2 इतिहास 32

अश्शूरी छ़ेल़अ यहूदा मुल्खा संघै जुध

1 राज़अ हिजकिया रहअ बिधाता लै शुचअ-पाक्‍कअ ज़ांऊं सह इना सोभी कामां करी मुक्‍कअ, अश्शूर देशे राज़ै सनहेरीबै छ़ेल़अ यहूदा मुल्खा संघै जुध। तेऊ गोटी यहूदा मुल्खे गहल़ा आल़ी नगरी संघा किअ आपणीं सैना लै हुकम कि तिन्‍नां नगरी फेरे गहल़ा पाआ ढोल़ी। 2 ज़ांऊं हिजकिया का ज़ाण्हुंअ कि ऐबै लाअ सनहेरीबै एरुशलेम नगरी बी जुध छ़ेल़ी, 3,4 राज़ै हिजकिया किई आपणैं कार-करिंदै अर सैना लै सलाह दैणैं आल़ै बज़ीरा संघै सट-सलाह कि नगरी बाखा बगणैं आल़ै पाणीं दी लाणअ रोक्‍कअ ताकि ज़ांऊं अश्शूरी सैना नगरी नेल़ एछे तिन्‍नां निं झुटणा लै पाणीं लोल़ी भेटअ। कार-करिंदै निंयैं आप्पू संघै खास्सै मणछ संघा लाअ नगरी नेल़ बगणैं आल़ी गाडा दी रोक्‍कअ।

5 नगरी फेर गहल़ै ज़िधी-ज़िधी ढूल़अ द थिअ, तेथ बी बझ़ैल़ी राज़ै हिजकिया च़णाई करनै अर तेता प्रैंदै डाहै उछ़टै कोट च़िणीं। ज़ुंण गहल़ा बागै एक होर दुआल थिई, तेते बी किई तेऊ मराम्मत। पुर्बा बाखा दाबेदपूर गहल़ बी किअ तेऊ पाक्‍कअ। जुधा करना लै डाही खास्सी ढाल़ा अर अस्त्र-शस्त्र बणाईं। 6 सैने दला लै छ़ांटै राज़ै हिजकिया दलपति। तेखअ शादै सोभै दल नगरीए प्रऊल़ी नेल़ च़फै लै, तिधी बढेरअ तेऊ इहअ बोली सैनो जोश, 7 "हिम्मत डाहा, पिछ़ू निं हटी! अश्शूरी राज़ै सनहेरीब अर तेऊए सैना का निं डरदै लागी, तिन्‍नां का कई गुणा खास्सअ बल आसा हाम्हां संघै। 8 तिन्‍नें सैना च़ाऐ ज़ेतरी बी खास्सी होए, पर सह आसा सिधअ मणछो ज़ोर। हाम्हां बाखा जुधा करनै आल़अ आसा म्हारअ परमेशर बिधाता!" इहअ करै दैनी राज़ै हिजकिया यहूदा मुल्खे आपणीं सैना लै हिम्मत।

अश्शूरी राज़ै दैनी एरुशलेम नगरी लै धमकी

9 थोल़ै धैल़ै बाद हुअ इहअ कि अश्शूरी राज़ै सनहेरीबै तै आपणीं सैना संघी लकीश नगरी डेरै पाऐ दै तेऊ दैनअ राज़ै हिजकिया अर यहूदा मुल्खे लोगा लै समाद ज़ुंण तेऊ संघै एरुशलेम नगरी आसा तै, 10 "हुंह अश्शूर देशो माहा राज़अ सनहेरीब पुछ़ा तम्हां का इहअ कि तम्हां कसरै आसरै आसा अज़ी बी हिम्मत? मंऐं आसा फेर फिरदै तम्हैं गोटी डाहै दै! 11 हिजकिया आसा तम्हैं यहूदा मुल्खे लोग इहअ बोली धोखै दी डाहै दै कि थारै परमेशर बिधाता हेरनै तम्हैं मुंह अश्शूर देशे माहा राज़ै का बच़ाऊई! इहअ करै लाऐ तेऊ तम्हैं नगरी भितरी भुखै-नचिशै मारी! 12 तिंयां थिऐ बिधाते ई गान-स्तान अर बेदी ज़ुंण एऊ हिजकिया बरैबाद किई। एऊ बोलअ यहूदा अर एरुशलेम देशे लोगा लै इहअ कि एरुशलेम नगरीए बेदी का सुआई निं होर्ती माथअ टेक्‍की आथी। 13 तम्हैं हणअ शूणअ द कि मेरै-दाद-बाब अर मंऐं होरी देशे केही बूरी दशा किई? तिन्‍नां देशे देअ देबतै कै अश्शूरी राज़ै का आपणीं परज़ा बच़ाऊई? 14 तिन्‍नां देशै निं इहअ एक बी देअ नां देबतअ निखल़अ ज़ुंणी आपणीं परज़ा हाम्हां अश्शूरी राज़ै का बच़ाऊई होए! ऐबै तम्हैं कै सोठा थारै बिधाता कै तम्हैं बच़ाऊई हेरनै? 15 तम्हैं निं हिजकिया राज़े ज़ाणैं लागी, एऊ आसा तम्हैं धोखै दी डाहै दै! एऊओ विश्वास निं करी! आझ़ तैणीं निं कोही देशे देअ-देबी अश्शूरी माहा राज़ै का आपणीं परज़ा बच़ाऊई सकै। ऐबै निं तम्हैं हिजकिया राज़े ऐहा गल्‍ले आसरै रही कि तम्हैं हेरनै थारै देअआ बच़ाऊई!"

16 तिंयां अश्शूरी कार-करिंदै लागै परमेशर बिधाता अर बिधाते दास राज़ै हिजकिया लै होर बी खास्सै कज़िछ़ बोल्दै। 17 सनहेरीब राज़ै ज़ुंण च़िठी ती लिखी दैनी दी, तेथ त इज़राईले परमेशर बिधातो सुहांग किअ द! तेथ त इहअ लिखअ द, "कोही देशे देअ-देबी निं आपणीं परज़ा मेरी शगती का बच़ाऊई सकै, नां हिजकियो देअ बिधाता मुखा आपणीं परज़ा बच़ाऊई सकदअ।" 18 तिंयां कार-करिंदै लागै ज़ोरै-ज़ोरै इना गल्‍ला इब्रानी बोली दी पहल़दै ताकि ज़ुंण यहूदी मणछ एरुशलेम गहल़े दुआली प्रैंदै तै बेठै दै, तिंयां शुणें अर डरे अर अश्शूरी सैना लै एरुशलेम नगरी दी कबज़अ करनअ सान होए। 19 तिंयां थिऐ बिधाते बारै इहअ बोल्दै लागै दै ज़िहअ कि बिधाता आसा होरी देअए आम मुहुर्ती ज़िहअ ज़ुंण मणछै आपणैं हाथै थिई बणाईं दी!

20 तेखअ लागै राज़अ हिजकिया अर आमोसो शोहरू ईशायाह गूर बिधाता सेटा लेर-पकार पाई मज़त मांगदै। 21 बिधाता छ़ाडअ एक स्वर्ग दूत तेऊ पाऐ अश्शूरी सैने डेरै सारी सैना मारी अर अश्शूरी राज़अ ठुर्हअ बेइज़त हई आपणैं देशा लै बापस। एकी धैल़ै डेऊअ सह आपणैं देअए देहुरै लै अर तिधी पाअ सह तेऊए आपणैं ई शोहरू तलबारा करै मारी।

22 इहअ करै बच़ाऊऐ बिधाता एरुशलेम नगरीए परज़ा अर राज़अ हिजकिया अश्शूरी राज़ै सनहेरीबा अर तिन्‍नें होरी दुशमणा का। तेखअ भेटी यहूदा मुल्खे लोगा होरी सोभी देशा का शांती। 23 तेखअ लागै खास्सै मणछ एरुशलेम नगरी लै एछदै, तिंयां करा तै बिधाता लै भैंट अर यहूदा मुल्खे राज़ै हिजकिया लै किम्मती च़िज़ा भैंट आणी। तधा पोर्ही करा तै सोभ देश राज़ै हिजकियो अदर।

राज़ै हिजकियो घमंड

24 तिन्‍नां ई धैल़ै हुअ इहअ कि हिजकिया राज़ै लागी एही बमारी कि तेऊए ती मौत हणैं आल़ी। तेऊ किई बिधाता सेटा अरज़ कि हे बिधाता, तूह दै मुल्है किज़ै इहअ नछ़ैण कि हुंह जाणअ ऐहा बमारी का बिज़री। 25 पर हिजकिया त खास्सअ घमंड आअ द कि तेऊ निं बिधातो शूकर बी किअ कि बिधाता किई तेऊ लै एतरी गल्‍ला। राज़ै हिजकिया संघै पल़ी एते सज़ा यहूदा अर एरुशलेम नगरीए परज़ा बी भुगतणी। 26 खिरी मनी राज़ै हिजकिया अर एरुशलेम नगरीए परज़ा आपणीं गलती अर बिधाता छ़ाडी तिन्‍नां लै माफी। तेखअ निं राज़ै हिजकिये ज़िऊंदी ज़िता तिन्‍नां लै किछ़ै आफ़त पल़ी।

हिजकिया राज़े ज़ैदात अर तेऊए काम

27 राज़अ हिजकिया त खास्सअ सेठ, सोभ करा तै तेऊओ अदर। तेऊ तै सुन्‍नैं, च़ंदी, मणीं, नघ, खुशबूदार मसालै, ढाल़ा अर होरी किम्मती च़िज़ा डाहणां लै खास्सै भढार बणाऐं दै। 28 एता का लाऊआ तै तेऊ नाज़, दाखे रस, जैतूने तेल डाहणां लै भढार बणाऐं दै। डागै लै बडै-बडै खुढ अर भेडा-बाकरीए हेल़्ही डाहणां लै ती बडी-बडी शाल़ा बणाईं दी। 29 बिधाता दैनी राज़ै हिजकिया लै एही खास्सी बर्गत कि तेऊ का थिई खास्सी भेडा, बाकरी अर गाऊईए हेल़्ही। इना डागै-चैणैं डाहणां लै बणाईं तेऊ खास्सी नगरी। 30 सह थिअ राज़अ हिजकिया ई ज़ुंणीं गीहोन गाडा दी रोक्‍कअ लाई सह गाड कुल्ह खण्हीं एरुशलेम नगरी दाबेदपूर गहल़े पछ़मा बाखा लै फरेऊई। ज़ुंण बी तेऊ काम किअ तेथ हुअ सह सफल। 31 बाबेल देशे कार-करिंदै छ़ाडै हिजकिया सेटा आपणैं दूत इहअ पुछ़दै कि हाम्हैं किहअ करै ज़ाणूं कि सोभै गल्‍ला किई ताल्है बिधाता? परमेशरै दैनअ इहअ परखणां लै हिजकिया आपणैं साबै ज़बाब दैणैं कि सह केचल़अ शुचअ-पाक्‍कअ आसा।

राज़ै हिजकियो राज़ हुअ खतम

32 राज़ै हिजकिया ज़िहै बी काम किऐ, तिंयां सोभै गल्‍ला आसा आमोसे शोहरू ईशायाह गूरे कताबा अर इज़राईल अर यहूदा मुल्खे राज़े इतिहासे कताबा दी लिखी डाही दी। 33 खिरी मूंअ राज़अ हिजकिया संघा डाहअ दाबेदपूर राज़ै दाबणे मल्थानै घोरी दी दाबी। यहूदा अर एरुशलेम नगरीए लोगै किअ मरनै बाद खास्सअ अदर। आजू बणअ तेऊए ज़ैगा तेऊओ शोहरू मनिश्शे यहूदा मुल्खो राज़अ।