ दै अर सारी नगरी दी थिई शांती हुई दी किल्हैकि अताल्या ती राज़े मैहलै मारी हेरी दी।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)