2 इतिहास 20

एदोम देशा संघै जुध

1 थोल़ी साला बाद किअ मोआबी, अमोनी अर एदोमी लोगै आप्पू मांझ़ै एक्‍कअ संघा निखल़ै जहोशापात राज़ै संघै जुधा लै। 2 जहोशापात राज़ै सेटा आऐ दूत, तिन्‍नैं खोज़अ, "एदोम देशे पुर्बा लाल समुंदरा बाखा आई खास्सी सैना म्हारै देशा बाखा लै! तिंयां गऐ हसोन-तामर पुजी ज़ेता लै एनगाद बोला अर तेथ हेरअ तिन्‍नैं कबज़अ करी।" 3 जहोशापात राज़ै पल़ी डअर अर तेऊ किई बिधाता सेटा अरज़ कि ऐबै किहअ करूं? तेखअ किअ तेऊ यहूदा मुल्खे सारी परज़ा लै हुकम कि ज़ुंण हाम्हां लै अह दुख पल़अ, एता लै रहा सोभ ब्रतू। 4 यहूदा मुल्खा का आऐ हर नगरी का यहूदी एरुशलेम नगरी बिधाता पुछ़दै कि ऐबै किहअ करनअ? 5 तिन्‍नैं सोभी किअ बिधाते भबने नऊंईं ताटी झाल़अ। राज़अ जहोशापात बी डेऊअ तिन्‍नां सेटा संघा हुअ यहूदा अर एरुशलेम नगरी का आऐ दै सोभी लोगा आजू खल़अ।

6 जहोशापात राज़ै किई बिधाता सेटा एही अरज़, "हे म्हारै दादा-बाबे परमेशर बिधाता, तूह करा स्वर्गा का सोभी देशा प्रैंदै राज़। सारअ बल अर शगती आसा ताखा ई! तेरअ मकाबलअ निं कोहै करी सकदअ! 7 ए म्हारै परमेशर, ऐहा ज़ैगा आसा हाम्हैं तंऐं पजैल़ै दै अर ज़ुंण हाम्हां का आजी एथ थिऐ बस्सै दै, तिंयां काढै तंऐं इज़राईली नदरी एता का पोर्ही संघा दैनी तंऐं अह ज़ैगा आबरामे आद-लुआदा लै ज़ुंण ताल्है तेरअ साथी ज़िहअ थिअ। 8 आबरामे आद-लुआद बस्सै एथ संघा बणाअं तेरै अदर करना लै एक भबन। 9 तिन्‍नां का थिअ ऐहा गल्‍लो थोघ, ज़ै ऐहा ज़ैगा जुध, नकाल़, माहा मरी कि किज़ै होर आफ़त एछे, तै सका तेरी परज़ा तेरै भबना सेटा एछी ताखा अरज़ करी अर ताह शुणनी तिन्‍नें अरज़ संघा हेरनै ताह तिंयां बच़ाऊई।

10 "ऐबै भाल़, मोआबी, अमोनी, एदोमी लोग आऐ हाम्हां इज़राईली हारदै-मारदै! ज़धू म्हारै दाद-बाब मिसर देशा का एछदै तै लागै दै, तधू निं तंऐं तिन्‍नां इना देशे ज़ैगा बाती एछणैं दैनअ अर म्हारै दाद-बाब आऐ इना देशा बागी फेरअ दैई इधा लै अर तिन्‍नैं निं ईंयां मारै आथी। 11 तैही आसा तिंयां ऐबै हाम्हां का बदल़ै लंदै आऐ दै कि हाम्हैं दरल़ाऊंणै तिन्‍नां ऐहा ज़ैगा का पोर्ही ज़ुंण ज़ैगा हाम्हां लै तंऐं आसा दैनी दी। 12 हे परमेशर, ऐबै दै इना लै तूह आप्पै सज़ा, ऐहा एतरी बडी सैना आजू आसा हाम्हैं बज़ंद हुऐ दै! हाम्हां निस्सी समझ़ पल़ी कि किज़ै करनअ? ऐबै आसा हाम्हैं सिधै ताह ई बाखा भाल़ै लागै दै।"

13 तिधी तै बिधाते भबनै यहूदा मुल्खै ज़ैगा-ज़ैगा का आऐ दै मणछ, तिन्‍नें बेटल़ी अर शोहरू-माठै संघै खल़्हुऐ दै। 14 बिधाता आअ हेरा-हेरी एकी जहजीएल नाओंए एकी लेबी दी ज़ुंण तिधी लोगा जैंदरी थिअ। सह लेबी त असाप टोली का मतानियाहे आद-लुआदा मांझ़ै जकर्यो शोहरू, बेनियाह अर जेइलो पल़पोचअ। 15 जहजीएलै बोलअ इहअ, "यहूदी मणछो! एरुशलेम बस्सै दै सोभी मणछो! राज़अ जहोशापात! बिधाता बोला तम्हां लै इहअ, ‘ऐहा एतरी बडी सैना भाल़ी निं तम्हैं डरदै लागी अर नां आपणअ हैअ चोल़ी। जुध निं थारअ आथी!’ तम्हां बाखा हणअ थारअ परमेशर आप्पै। 16 तम्हैं पल़ै काल्‍ला तिन्‍नां लै चुटी, तिंयां हणैं सीस कुआल़ी उझै उखल़दै लागै दै, तिंयां भेटणैं तम्हां तेऊ खागै तैहा बाता ज़ुंण जरूएल नगरी नेल़ रेगीस्ताना लै डेओआ। 17 तम्हां निं जुध करने ज़रुरत ई पल़णीं। तम्हैं रहै उपर सिधै लगैग लाई खल़्हुई तिन्‍नां न्हैल़ै लागी अर तम्हां का जाणअ तिधी शुझुई कि बिधाता दैनी तम्हां लै ज़ीत। यहूदा अर एरुशलेम नगरीए लोगो! तम्हैं निं हैल़अ-फिकर डाही नां डरी आथी। तम्हैं डेओआ काल्‍ला जुधा लै अर तम्हां संघै हणअ बिधाता आप्पै।"

18 राज़ै जहोशापातै टेक्‍कअ धरनीं उटअ पल़ी माथअ अर यहूदा मुल्खे होरी नगरी अर एरुशलेम नगरी का तिधी आऐ दै सोभी मणछै बी टेक्‍कअ बिधाता सेटा माथअ। 19 कोराह अर कहात टोलीए लेबी उझ़ुऐ खल़ै संघा लागै ज़ोरै-ज़ोरै बोल्दै, "इज़राईले परमेशर बिधाते लोल़ी सदा ज़ै-ज़ैकार हुई।"

20 दुजै धैल़ै दोत्ती उझ़ुऐ सोभ दोत्थी संघा डेऊऐ तकोआ रेगीस्ताना बाखा लै। हांढदी-हांढदी हुअ जहोशापात आजू खल़अ संघा बोलअ सोभी लै इहअ, "यहूदा अर एरुशलेम नगरीए मणछो! तम्हैं डाहा आपणैं परमेशर बिधातो भरोस्सअ, तै सका तम्हैं मकाबलै लै टेक्‍की। तिन्‍नां गल्‍ला दी करा विश्वास ज़ुंण बिधाते गूरै बोली, तै जाणैं तम्हैं सफल हई।" 21 सोभी लोगा संघै सलाह करी राज़ै जहोशापातै किअ थोल़ै गाज़ै-बाज़ै आल़ै लै हुकम कि च़ोल़ै बान्हीं हांढा गाज़ै-बाज़ै संघै सारी सैना आजू एही गिहा बोल्दी, "बिधाते ज़ै-ज़ैकार, सह झ़ूरा हाम्हां लै सदा!"

22 ज़ांऊं तिंयां गिहा बोल्दै लागै, बिधाता पाअ दुशमणे सैना दी झाख ज़ुंण यहूदी खतम करदै तै आऐ दै! 23 अमोनी अर मोआबी पल़ै एदोमी सैना मारदै चुटी अर तिंयां किऐ तिन्‍नैं पठी खतम अर तेखअ झ़घल़ुऐ तिंयां आप्पू मांझ़ै ज़ेभै तैणीं तिंयां एकी-दुजै पठी निं मारी मुक्‍कै। 24 ज़ांऊं यहूदी सैना रेगीस्ताना नेल़ च़ौकी दी पुजै, तिन्‍नैं भाल़ी दुशमणे सैना कि तिंयां आसा सोभ धरनीं लाम्मै पल़ै दै अर मूंऐं दै! तिन्‍नां मांझ़ै निं कोह ज़िऊंदअ आथी त बच़अ द!

25 जहोशापात अर तेऊए सारी सैना डेऊई तिन्‍नां नेल़ समाना लुटदै अर तिन्‍नां भेटी तेथ खास्सी ज़िणस, गाऊई, झिकल़ै अर होर बी कई खास्सी किम्मती च़िज़ा। तिन्‍नां समाना झाल़णां लै लागै तिन्‍नां चअन धैल़ै पर तज़ी बी निं तिंयां तेता का पठी समान झाल़ी आणी सकै। 26 च़ौथै धैल़ै हुऐ तिंयां सोभ एकी खागै कठा संघा किअ सोभी बिधाता शूकर। तैही पल़अ तेऊ खागा नाअं, "बराका*20:26 बराका ज़ै-ज़ैकार।" 27 तेखअ आऐ तिंयां सोभ यहूदी एरुशलेम नगरी लै फिरी, तिन्‍नां आजू-आजू त जहोशापात हांढदअ लागअ द। तिंयां सोभ तै खास्सै खुश हुऐ दै किल्हैकि बिधाता दैनी ती तिन्‍नां लै तिन्‍नें दुशमणा का ज़ीत। 28 हांढदी-हांढदी तै तिंयां बींन, छ़छ़ाल़ा अर नर्शिंगै बाज़दै लागै दै, संघा डेऊऐ तिंयां कोहरै एरुशलेम नगरी बिधाते भबनै। 29 ज़ांऊं ओरी-पोरी होरी सोभी देशा का इहअ थोघ लागअ कि बिधाता किअ इज़राईलीए दुशमणे सैना संघै आप्पै जुध! तधा बाद लागै तिंयां बिधाता का डरदै। 30 इहअ करै हुई जहोशापाते राज़ा दी शांती किल्हैकि बिधाता दैनअ तिन्‍नां लै फेर-फिरदै सोभी दुशमणा का राम।

यहूदा मुल्खै राज़ै जहोशापातो राज़ो सार

31 ज़धू जहोशापात यहूदा मुल्खो राज़अ बणअ, तधू ती तेऊए अमर पैंईंती साले। तेऊ किअ एरुशलेम नगरी का यहूदा मुल्खै पच्‍ची साला तैणीं राज़। तेऊए ईज थिई शिल्हीए शोहरी अजूबा। 32 जहोशापात त आपणैं बाब आसाह ज़िहअ भलअ, तेऊ बी किअ तिहअ ई ज़िहअ बिधाता च़ाहा त कि इहअ लोल़ी हुअ। 33 पर उछ़टी धारा देहुरै निं तेऊ बी ढोल़ै, यहूदी परज़ा निं अज़ी बी तत्त-दिला का आपणैं दादा-बाबे परमेशर बिधाता बाखा फिरै आथी तै कि तिंयां सिधी बिधाते स्तोती करे।

34 राज़ै रहंदी जहोशापातै ज़िहअ-ज़िहअ बी किअ, तिंयां गल्‍ला आसा शुरू पोर्ही तेऊओ राज़ खतम हणैं तैणीं हनानीए शोहरू जेहू लिखी दी कताबा दी लिखी दी, जेहूए सह कताब आसा इज़राईल मुल्खे राज़े इतिहासो भाग।

35 यहूदा मुल्खे राज़ै जहोशापातै किअ आपणैं राज़ा दी इज़राईल मुल्खे राज़ै अहाजया संघै सुल्हअ ज़ुंणीं कई कदुष्ट काम किऐ तै। 36 जहोशापात राज़ै बणाऐं एजोन-गेबर नाओंए ज़ैगा समुंदरै हांढणै आल़ै कई ज़हाज़। 37 पर मारेशा नगरीए दोदाबाहे शोहरू एलीआजरै दैनी जहोशापाता लै चतैनगी, "तंऐं किअ कदुष्ट अहाजया राज़ै संघै मेल़-ज़ोल़ अर एता पिछ़ू करनी बिधाता तेरी बणाईं दी च़िज़ा बरैबाद।" तिंयां ज़हाज़ चुटै अर तिंयां निं तरशीश पुजै ई आथी कि तिन्‍नां बेच़ी सके।